- Detalhes
- Escrito por Mateus Goncalves
- Visualizações: 227
Universidade Nacional Timor Lorosa'e (UNTL) liuhusi Visereitór ba Asuntu Akadémika no Garantia Kualidade (VRAAGK) Profesór Samuel Venâncio de Sousa Freitas hatate, UNTL sei simu estudante hamutuk rihun haat, atus hitu rua-nulu husi kursu haatnulu-resin ida, bazeia ba proposta ne'ebé submete ona ba Ministériu Ensinu Superior Siénsia no Kultura (MESSK) no aprova ona iha fulan Novembru tinan 2023.
Profesór Samuel Venâncio de Sousa Freitas, iha nia knaar fatin kampus sentral UNTL, sesta-feira (5/01/24), esplika, UNTL halo proposta ne'e bazeia ba informasaun sira ne'ebé rekolla husi Diretór Departamentu ba kada kursu, tanba sira mak fahe oráriu no sira rasik mak hatene kondisaun ne'ebé bele akumula estudante sira.
"Ita sei simu estudante hamutuk 4.720 bazeia ba proposta ne'ebé ita haruka ba MESSK no aprova ona, no dadus ne'e bazeia mós ba deklarasaun sira husi diretór sira ba kada kursu hodi tetu em termus de infraestrutura no sala de aula" dehan Visereitór.
Visereitór ne'e hatutan, segunda loron 8 fulan ne'e, MESSK ho UNTL sei halo abertura ba koresaun nota ezame ba rejime espesial sira, no posibilidade sei anunsiu rezultadu iha ikus fulan Janeiru ka inísiu fulan Fevereiru.
#TimorLeste #UNTL #VRAAGK 5 Janeiru 2024
Media UNTL #Leonia de A. da Costa
Foto : Leonia de A. da Costa
- Detalhes
- Escrito por Mateus Goncalves
- Visualizações: 204
Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins, MPH,Ph.D, prezidi Isar Bandeira ba fulan janeiru tinan 2024 nian, iha kampus sentral UNTL nian, Díli (8/01).
Iha diskursu, Magnífiku Reitór apela ba sivitas akadémika hotu atu partisipa máximu iha Isar Bandeira ne'ebé realiza kada fulan ida dala ida, nomós hatudu disiplina, ne'e hanesan responsabilidade ida hodi hatudu domin ba ita-nia nasaun.
"Isár bandeira ne'e ita tenki hahú ho disiplina no husu ba ita hotu atu kumpri no ba oin ita sei hala'o isár bandeira ne'ebé sei responsabiliza husi fakuldade sira, espera iha tinan foun ita iha enerjia barak atu hahú servisu no dedikasaun ba ita-nia universidade", dehan Reitór.
Responsavél ba serimónia Isar Bandeira ne'e husi Funsionáriu Administrasaun Jerál UNTL nian, no partisipa husi Visereitór, Proreitór, Diretór Jerál, Diretór Nacional, Xefe Departamentu, Dekanu, Visedekanu, Dosente, Funsionáriu no Estudante sira.
Média UNTL 📝: Denilson Amandio Barros
Foto 📷: Denilson A. Barros, Agostinho da Cruz
- Detalhes
- Escrito por Mateus Goncalves
- Visualizações: 149
Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins, MPH, Ph.D, ho estrutura hamutuk ho Ministru Ensinu Superior Siénsia no Kultura (MESSK), S.E. José Honório da Costa Pereira Jerónimo, lansa fatuk dahuluk ba konstrusaun edifísiu foun Instituto Nacional de Linguística (INL) no Faculdade de Educação Artes e Humanidades (FEAH) nian, iha kampus Liceu, Díli (5/01).
Reitór iha diskursu hatete, UNTL kontente tebes, tanba bele hahú ona konstrusaun foun ba INL ho FEAH, tanba fakuldade boot sala de aula sufisiente, liuhusi konstrusaun ba efifísiu refere bele apoiu funsionamentu ne’ebé di’ak liután.
"Ohin ita kontente tebes tanba hahú ho tinan foun, ita mos lansa fatuk dahuluk ba konstrusaun edifísiu foun INL ho FEAH nian no husi konstrusaun ne'e ita espera katak bele sufisiente ba INL ho FEAH no parabéns ba kompañia Feto Kaduak,Lda ne'ebé manan ona projetu ne'e, husu atu kunpri rekejitu no finaliza tuir nia tempu", dehan Reitór.
Iha fatin hanesan, tuir Ministru MESSK nian, S.E. José Honório da Costa Pereira Jerónimo hatete, espasu di'ak ba UNTL tanba FEAH no liuliu INL eziste atu hanorin ko'alia tetun di'ak maibé Timoroan sira ko'alia tetun sei kahur hela, espera futuru bele dezenvolve Tetun.
"Lansamentu ida ne'e nu'udar espasu di'ak ba UNTL no importante tebes atu dezenvolve tetun iha Timor-Leste, tanba ita ko'alia sempre kahur ho lian seluk, espera husi konstrusaun ida ne'e, ita ne'ebé servisu sei dezenvolve tetun di'ak liután iha fufuru. Nune’e, bele fasilita mós espasu balun ba FEAH ne’ebé fasilidade sei menus", tenik Ministru.
Kompaña Feto Kaduak mak manan projetu ne'e, ho durasaun ba konstrusaun ne'e tinan ida, no konstrusaun sei hahú husi loron 8 fulan Janeiru 2024 ne'e.
Partisipa iha lansamentu ne'e, Visreitór, Proreitór, Eis Reitór sira, Diretór Jerál, Diretór Nacional, Diretora INL nian, Profesora Roza Tilman, Dekanu FEAH nian, Profesór Teodoro Soares, Xefe Departamentu no konvidadu sira.
#TimorLeste #UNTL #INL #FEAH 5 Janeiru 2024
Média UNTL 📝: Leonia de A. da Costa
Foto 📷: Denilson A. Barros
- Detalhes
- Escrito por Mateus Goncalves
- Visualizações: 193
- Detalhes
- Escrito por Mateus Goncalves
- Visualizações: 162
Universidade Nacional Timor Lorosa’e (UNTL), nia Magnífiku Reitór Profesór dr. João Soares Martins, MPH,PhD, hasoru malu ho Diretora Poliklínika Universitaria dra. Teresa Madeira ho nia ekipa tekniku sira, hodi observa kondisaun Poliklinika nian, iha Kampus Sentrál UNTL nian, Díli (05/01).
Objetivu husi vizita refere, diskuti kona-ba kondisaun ba fatin no fasilidade sira hodi fó atendimentu ba sivitas akadémika UNTL iha tratamentu saúde.
Partisipa husi vizita ne’e, Diretor Jeral Servisu Apoiu Reitoria Sr. Jacinto H. S. Belo no pessoal saúde husi Poliklínika nian.
#TimorLeste #UNTL #PoliklínikaUniversitaria 04 Janeiru 2024
Média UNTL 📝 : Eugenia de Jesus Guterres
Foto 📷: Agostinho da Cruz