- Detalhes
- Escrito por Mateus Goncalves
- Visualizações: 708
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, hamutuk ho sívitas akadémika tomak presta omenajen ikus ba matebian Prezidente Konsellu Jerál (PCG) UNTL nian, Eng. João Baptista Fernandes Alves, iha nia rezidénsia Palapaço, Díli (08/02).
Iha omenajen ikus ne’e, Reitór lori sívitas akadémika universidade nian, hato'o sentidu kondolénsia ba família liuliu ba matebian ne'ebé durante tinan rua dedika-an ona ba universidade hanesan Prezidente Konsellu Jerál .
"Ami UNTL senti lakon figura di'ak, ne'ebé kontribui luta ba nasaun Timor-Leste no ativu iha membru sosiedade, durante tinan rua resin asume knaar nu’udar Prezidente Konsellu Jerál UNTL nian.
Ha’u konvida ita hotu hamutuk reza ba Maromak haraik perdaun ba matebian bele deskansa ho hamatek iha Reiñu Lalehan ", dehan Reitór.
Matebian João Baptista Fernandes Alves, moris iha loron 05 Fevereiru 1963 no fila hikas ba Aman-Maromak Nia kadunan santu hodi deskansa ho pás iha 7 Fevereiru 2024, ho idade 61 (1963-2024). No hakotu nia jornada ikus ho pozisaun hanesan Prezidente Konsellu Jerál UNTL.
#TimorLeste #UNTL #KonselluJerál 08 Fevereiru 2024
Média UNTL 📝: Denilson Amandio Barros
Foto 📷: Domingos Amaral
- Detalhes
- Escrito por Mateus Goncalves
- Visualizações: 603
Universidade Nacional Timor Lorosa’e (UNTL) nia sívitas akadémika tomak, hato’o kondolénsia profunda ba família Matebian PREZIDENTE KONSELLU JERAL UNTL Eng. João Baptista Fernandes Alves, ne’ebé Maromak bolu hikas ona ba Na’i Nia kadunan santu.
- Detalhes
- Escrito por Mateus Goncalves
- Visualizações: 737
Universidade Nacional Timor Lorosa’e (UNTL) nia Diretora das Unidades Curriculares Transversais (DUCT) Profesora Zelina Filomena José Roteiro, iha Kampus Sentral UNTL nian, Díli (6/02) hatete, prioridade ba 2024 mak sei halo uniformizasaun ba silabus matéria transversais hodi responde ba padraun kurríkulu nasionál.
‘’Planu prioridade husi ne’e mak halo uniformizasaun ba silabus matéria sira, tanba ita haree ba implementasaun kurríkulu padraun nasionál, ne’ebé dadaun ne’e iha fakuldade balu implementa maibé maioria fakuldade barak seidauk implementa’’, dehan Diretora DUCT.
Profesora Zelina hatutan tan katak, disiplina transversais uniformiza bazeia ba kurríkulu ECTS (European Credit Transfer System) no kurríkulu padraun nasionál ne’ebé implementa ona iha fakuldade sira.
“Ita iha matéria transversais língua (língua Ingleza, Tetun, Portuguesa) mak presiza halo uniformizasaun ba unidade kurrikulár (Sílabus). Ami planu ba tinan ida-ne’e atu uniformiza silabus sei servisu hamutuk ho INL hodi haree ba Lingua tetun, FOCO haree ba Língua Portuguesa no língua Ingleza nian sei refere ba Centro de Língua Inglesa’’, dehan.
DUCT nia dosente hamutuk 23 mak destaka hotu iha fakuldade sira iha UNTL hodi hanorin disiplina transversais sira, no silabus sira ne’ebé uniformiza ona no prontu uza ba hanorin mak Edukasaun Sívika Direitus Humanos no Disiplina Empreendedorismu.
#TimorLeste #UNTL #DUCT 7 Fevereiru 2024
Média UNTL 📝: Laurindo da Cruz Gomes
Foto 📷: Eugenia De Jesus
- Detalhes
- Escrito por Mateus Goncalves
- Visualizações: 700
Universidade Nasional Timor Lorosa'e (UNTL) nia Faculdade Educação Artes e Humanidade (FEAH) nia Departamento de Língua Inglesa (DLI) partisipa iha formasaun kona-ba prosesu hakerek Kurikulu Vitae (CV) ho Língua Ingleza ne'ebé di'ak hodi kompete iha vaga husi ajénsia nasionál no internasionál sira.
Visedekanu ba Asuntu Kooperasaun no Peskiza nian, Profesór Fernando da Conceição, iha Sala-C-16, Liceu Díli (7/02), agradese ba UNDP, ne'ebé apoiu ona formasaun refere no importante ba estudante finalista sira, nune’e sira bele kompete iha vaga Ajénsia Internasional sira.
"Agradese apoiu husi UNDP, formasaun ne'e importante tebes hodi eleva estudante sira-nia kualidade iha públiku, tanba ami la hanorin sira kona-ba oinsá prepara CV no teste entrevista ho Inglés ne'ebé di'ak hodi aplika vaga iha Ajénsia Internasionál sira", dehan Visedekanu.
Project Maneger for Youth Employment and Entrepreneurship Skills, (YEES), Mr. Hunjai Lee hatete, programa Formasaun no Akonsellamentu Kareira nian ne'e hola parte iha projetu YEES-UNDP nian hodi apoia joven sira.
"Programa ne’e hola parte iha projetu YEES, husi UNDP no servisu hamutuk ho instituisaun relevante sira hanesan SEFOPE no seluk tan, ho objetivu atu tulun estudante finalista sira iha área Inglés, nune'e sira bele prepara an ba aplika vaga tuir prosesu sira hanesan, prepara Kurikulu Vitae, entrevista no bele ba servisu iha ajénsia internasional sira", dehan Mr. Hunjai.
Tuir formanda Angelina dos Santos da Silva katak, formasaun ne’e importante tebes, tanba bele aprende kona-ba asesmentu liuliu koñese an rasik no atu hatur didiak paisaun ba iha servisu inklui oinsá hakerek CV ho di’ak.
“Ha’u kontente tebes partisipa iha formasaun ida ne’e, tanba bele aprende kona-ba asesmentu sira liuliu koñese an rasik hodi hatúr didiak ita-nia paisaun ba servisu professionál iha instituisaun ka ajensia ruma no prepara CV ho lian Inglés ne’ebé di’ak” dehan Estudante Angelina.
Formasaun ne'e realiza durante loron tolu (7-9) ba estudante finalista sira hamutuk nain tolu-nulu (30).
#TimorLeste #UNTL #FEAH #UNDP 7 Fevereiru 2024
Média UNTL 📝: Leonia de A. da Costa
Foto 📷: Domingo Amaral
- Detalhes
- Escrito por Mateus Goncalves
- Visualizações: 711
Universidade Nacional Timor Lorosa'e (UNTL), nia Magnífiku Reitór Profesór, dr. João Soares Martins, MPH, Ph.D, hamutuk ho Xefia sira, diskuti preparasaun ba simu estudante foun tinan 2024 nian, iha Sala-Videokonferénsia UNTL nian, Díli (7/02).
Enkontru ne'e ho objetivu, atu diskute kona-ba preparasaun universidade nian hodi simu estudante foun tinan 2024. Nune'e bele evita ba fallansu sira ne'ebé akontese iha tinan sira liubá, no diskusaun ne'e mós foku ba mekanizmu sira hodi bele la'o tuir regra inskrisaun nian tuir oráriu ne’ebé fó-sai ona.
Aleinde ne’e partilla mós ba estrutura fakuldade sira relasiona ho prosesu aprendisajen liuliu atendimentu estudante sira.
Partisipa iha enkontru ne'e, Visereitór, Proreitór, Dekanu, Vise-Dekanu, Dosente sira.
#TimorLeste #UNTL 08 Fevereiru 2024
Média UNTL 📝: Denilson Amandio Barros
Foto 📷: Denilson Amandio Barros