Universidade Nacional Timor Lorosa’e (UNTL) nia Coordenador do Curso Mestrado em Educação Profesor Vicente Paulino halo abertura ba semináriu ho tema ‘’Educaçao e Transformação Social’’ iha auditoriu Arkivu Museu Resisténsia Timorense, Díli (24/01).
“Objetivu prinsipál husi semináriu ne’e mak atu estudante mestradu sira aprezenta sira-nia projetu sientífiku ba peskiza hodi habelar koñesementu hamutuk ho profesór sira, inklui ba públiku-alvu sira no atu hato’o mós hanoin ho solusaun hamutuk ba ita-nia sosiadade emjeral katak, ita-nia sistema edukasaun ne’e sei iha problema ne’ebé presiza iha solusaun alternativu’’, dehan Profesór Vicente.
Iha fatin hanesan, Estudante Mestrada iha área Matemática, Gradiana Esperansa Sarmento sente orgullu tebes hodi kontinua estudu, tanba nu’udar joven hakarak aprende liután atu bele mellora edukasaun iha Timor-Leste.
‘’Ha’u nia títulu ne’ebé foti mak analiza difikuldade estudante sira-nian iha área Matemática iha Timor-Leste no dadun ne’e ha’u hakerek hela projetu traballu sientífiku antes ba halo peskiza iha baze’’, dehan Gradiana.
Nia mós hatutan objetivu foti tema ne’e, tanba observa alunu sira hetan difikuldade iha materia Matemática liuliu iha Trigonometria ho nune’e mak hakarak peskiza atu bele deskobre loloos problema siada mak estudante sira hasoru.
Semináriu ne’e organiza husi Centro Estudo Cultura e Arte (CECA) no servisu hamutuk Programa Pos-Graduasaun Peskiza (PPGP), FEAH, Universidade Federal Santa Catarina, no CAPES (A Coordenação de Aperfeiçoamento de Pessoal de Nível Superior).
#TimorLeste #UNTL #CECA #PPGP 24 Janeiru 2024
Média UNTL 📝: Laurindo da Cruz Gomes
Foto 📷: Laurindo da Cruz Gomes