Comment

Detalhes
Visualizações: 664
Universidade Nacional Timor Lorosa’e (UNTL) nia Fakuldade Ekonomia no Jestaun (FEG), liuhusi Klibur Alumni Fakuldade Ekonomia no Jestaun (KAFEG), servisu hamutuk ho Ministériu Turizmu, Komérsiu no Indústria (MTCI), fó apoiu foos saka 87 no supermi kaixa 87 ba universitáriu sira ne’ebé hela iha alojamentu (kos).
 
Iha atividade ne’ebé hala’o Iha Resintu Canto Resende FEG (08/04), Magnífiku Reitór UNTL, Profesór dr. João Soares Martins MPH, PH.D, agradese ba inisiativa husi KAFEG nian, hodi buka apoiu ba estudante hirak ne’ebé presiza tulun durante Serka-Sanitária.
 
“Agradese no louva tebes alumni sira husi FEG ba inisiativa ida ne’e, hodi tulun ita-nia estudante sira ne’ebé dadaun presiza ajuda ba hahan durante tempu Serka-Sanitária nian”, tenik Reitór.
 
Iha fatin hanesan, Prezidente KAFEG nian, Sr. Elvino Alves Correia, hateten katak apoiu ne’ebé sira oferese hanesan, foos saka 87 no supermi hamutuk kaixa 87.
 
“Ita ohin distribui foos saka 87 no supermi kaixa 87 ba estudante sira tuir lista ne’ebé ita hato’o ba MTCI, tanba sira difikuldade ba ai-han durante implementasaun Serka-Sanitária (SS) iha munisípiu Díli”, tenik Elvino.
 
Alumni FEG ne’e mós hatutan depois distribui tiha, iha tan estudante balun ne’ebé seidauk hetan apoiu, no sira rekolla hela lista hodi buka atu apoiu ba sira, iha faze tuir mai. Estudantes ne’ebé benefísia ba ajudus ne’e maoria husi UNTL, inklui balun husi universidade sira iha Díli laran.
 
Partisipa iha eventu refere, Ministru Turizmu, Komérsiu no Indústria, Profesór Dr. José Lucas do Carmo, Vise-Ministra Turizmu Komunitária no Kultural, Dra. Inácia da Conceição Teixeira, nomós funsionáriu husi MTCI, Dekanu FEJ Profesór Custodio Barata Ximenes, estudante sira no konvidadu sira.
 
Média UNTL 📝 : Agostinho da Cruz e Silva
Foto 📷 : Agostinho da Cruz e Silva

Comment

Detalhes
Visualizações: 3041
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins MPH, Ph.D, partisipa serimónia abertura vasinasaun ba COVID-19 iha Timor-Leste, ne’ebé realiza iha Bairo Formosa Dili, (7/04).
 
Iha abertura ne'e, Primeiru-Ministru VIII Governu Konstitusionál, Taur Matan Ruak, mak sai ema dahuluk ba simu vasinasaun COVOD-19, daruak mak Prezidente Parlamentu Nasionál, Dr Aniceto Guterres, datoluk Prezidenti Tribunal Rekursu, Dr. Deolindo dos Santos.
 
Vasinasaun ida ne'e ho objetivu atu hasa’e sistema imunidade ema nian hodi kontribui ba hamenus risku transmisaun COVID-19 nian husi ema ida ba ema seluk iha Timor-Leste.
 
Partisipa iha eventu ne'e membru Governu, membru Parlamentu Nasionál, korpu-diplomátiku, reprezentante sosiedade sivil, reprezentante husi ajénsia internasionál, korpu seguransa (PNTL ho F-FDTL), inklui konvidadu sira.
 
Média UNTL 📝 : Agostinho da Cruz e Silva
Foto 📷 : Agostinho da Cruz e Silva

Comment

Detalhes
Visualizações: 14707

Reitor reuniaun MESSK

#TimorLeste #UNTL #MESCC #COVID19 #COVID19TL 5 Abril 2021

Universidade Nacional Timor Lorosa’e (UNTL) nia Magnífiku Reitór, Profesór dr, João Soares Martins, MPH, Ph.D, partisipa iha reuniaun ne’ebé organiza husi Ministru Ensinu Superior, Siénsia no Kultura (MESSK), hodi diskute kona-ba apoiu ba estudante sira ne'ebé hakarak fila bá idaidak nia munisípiu.

Hafoin reuniaun iha salaun MESSK nian, Díli (03/04) Magnífiku Reitór iha nia entrevista hateten katak enkontru refere Ministru konvida lider sira universiade nian atu buka solusaun ba estudante sira ne’ebé hakarak fila idaidak nia munisípiu.

“Ministru preokupa loos tanba estudante barak hakarak fila ba sira-nia knua tanba ne’e mak ohin kovida ami mai hodi buka solusaun ba estudante sira-nia preokupasaun ne’e no Governu prontu atu fasilita estudante sira fila ba munisípiu”, tenik Reitór.

Reitór hatutan kona-ba asuntu refere parte UNTL nian sei halo reuniaun ho estrutura universidade nian hodi buka solusaun ba estudante sira.

Iha fatin hanesan MESSK, Dr. Longuinhos dos Santos, hateten rezultadu husi enkontru mak deside kalendáriu teste swab (swab test) ba estudante sira ne’ebé atu fila sira-nia munisípiu.

“Ohin ha’u ata konvida Magnífiku Reitór sira husi Universidade Públiku no Privada sira hodi diskute kona-ba prosesu ba estudante sira ne’ebé hakarak fila ba munisipiu, maka rezultadu ohin desidi kalendáriu, fatin ba teste swab, fasilita transporte ba estudante sira no bainhira fila hein desizaun (karta sirkular) ruma husi MESSK mak foin bele autoriza fila mai Díli”, tenik Ministru.

Governante ne’e mós hatutan estudante sira ne’ebé atu halo teste swab, bainhira sira hato’o pedidu husi atu fila ba munisípiu, no estudante sira ne’ebé sei rejistu liuhusi nia universidade ida-idak.

Partisipa iha reuniaun ne'e Reitór husi Univeridade sira no Institutu sira iha Díli laran, Diretora-Jerál Ministériu Ensinu Superior no konvidadu sira.

Média UNTL 📝 : Agostinho da Cruz e Silva
Foto 📷 : Agostinho da Cruz e Silva

Comment

Detalhes
Visualizações: 4473
Foto abertura ba Ano lerivo 2021 2
 
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, akompaña husi Prezidente Konsellu Jerál, Dr Aniceto Cardoso Barreto, Visereitór, Diretór, Dekanu no reprezentante estudante husi kada Fakuldade sira universidade nasionál nian hala’o abertura ba Tinan Letivu 2021 nian, liuhusi Live Streaming iha Auditóriu Liceu UNTL nian, Díli (8/4).
 
Iha diskursu abertura Magnífiku Reitór hateten katak, sesaun solene iha tinan akadémiku nian, nu’udar marku relevante iha vida akadémika UNTL nian.
 
“Loron ida ohin, ita reune no hamutuk iha fatin ne’e, renova komunidade akadémika ho ita-nia amigu sira ne’ebé infelizmente labele marka hotu prezensa tanba ita enfrenta hela Serka-Sanitária, no iha sentidu ne’e, ha’u-nia liafuan dahuluk dirije ba estudante hotu liuliu ba estudante foun sira no boas-vindas mai iha uma-UNTL”, hatutan Reitór.
 
Reitór mós hato’o ba estudante sira katak, hahú husi 8 Abril ne’e UNTL hanesan mós sira-nia uma-matenek nian hodi hala’o sira idaidak nia perkursu akadémiku no realizasaun ba sira-nia mehi iha área ne’ebé hili ona.
 
“Mai estuda iha UNTL la’ós fasil no la’ós difisil mós, maibé estrutura universidade nian, hamutuk ho dosente no funsionáriu hotu prontu atu serbí, nune’e universidade bele garante estudante hotu sei hetan kualidade di’ak no jestór ba imi-nia koñesimentu rasik hodi kontribui ba Timor-Leste”, tenik Reitór.
 
Iha abertura ne’e, Reitór informa mos katak atividade orientasaun akadémika ba estudante foun sei realiza bainhira situasaun permite no iha tempu badak tuir mai UNTL sei fo sai informasaun kona-ba atividade akadémika, liuliu aulas, ba estudante foun.
 
Iha fatin hanesan Visereitór Asuntu Akadémiku no Garantia Kualidade, Profesór Doutor Samuel Venâncio de Sousa Freitas, relata katak, husi estudante 5282 ne’ebé admitivu ba UNTL, no rejistadu hamutuk 4473 reprezenta (84.7%) no seidauk rejista hamutuk 809 reprezenta (15.3%).
“Dezde inísiu hahún ba impaktu husi COVID-19 ita konsege rejista ona estudante sira husi Fakuldade - Agrikultura 448 no seidauk rejistu 94, Enjeñaria Siénsia no Teknolojia 453 no seidauk rejistu 76, Edukasaun, Arte no Umanidade rejistadu 1102 no seidauk rejistu 202, Medisina no Siénsia Saúde rejistadu 652 no seidauk rejistu 31, Ekonomia no Jestaun rejistadu 713 no seidauk rejistu 155, Direitu rejistadu 152 no seidauk rejistu 19, Siénsia Sosiál rejistadu 751 no seidauk rejistu 174, Filozofia no Siénsia Umana 131 no seidauk rejistu 40, enkuantu Siénsia Ezata rejistadu 89 no seidauk rejistu 27”, dehan.
 
Eventu ne’e realiza tanba koordena husi Ekipa Reitoria, Visereitora ba Asuntu Estudantíl nian, Professora Eng.ª Lígia Tomás Correia, M.Sc (Ph.D. Cand.) ho nia Ekipa, Visereitór Asuntu Akadémiku no Garantia Kualidade, Profesór Doutor Samuel Venâncio de Sousa Freitas no nia Ekipa.
 
No konta mós ho apoiu tekniku husi Diretór Nasional Informasaun Teknologia, Sr Joanico Mendonça ho ekipa, Diretór Nasionál Atendimentu Estudantes, Sr. Rui Loco ho ekipa, Diresaun Nasionál Lojistika no Manutensaun no ekipa Telkomcel.
 
Média UNTL 📝: Miguel Gonçalves
Foto 📷: Denilson A. BarrosFoto abertura ba Ano lerivo 2021 1

Comment

Detalhes
Visualizações: 10197

Reitor Entrega Fps#TimorLeste #UNTL #VRAAGK #MESCC #MSSI #COVID19 #COVID19TL 5 Abril 2021
Universidade Nacional Timor Lorosa’e (UNTL) nia Magnífiku Reitór, Profesór dr, João Soares Martins, MPH, Ph.D, agradese ba Governu liuhusi Ministériu Solidariedade Sosiál no Inkluzaun (MSSI) ne’ebé servisu hamutuk ho Ministériu Ensinu Superiór, Siénsia no Kultura (MESSK), hodi apoia estudante sira ne’ebé hela iha alojamentu “kos”.

“Prontu tuir lista ne’ebé ita haruka, estudante rihun lima, sianulu resin haat (5.094), sira ne’ebé hela iha alojamentu, tanba ne’e lori naran universidade nian agradese ba Governu tan bele apoia ita-nia universitáriu sira durante Serka Sanitária iha Díli”, tenik Reitór iha Kampus Sentrál UNTL nian, Díli (3/4).

Iha fatin hanesan, Visereitór ba Asuntu Akadémiku no Garantia Kualidade (VAAGK), Profesór Doutór Samuel Venâncio de Sousa Freitas, husu ba estudante sira atu hakbesik ba Kampus Sentrál UNTL nian hodi simu, maibé idaidak tenki kumpri regra prevensaun COVID-19 nian ne’ebé vigora.

“Atu distribui importante estudante sira mai simu, no kontribui mós regra hanesan distansiamentu, uza máskara no seluk tan. Atu kontrola di’ak liután mak sei konfirma estrutura Fakuldade ho nia Departamentu sira atu organiza estudante sira bele mai simu sira-nia foos,”, tenik Profesór Samuel.

Visereitór ne’e mós informa ba estudante sira ne’ebé rejista ona naran bele hakbesik ba universidade hodi simu foos no ekipa preparadu atu fasilita sira tuir lista ne’ebé iha, hahú husi 3 abril.

Marka prezensa hodi simu foos ne’e Magnífiku Reitór ho nia estrutura , Diretora-Jerál Ensinu Superiór, Dra. Maria Filomena Lay Guterres, ekipa MSSI no pesoál lojístika universidade nasionál nian.

Média UNTL 📝 : Agostinho da Cruz e Silva
Foto 📷 : Mateus Gonçalves

Comment

  1. UNTL SIMU ONA LISTA ESTUDANTE NE’EBÉ HELA IHA “KOS” NA’IN 5157 HUSI FAKULDADE SIRA
  2. UNTL BA DAHULUK SIMU ONA APOIU HUSI MSSI BA ESTUDANTE NA’IN 30
  3. UNTL lakon ona Profesór Felix de Oliveira, ST. M. Egn
  4. UNTL-VAAGK SIMU ONA DADUS ESTUDANTE NE’EBÉ HELA IHA “KOS” NA’IN 2625