- Detalhes
- Escrito por Mateus Goncalves
- Visualizações: 1096
Universidade Nacional Timor
#TimorLeste #UNTL 5 Agostu 2020
Lorosa’e (UNTL), liuhusi Fakuldade Siénsia Sosiál (FSS) nia Departamentu Dezenvolvimentu Komunitáriu (DK), organiza espozisaun kulináriu tradisionál kada tinan hodi promove kultura no aplika estudante sira-nia aprendizajen teoria iha prátika.
“Atividade kulinária ida ne’e hanesan aktividade rutina ne’ebé sempre halo kada tinan, no hola parte iha prátika ba estudante sira departamentu DK nian, liuhusi espozisaun hodi promove ita-nia modelu hahan tradisionál ne’ebé halo husi estudante sira rasik”, hateten Vise-Dekanu Asuntu Akadémika, Profesór Januario de Correia, iha Kampus Kaikoli UNTL nian, Díli (4-08).
Profesór Januario hatutan tan katak, liuhusi espozisaun ne’e, bele enkoraja estudante sira hodi lidera no organiza rasik iha atividade pratika ida ne’e nomós identifika rekursu kona-ba materiál lokál no hahan lokal ne’ebé bei’ala sira uza hodi promove nafatin.
Entretantu, Andre Xavier, nu’udar praticante, hateten katak atividade ne’ebé sira hala’o liga ho materia ka disiplina Arte Kulturál nian, atu promove fila fali poténsia kulturál sira ne’ebé bei’ala sira uza iha tempu uluk nian.
“Materiál tradisionál sira maka hanesan bikan, kanuru, sanan-rai no ai-han lokal, ne’ebé ita-nia bei’ala sira konsumu lorloron iha sira nia nesesidade. Iha mós benefísiu husi atividade ne’e, aplika teoria ne’ebé maka ami aprende durante aula, atu eleva koñesimentu, nomós hetan avaliasaun husi profesór materia nian no ba oin ami bele aplika iha sosiedade”, dehan Xavier.
Estudante Xavier observa katak ohin loron modernu ona, buat hotu importadu maibé hanesan timoroan labele haluhan kultura ne’ebé iha nanis no promove nafatin liuhusi atividade espozisaun sira.
Espozisaun refere estudante sira uza materiál lokál mak hanesan, au, nu’u-kakun, sanan-rai, bikan-fatuk, ahi-kose, ahi-sunu, inklui hahan lokal hanesan lakeru-da’an, fehuk, talas, aifarina, tukir-etu, ne’ebé estudante sira rasik mak prepara.
Média UNTL 📝: Jacob Pinto Guterres (estajiáriu)
Foto 📷: Arkivu DK-FSS
- Detalhes
- Escrito por Mateus Goncalves
- Visualizações: 1413
#TimorLeste #UNTL #IGE 4 Agostu 2020
Universidade Nacional Timor Lorosa’e (UNTL) nia Magnífiku Reitór, Profesór Doutór Francisco Miguel Martins, apresia apoiu Institutu Jestaun Ekipamentu (IGE) nian hodi asegura drenajen no barreira ba Laboratóriu Fakuldade Agrikultura nian, iha Hera-Díli, liuhusi oferese sertifikadu iha ámbitu serimónia isar bandeira ba semana dahuluk fulan agostu nian (03/08) iha resintu Fakuldade Ekonomia i Jestaun (FEJ) UNTL.
Magnífiku Reitór sente orgullu no agradese ba Prezidente IGE nian, Enjeñeiru José Luis de Carvalho, ne’ebé konsege halo drenajen no barreira hodi satan Fakuldade Agrikultura nia laboratóriu Hera.
“Apoiu husi IGE konsege halo ona barreira ne’ebé sei ajuda proteje laboratóriu husi inundasaun no dezastre naturais”, agradese.
Iha entrevista ho prezidente IGE nian, Enjeñeiru José Luis de Carvalho agradese ba UNTL tanba dahuluk sira hetan apresiasaun ho sertifikadu.
“Hakarak agradese ba UNTL tanba bele apresia ami-nia servisu hanesan mós instituisaun públiku ida, ami espera katak ba futuru koperasaun diak liután atu apoiu malu”, tenik prezidente IGE.
Sertifikadu ne’e oferese husi Magnífiku Reitór Profesór Doutór Francisco Miguel Martins ne’ebé partisipa husi Proreitór, Dekanu, dosente, estudante, funsionáriu no konvidadu sira.
Média UNTL 📝: Agostinho da Cruz e Silva
Foto h📷: Agostinho da Cruz e Silva; Arkivu Dep.Logistika-UNTL.
- Detalhes
- Escrito por Mateus Goncalves
- Visualizações: 2290
#TimorLeste #UNTL 4 Agostu 2020
Universidade Nacional Timor Lorosa’e (UNTL) hala’o atividade Isar-Bandeira kada fulan, iha loron segunda dahuluk nian, hodi fundamenta nasionalizmu no patriotizmu sivitas akadémika (estudante, dosente no funsionáriu) sira universidade nasionál nian, iha kampus Ekonomia i Jestaun (FEJ) UNTL nian (03/08).
Iha serimónia ne’e, prezide husi Magnífiku Reitór UNTL nian, Profesór Doutór Francisco Miguel Martins no partisipa husi Proreitór, Dekanu, Diretór-Jerál, Diretór nasionál, estudante, dosente no funsionáriu sira.
Iha nia diskursu, Reitór UNTL hateten katak universidade nasionál atualmente tama ona ba inísiu semestre pár 2020 nian, tanba ne’e Proreitória ba Asuntu Akadémiku halo ona ajustamentu ba kalendáriu akadémika ne’ebé aprezenta ona ba Konsellu Jestaun no hetan aprovasaun iha semana kotuk.
“Dezde 29 Juñu, ita hahú fila mai kampus hodi rekupera aula bazeia ba sílabus aula nian. Ita-nia aula iha semana ne’e tama ona iha avaliasaun hafoin rekuperasaun durante fulan Jullu nia laran, no dosente hotu konsege halo duni idaidak nia funsaun, tanba ne’e iha semestre oin mai atividade hotu sei ajusta iha kalendáriu inklui atividade letiva, estájiu sosiál no estájiu profisionál sira”, hatutan Reitór.
Serimónia isar-bandeira fulan agostu nian Magnífiku Reitór orgullu ho ekipa koru, korpu-isar-bandeira, komandante-parada, ne’ebé responsável husi Fakuldade Ekonomia I Jestaun (FEJ) nian.
Média UNTL : Miguel Gonçalves
Foto 📷: Miguel Gonçalves, Agostinho da Cruz e Silva
- Detalhes
- Escrito por Mateus Goncalves
- Visualizações: 1177
#TimorLeste #UNTL 4 Agostu 2020
Universidade Nacional Timor Lorosa’e (UNTL), nia funsionáriu sira partisipa workshop ne’ebé organiza husi Komisaun Funsaun Públika (KFP), iha Auditóriu Fakuldade Enjeñaria Siénsia no Teknolojia UNTL nian Hera, Díli, kona-ba Diseminasaun ba Sistema Informasaun Jestaun Administrasaun Publika (SIGAP).
Diretór Nacional Rekursu Umanu (DNRU)-UNTL nian, Sr. Agustinho Quelo, hateten katak diseminasaun ne’e kona-ba sistema SIGAP ne’ebé foin kria husi KFP atu fasilita funsionáriu atu asesu ba sira-nia dadus.
“Diseminasaun ne’ebé foin lalais halo husi KFP ne’e atu fahe informasaun relasiona ho sistema SIGAP nian, ne’ebe sentraliza dadus hotu funsionáriu nian iha sitema refere, atu nune’e pesoál hotu bele asesu diretu ba sira nia informasaun iha baze dadus”, tenik Diretór DNRU.
Diretór Quelo hatutan tan katak liuhusi sistema SIGAP ne’e, karik funsionáriu ruma presiza sira nia dadus la presiza ba husu iha edifísiu KFP nian maibé bele asesu diretu liuhusi liña internet. Karik balun nia dadus seidauk kompletu parte DNRU sei kolabora ho KFP hodi kria formulariu ida ba funsionáriu atu fasilita hodi kompleta sira nia dadus.
“Antes ne’e bainhira funsionáriu ida presiza nia dadus tenki ba KFP mak foin bele asesu, agora muda ona ba SIGAP entaun iha ne’ebé de’it ita bele asesu liuhusi Internet, liga ba dadus foin lalais apresenta, dadus iha koluna balun mak seidauk kompletu tanba ne’e mak parte DNRU sei kolabora nafatin ho KFP hodi halo kompletu” hatutan atual Diretór DNRU-UNTL
Diretór ne’e akresenta liutan bainhira diseminasaun no dadus kompleta ona parte Rekursu Umanu sei kolabora nafatin ho KFP hodi distribui seña (pasword) no kartaun identidade (ID) ba funsionáriu ida-ida hodi asesu.
Média UNTL 📝: Agostinho da Cruz e Silva
Foto 📷: Moises do Rego
- Detalhes
- Escrito por Mateus Goncalves
- Visualizações: 4587
#TimorLeste #UNTL #ANAAA 17 Jullu 2020
Magnífiku Reitór Universidade Nacional Timor Lorosa’e (UNTL), Profesór Doutór Francisco Miguel Martins, partisipa iha lansamentu (Workshop) ne’ebé realiza husi Ajénsia Nasionál ba Avaliasaun no Akreditasaun Akadémika (ANAAA) ho tema “Reforsa Sistema Garante Kualidade Ensinu Superiór iha Timor-Leste” no iha sesaun hanesan ekipa ANAAA nian aprezenta rezultadu avaliasaun nian, iha Salaun “Ian Martin”, INFORDEPE, Balide, Díli (16/07).
Reitór UNTL nian hateten katak rekomendasaun sira ne’ebé ekipa ANAAA hato’o nu’udar dezafiu, nune’e presiza mellora liután kualidade instituisaun nian iha aspetu hotu-hotu.
“Rezultadu avaliasaun husi ekipa avaliadór ANAAA nian, ita simu saida de’it liuliu ita-nia dezafiu sira atu ita bele hadia iha futuru, nomós rekomendasaun ne’ebé sujere, atu mellora liután kualidade institusionál nian”, tenik Reitór.
Magnífiku Reitór mós enkoraja nia estrutura tomak universidade nasionál nian atu kontinua konsentra iha planu atu hatan ba rekomendasaun hirak ne’ebé ANAAA hato’o.
Iha fatin hanesan, Diretór Ezekutivu ANAAA nian, Profesór Doutór Edmundo Viegas, hateten katak parte ANAAA nian konvida Reitór hotu husi Universidade no Institutu sira atu aprezenta rezultadu avaliasaun ANAAA nian ne’ebé ekipa halo ona.
“Pontu lima ne’ebé parte ANAAA sujere ba instituisaun ensinu superiór sira, atu eleva liután kualidade hodi priense kritériu akreditasaun no avaliasaun nian hanesan: korpu-dosente, estrutura, finansa, fasilidade no propriedade sira, i rekomendasaun ikus liu mak peskiza”, rekomenda Diretór Viegas.
Entretantu husi aprezentasaun ANAAA nian, rezultadu demostra katak UNTL nia departamenetu hamutuk ruanulu resin sia (29) mak avalia ona, kompostu husi departamentu sia (9) ho klasifikasaun B, departamentu sanulu resin (19) hetan klasifikasaun C no departamentu ida la akreditadu.
Partisipa iha eventu refere Magnifiku Reitór UNTL, Professór Doutór Francisco Miguel Martins, Proreitór Garantia Kualidade Interna, Profesór Marcos António Amaral , Diretór Nasional ba Sertifikasaun, Profesór Eurico Celestino dos Reis Araújo ho nia ekipa, Ministru Ensinu Superiór, Siénsia no Kultura (MESSK), S. E Longuinho dos Santos, ho nia funsionáriu sira, estrutura husi Universidade no Institutu sira no Prezidente Konsellu Diretivu ANAAA, Profesór Doutór Samuel Freitas, Diretór Ezekutivu ANAAA, Profesór Doutór Edmundo Viegas, no funsionáriu sira.
Média UNTL https://static.xx.fbcdn.net/images/emoji.php/v9/tcc/1/16/1f4dd.png?_nc_eui2=AeHNRnu6O-mFGH2F8JmiGizQVsm2fAeLPjtWybZ8B4s-OxtsxO76r825ZcBhjIq7ri8")">📝: Agostinho da Cruz
Foto https://static.xx.fbcdn.net/images/emoji.php/v9/t5d/1/16/1f4f7.png?_nc_eui2=AeFv_Nlsa062yl4GWWWN2YPqUd1eRImZxm5R3V5EiZnGbprtGEHukJVJ0yzjmKnUC38")">📷: Agostinho da Cruz & Francisco Colo