Universidade Nacional Timor Lorosa'e (UNTL), liuhusi Faculdade de Ciências Sociais nia Departamento de Inclusão Comunitária Social (DICS) preparadu hodi simu estudante foun ba ema ho nesesidade espesiál no difisiente (edukasaun Inkluziva) tinan 2024 bazeia ba vaga ne’ebé departamentu propoin ona.
Diretora Departamento de Inclusão Comunitária Social (DICS) Profesora Cecilia Pereira iha Kampus Kaikoli, Díli (15/01) hatete, proparasaun ba simu estudante foun, departamentu ne’e la’os ba estudante ho defisiénsia de’it, maibé atu promove inkluzaun sosial ka edukasaun inkluzivu ba sidadaun hotu iha Timor-Leste.
“Ami promove edukasaun inkluzaun, maibé husi departamentu ida-ne’e koko oinsa hamutuk ho organizasaun sira ne’ebé servisu ba ema ho defisiénsia atu halo advokasia ba Governu liuliu ba iha universidade iha alokasaun fasilidade no kondisaun hodi promove edukasaun inkluzivu ne’e ba ema hotu, no oinsa atu hasa’e kapasidade ema ho defisiénsia para bele iha koñesimentu di’ak”, dehan nia.
Profesora ne’e esplika, parte departamentu preparadu ona iha ensinu aprendizajen nian bazeia ba proposta ne’ebé propoin ona ba universidade tuir kondisaun ne’ebé mak iha.
“Ami-nia preprasaun liuliu ba ensinu aprendizajen ne’e tuir proposta ne’ebé hato'o ona, tanba ita laiha programa letra braille, maibé durante ne’e ami servisu hamtuk ho East Timor Blind Union (ETBU) ho Asosiasaun Defisiénsia Timor-Leste (ADTL) hodi sira ne’ebé ho problema matan, materia fó de’it ba sira lori ba imprimi letra braille iha ADTL, nune’e husu ba universidade atu aumenta tan rekursu umanu ba tradutór letra lingua jestual no ekipamentu sira liga ho ensinu nian ba ema ho defisiénsia”, nia esplika.
Iha fatin seluk, Visereitór Asuntu Akadémiku no Garantia Kualidade(VRAGQ), Profesór Samuel Venâncio de Sousa Freitas hatete, preparasaun iha nível infraestrutura liuliu asesibilidade estudante sira-nian ho defisiénsia tuir kondisaun ne’ebé mak iha.
“Preparasaun hanesan nafatin, nivel infraestrutura ita prezisa haree oinsa estudante sira bele asesu, normalmente kursu hotu atu simu estudante foun presiza iha ona planu dezenvolvimentu, tanba iha universidade kada departamentu propoin nia vaga rasik bazeia ba rekursu no infraestrutura sira, tanba universidade aborda nesesidade sira tuir kapasidade orsamental”, dehan Prof. Samuel.
#TimorLeste #UNTL #FCS #DICS 24 Janeiru 2024
Média UNTL 📝: Altur Ramos
Foto 📷: Eugenia de Jesus