- Detalhes
- Escrito por Mateus Goncalves
- Visualizações: 180
Universidade Nacional Timor Lorosa’e (UNTL) liuhusi Diresaun Nasional Pagamentu no Propinas (DNPP) informa ba estudante sira, relasiona ho avisu ne’ebé fó-sai iha 28 Dezembru 2023 nian katak, estudante UNTL sira ne’ebé nia oráriu pagamentu seidauk to’o maibé hakarak halo ona pagamentu bele bá selu iha Sukursal BNCTL sira seluk iha Díli no iha munisípiu sira.
Informasaun kompletu bele hare iha anexu
Média UNTL /DNPP 📝
- Detalhes
- Escrito por Mateus Goncalves
- Visualizações: 142
Universidade Nacional Timor Lorosa'e (UNTL) nia Visereitór Asuntu Akadémiku no Garantia Kualidade, Profesór Samuel Venâncio de Sousa Freitas, hala'o enkontru ho estrutura Faculdade de Engenharia Ciência e Tecnologia (FECT), iha Kampus hera FECT (15/01), hodi deskuti kona-ba Kurríkulu Akadémiku ba Fakuldade.
Objetivu husi reuniaun ne'e, Visereitór hamutuk ho estrutura FECT deskuti (1) Kuríkulu Akadémiku nian no hadia jestaun ba kualidade akadémika nian iha prosesu ensinu, (2) Disiplina Transversais, (3) preparasaun ba avaliasaun ANAAA nian iha 2024.
Reuniaun ne'e partisipa husi Diretór Jerál Servisu Administrasaun Akadémika Sr. Armindo Leto Fátima, Diretór Diresaun Nasional Avaliasaun Sr. Agustinho Quelo, Diretór Nasional Atendimentu Estudante Sr. Rui Loco Pires, Diretora Disiplina Transversais Profesora Zelina Roteiro, Visedekanu sira, Diretór Departamentu, dosente no asistente tékniku sira.
#TimorLeste #UNTL #VAAGQ #FECT #DNAA 15 Janeiru 2024
Média UNTL 📝: Laurindo da Cruz Gomes
Foto 📷: Laurindo da Cruz Gomes
- Detalhes
- Escrito por Mateus Goncalves
- Visualizações: 157
Universidade Nacional Timor Lorosa'e (UNTL) nia Visereitór Asuntu Akadémiku no Garantia Kualidade, Profesór Samuel Venâncio de Sousa Freitas, hala'o enkontru ho Dekanu Faculdade de Ciências Sociais (FCS), Prof. José António Lourenço da Costa ho estrutura hodi halo deskuti ba asuntu akadémiku sira fakuldade nian, iha Kampus Kaikoli FCS, Díli (16/01).
Objetivu husi reuniaun ne'e, Visereitór hamutuk ho estrutura FCS deskuti revizaun kuríkulu akadémiku liuliu prátika ba Kuríkulum Akadémiku, iha prosesu ensinu-aprendizajen no preparasaun ba Avaliasaun no Reakreditasaun husi ANAAA , Unidade Kurrikulár Transversais no dezempeñu servisu ba tinan 2024 nian.
Reuniaun ne'e partisipa husi Diretór Jerál Servisu Administrasaun Akadémika Sr. Armindo Leto Fátima, Diretór Diresaun Nasional Avaliasaun Sr. Agustinho Quelo, Diretór Nasional Atendimentu Estudante Sr. Rui Loco Pires, Diretora Disiplina Transversais Profesora Zelina Roteiro, Dekano FCS Profesór José António Lourenço da Costa, Konsellu Doutór, Diretór Departamentu, dosente no asistente tékniku sira.
#TimorLeste #UNTL #VAAGQ #FCS #DNAA 16 Janeiru 2024
Média UNTL 📝: Mario Jonio M. Mendonça
Foto 📷: Leonia de A. da Costa
- Detalhes
- Escrito por Mateus Goncalves
- Visualizações: 157
Universidade Nacional Timor Lorosa’e (UNTL), nia Faculdade de Engenharia Ciência e Tecnologia (FECT) liuhusi Departamento de Eletrónica e Elétrica (DEE) nia estudante finalista Francisco Lelo Bere aprezenta rezultadu peskiza kona-ba esperimenta “Sistema ense bee iha botir plástiku no taka botir nia matan automátiku kontrolu husi mákina PLC (Programmable Logic Controller)”.
“Ha’u-nia tópiku husi traballu ne’e mak Sistema ense bee iha Botir/Aqua no taka matan automátiku kontrola husi PLC (Programmable Logic Controller) ho objetivu utiliza PLC hodi halo kontrolu automatiku ba iha sistema refere.
Peskiza ne’e uza métodu estudu laboratóriu, planeamentu sistema no testa ba sistema ho durasaun fulan tolu. Instrumentu ne’ebé utiliza mak mákina PLC, matéria eletrónika, eletrika, mekánika , aqua mamuk no bee”, tenik Lelo Bere, hafoin remata nia aprezentasaun iha lokál ezame Laboratóriu DEE-FECT Hera, Díli (12/01).
Estudante ne’e mós hatutan rezultadu ne’ebé nia hetan iha peskiza refere mak bee ne’ebé ense iha botir plástiku (aqua mamuk), taka tiha matan, koloka aqua ba kaixa bele kontrola husi aparellu PLC no nia implementasaun bele uza iha indústria fabrika aqua.
“Rezultadu ne’ebé atinje kompremete iha ha’u-nia planu atu dezenvolve di’ak liután no iha futuru hodi kontribui ba indústria ne’ebé iha relasaun ho nia esperiénsia. Liuhusi estudu ne’e mós bele kompleta ha’u-nia traballu finál kursu nian (Monografia)”, dehan nia.
Dosente orientadór Profesór Reinaldo Guterres da Cruz informa, estudante nia tópiku ne’e importante loos, tanba Timor-Leste foin ukun aan seidauk iha indústria, maibé agora iha hela faze dezenvolvimentu, espera iha futuru estudante ne’e bele implementa saida mak sira aprende.
“Tópiku ida-ne’e importante liu, tanba Timor-Leste foin ukun aan, seidauk iha industria maibé agora tama dadauk ona, tanba ne’e espera katak iha futuru estudante ne’e rasik bele implementa koñesimentu hirak ne’e iha sosiedade”, dehan Profesór Reinaldo.
Profesór ne’e mós husu ba estudante sira, atu aprende di’ak liután, tanba atu hatene buat hirak ne’e la fasil, liu-liu oinsá kria mákina ida-ne’e, importante mak tenke buka aprende mesak ho meiu oioin ne’ebé iha.
#TimorLeste #UNTL #FECT #DEE 17 Janeiru 2024
Média UNTL 📝: Domingos Amaral
Foto 📷: Agostinho da Cruz
- Detalhes
- Escrito por Mateus Goncalves
- Visualizações: 381
Universidade Nacional Timor Lorosa'e (UNTL) nia Visereitór ba Asuntu Akadémika no Garantia Kualidade (VRAAGQ), Profesór Venâncio de Souza Freitas, iha Kampus Sentral UNTL nian, Díli (12/01) hatete, universidade sei desidi implementasaun Sistema Preskrisaun (Drop Out) iha finál Fevereiru 2024, .
Visereitór ne'e hatete, durante ne'e regulamentu akadémiku eziste maibé la implementa, tan ne'e parte Reitoria no Konsellu Jerál sei halo deklarasaun hodi fó sai ba públiku, nune’e fó espasu durante tinan ida fulan neen, maské prazu ba rejistu to'o Fevereiru 2024 maibé ninia implementasaun sei desidi iha finál Fevereiru tinan 2024 no sei la implementa direta.
"Ami husi parte Reitoria no Konsellu Jerál tetu ona, prazu ba rejistu sei remata iha fulan Fevereiru, no atu implementa sistema Drop Out (DO) mak sei desidi iha finál fevereiru wainhira ami marka fali reuniaun. Bainhira aplika en vigor ona maka estudante ne'ebé la rejistu signifika nia lakon ona númeru rejistu estudante (NRE), nune'e UNTL la konsidera ona, hein katak sira sei mai fali, tanba tinan kotuk dadus la ativu hamutuk rihun 27", dehan Visereitór.
Iha parte seluk Diretór Diresaun Nacional Atendimentu Estudante (DNAE), Sr. Rui Loco Pires hatete, rejistrasaun ba estudante regulár ne'e hahú husi dia 4 to’o 16 Fevereiru, maibé parte finansa nafatin estende to 29 Marsu 2024.
"Estudante readmisaun ne'ebé fó sai iha tinan 2022 hahú husi semestre par no impar mai to'o tinan 2023 nian totál estudante atus tolu neennulu (360), mak mai halo readmisaun ona", tenik Diretór.
Diretór ne'e salienta katak, agora daudaun hein hela karta husi fakuldade ba visereitór hatun despaxu ba diresaun liuliu ba parte tékniku nian, hodi halo atendimentu nafatin ba estudante hirak ne'ebé seidauk halo readmisaun.
Diretór ne'e apela ba estudante hirak ne'ebé seidauk readmisaun, atu hakbesik ba fakuldade halo karta deklarasaun hodi ativu fila fali estudu hanesan baibain.
#TimorLeste #UNTL #VRAAGQ #DNAE 16 Janeiru 2024
Média UNTL 📝: Mario Jonio M. Mendonça
Foto 📷: Agostinho da Cruz