- Detalhes
- Escrito por Mateus Goncalves
- Visualizações: 338
Universidade Nacional Timor Lorosa'e (UNTL) nia Reitór Interinu, atuál Visereitór ba Asuntu Akadémika no Garantia Kualidade, Profesór Dr. Samuel Venâncio de Sousa Freitas hasoru malu ho reprezentante Konseleiru Embaxada Malázia iha Timor-Leste, Sra. Nadia Azura Mohd Nudri, iha Sala- Videokonferénsia, UNTL, Dili, (19/01) hodi ko'alia kona-ba preparasaun planu antes hasoru embaxadór Malázia nian.
Objetivu husi enkontru ne'e, parte rua ko'alia kona-ba preparasaun, antes embaxadór sei vizita UNTL nian iha loron 28 fulan Janeiru, atu apoiu edukasaun nian, liuliu UNTL bele aprezenta dezafiu sira ba Embaxadór Malázia iha Timor-Leste.
Partisipa iha enkontru ne'e, Visereitór ba Asuntu Kooperasaun nian, Profesór Tomé Xavier Jerónimo, no ekipa husi reprezentante Embaxada Malázia nian.
#TimorLeste #UNTL #VRAK #EmbaxadaMalázia 22 Janeiru 2024
- Detalhes
- Escrito por Mateus Goncalves
- Visualizações: 264
Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins MPH, Ph.D, hamutuk ho Sívitas Akadémika (D
dosente, funsionáriu no estudante) Universidade nian, hato’o omenajen ikus ba Saudozu Ministro da Justiça Dr. Amândio de Sá Benevides iha nia Rezidénsia Kampung Baru, Díli (22/01).
Matebian Dr. Amândio de Sá Benevides remata ona nia peregrinasaun iha mundu, iha sábadu loron 20 fulan janeiru ho idade 60 (16 Jullu 1964-20 Janeiru 2024).
#TimorLeste #UNTL #MinistériodaJustiça 22 Janeiru 2024
Média UNTL 📝: Denilson Amandio Barros
Foto 📷: Denilson Amandio Barros
- Detalhes
- Escrito por Mateus Goncalves
- Visualizações: 612
Universidade Nacional Timor Lorosa’e (UNTL) nia Visereitór Asuntu Akadémiku no Garantia Kualidade (VRAAGK), Profesór Dr. Samuel Venâncio de Sousa Freitas, iha Kampus Sentral, Díli (17/01) hateten universidade preparadu hodi simu estudante foun 2024 bazeia ba proposta ne’ebé submete ba Ministériu Ensinu Superior Siénsia no Kultura (MESSK).
“Vaga ne’ebé ita fó ba Komisaun Asesu Ensinu Superiór (KAES) bazeia ba pedidu no informasaun sira ne’ebé rekolla husi kada fakuldade sira ne’ebé hato’o mai, tuir tarjetu kada área ne’ebé oferese, tanba ne’e parte universidade preparadu ho kondisaun fasilidade no rekursu hotu hodi simu estudante foun ba tinan akadémiku 2024”, dehan Visereitór.
Visereitór hatutan, vaga ne’ebé atu simu estudante foun hamutuk (4.720) bazeia ba proposta ne’ebé haruka ba MESSK no dadus ne’e deklarasaun husi diretór departamentu sira ba kada kursu hodi tetu ligadu mós infraestrutura no rekursu umanu ne’ebé bele akumula estudante sira tuir universidade nia kondisaun.
#TimorLeste #UNTL #VRAAGQ #KAES 18 Janeiru 2024
Média UNTL 📝: Eugenia de Jesus Guterres
Foto 📷: Altur Ramos
- Detalhes
- Escrito por Mateus Goncalves
- Visualizações: 342
Universidade Nacional Timor Lorosa'e (UNTL), liuhusi Faculdade de Engenharia Ciência e Tecnologia (FECT), nia Vise-Dekanu ba Asuntu Kooperasaun no Peskiza Profesór Domingos de Sousa Freitas, iha Kampus FECT Hera, Díli (12-02) hateten, sira halo ona estudu iha Munisípiu (Ainaro, Baucau no Viqueque), hodi identifika fontes enerjia hidrika iha Timor-Leste.
"Peskiza ne'e ita hala’o ho objetivu (1) atu identifika fontes enerjia hidrika iha Timor-Leste, investimentu ne’ebé introdús husi IV Governu liuhusi Sekretáriu Estadu Politika Enerjétika no laiha kontinuasaun, (2) identifika lakuna ne’ebé implika ba projetu enerjia hibrika iha Timor-Leste ne’ebé paradu, (3) deskobre rekomendasaun ne’ebé sientífiku, hodi hato’o ba Governu”, hatutan.
Profesór ne'e hatutan, peskiza refere aplika métodu estudu kazu iha área ne’ebé sai tarjetu hanesan, Ainaro, Suku Hato-Builico, Viqueque, Suku Loihuno, Baucau, Suku Gariwai no Suku Seiçal. Iha 2023 ho duransaun fulan tolu liuhusi observasaun, dokumentasaun no entrevista ho autoridade lokál inklui komunidade iha lokál.
“Iha lokál ne’ebé peskizadór sira rekolla dadus no analiza, deskobre katak Timor-Leste iha poténsia bo’ot hodi introdús tipu fontes enerjia renovaveis oinoin hanesan fontes enerjia solar, anin, jeothermal, biomasa, ondas, no hidrika. Partikularmente fontes enerjia hidrika iha potensia liu kompara ho enerjia sira seluk ho kapasidade 352MW, infelizmente implementa ona maibé dadaun planta hidrika hirak ne’e abandonadu”, dehan Vise-Dekanu.
Peskizadór ne’e mós akresenta katak bazeia ba dadus ne’ebé hetan rezulta rekomendasaun sientífiku sira ba parte governu atu reabilita planta hidrika sira ne’ebé identifikadu paradu bele funsiona hikas hodi prodús enerjia sustentável. Presiza halo tan estudu asesmentu no dezenvolve fontes enerjia hidrika husi rekursu mota sira liuliu konstrui barajen hodi preserva udan been ba utilizasaun multifunsaun hanesan bee moos, irigasaun no enerjia hidrika.
“Hafoin hala’o tiha estudu kampu ida-nee planu estudu ba futuru presiza: (1) halo avaliasaun ba poténsia basia-mota iha Seiçal utiliza software simulasaun numerical weather model, (2) halo avaliasaun ba kuantidade bee-mota iha basia-mota Seiçal, (3) halo avaliasaun ba planta turbina hidrika uzu ba enerjia eletrisidade iha Timor-Leste”, rekomenda.
Responsável peskiza ne’e mós rekoñese katak, enfrenta mós dezafiu iha prosesu foti dadus iha terenu hanesan infraestrutura liuliu asesu ba estrada ne’ebé aat asesu ba dadus. Maibé esforsu hodi hetan rezultadu ne’ebé bele kontribui ba dezenvolvimentu enerjia alternativa fontes hidrika iha Timor-Leste.
Peskiza refere envolve husi dosente sira iha Departamentu 5 fakuldade nian no hetan apoiu husi JICA ho UNTL. Enkuantu rezultadu peskiza nian publika ona iha Timorese Academic Journal of Science and Technology (TAJST) volume 6, no Timor-Leste Studies Association (TLA).
#TimorLeste #UNTL #FECT #JICA 22 Janeiru 2024
Média UNTL 📝: Denilson Amandio Barros
Foto 📷: Domingos Amaral, Agustinho da Cruz e Silva & Arkivu FECT
- Detalhes
- Escrito por Mateus Goncalves
- Visualizações: 386
Universidade Nacional Timor Lorosa’e (UNTL) liuhusi nia Visereitór Asuntu Akadémiku no Garantia Kualidade, Profesór Samuel Venâncio de Sousa Freitas, hala’o enkontru ho estrutura husi fakuldade, iha Sala-Videokonferénsia UNTL nian, Díli (18/01), hodi deskuti kona-ba Kurríkulu Akadémiku.
Objetivu husi enkontru ne’e, deskuti kona-ba Kurríkulu Akadémiku nian, hadia jestaun ba kualidade akadémiku iha prosesu ensinu aprendisajen no atu prepara ba avaliasaun ANAAA nian ba Departamentu sira iha 2024.
Revizaun kurríkulu ne’e ba fakuldade sira mak hanesan, Faculdade de Economia e Gestão, Faculdade de Direito, Faculdade de Filosofia e Ciência Humana, Faculdade de Ciências Exatas no Faculdade de Turismo Artes e Indústrias Criativas Culturais.
Iha okaziaun ne’e mós distribui sertifikadu ba departamentu sira ne’ebé hetan ona avalisaun husi ANAAA iha tinan kotuk (2023).
Enkontru ne'e partisipa husi Diretór Diresaun Nasional Avaliasaun, Sr. Agustinho Quelo, Diretór Nasional Atendimentu Estudante, Sr. Rui Loco Pires, Diretora Disiplina Tranversais, Profesora Zelina Roteiro, Dekanu Faculdade de Economia e Gestão Profesór Filipi Mendes Pereira, Vise-Dekanu, Diretór Departamentu, Dosente no Asistente Tekniku sira.
#TimorLeste #UNTL #VRAAGQ #DNAA #DNAE 18 Janeiru 2024
Média UNTL 📝: Domingos Amaral
Foto 📷: Denilson A. Barros