Detalhes

Escrito por Mateus Goncalves

Publicado em 21 abril 2021

Atualizado em 21 abril 2021

Visualizações: 2648

 

Universidade Nacional Timor Lorosa’e (UNTL), Fakuldade Edukasaun Arte no Umanidade (FEAH) nia Sívitas Akadémika (Estudante, Dosente no Funsionáriu) Departamentu Ensinu Kímika (DEK) simu vizita ikus husi matebian Profesór Doutór Cristovão Ramiro Belo, iha knua Liceu UNTL nian, Díli (20/04).

Iha vizita ne’e estrutura FEAH, ho estudante no alumni Departamentu Ensinu Kímika nian simu matebian ho matanbeen, tanba momentu ne’e mak ikus atu sira hasoru nia, ho kondisaun ne’ebé lahanesan hodi hato’o ho sentimentu, adeus no presta omenajen ikus ba matebian ne’ebé dedika ona ba UNTL durante sei moris.

Hafoin despedida ne’ebé hala’o, Matebian nia isin mate sei lori bá iha nia knua moris, munisípiu Viqueque, Postu-Administrativu Ossú, Suco Builale aldeia Uete Cai Ana.

Média UNTL 📝 : Agostinho da Cruz e Silva
Foto 📷 : Agostinho da Cruz e Silva

Comment

Detalhes

Escrito por Mateus Goncalves

Publicado em 20 abril 2021

Atualizado em 20 abril 2021

Visualizações: 5663

#TimorLeste #UNTL #FECT #FCE #COVID19 #COVID19TL 17 Abril 2021

Universidade Nacional Timor Lorosa’e (UNTL) nia estudante husi Fakuldade Siénsia Ezata (FCE) no Fakuldade Enjeñaria, Siénsia no Teknolojia (FEST), ne’ebé rejistadu atu fila ba idaidak nia munisípiu, simu ona teste swab husi ekipa Sentru Integradu Jestaun Krize (SIJK), iha Resintu Fakuldade Ekonomia no Jestaun (FEG-UNTL) nian, Díli (17/04).

Magnífiku Reitór, Profesór dr. João Soares Martins, MPH, Ph.D, hateten katak universidade nasionál, ba loron dahuluk nian, estudante husi fakuldade rua mak partisipa iha Teste Swab husi Ekipa Médiku SIJK nian, antes fila ba munisípiu.

 

“UNTL iha Fakuldade sia maibé ita hahú ohin (17-4) ho fakuldade Siénsia Ezata (FCE) ho Fakuldade Enjeñaria, Siénsia no Teknolojia (FEST), tanba sira-nia numeru ne’e natoon, no barak liu mak Fakuldade Edukasaun, Arte no Umanidade (FEAH)”, tenik Reitór.

 

Reitór mós hatutan katak bainhira remata swab, estudante sira hetan ona guia husi SIJK mak foin sira bele fila ba sira-nia munisípiu no transporte Governu sei fasilita.

 

Iha fatin hanesan, Koordenadora Pilar tolu (3), dra. Josefina Clarinha João, hateten sira-nia parte sei esforsu atu bele anúnsia hikas rezultadu iha loron tuir mai.

 

“Ami-nia parte sei esforsu atu anúnsia rezultadu, iha loron tuir mai atu bele fasilita ita-nia kolega sira ne’ebé hakarak atu fila sira-nia munisípiu”, tenik Koodenadora.

 

Doutora ne’e mós hatutan baibain sira atende ba swab nian kada loron bele atende totál ema na’in atus haat liu (400+).

 

Tuir dadus ne’ebé mak UNTL rekolla husi estudante sira ne’ebé halo pedidu hakarak fila ba munisipíu hamutuk 3.400, no ba loron dahuluk teste swab komesa ho fakuldade FCE ni FEST no sei remata iha 25-04-2021. Hafoin ekipa sei kontinua swab ba Fakuldade sira seluk:

18-04-2021 Faculdade de Direito Faculdade de Filosofia;

19-04-2021 Faculdade de Agricultura;

20-04-2021 Faculdade de Economia e Gestão;

21-04-2021 Faculdade de Medicina e Ciências da Saúde;

22-04-2021 Faculdade de Medicina e Ciências da Saúde;

23-04-2021 Faculdade de Educação, Artes e Humanidades;

24-04-2021 Faculdade de Educação, Artes e Humanidades;

25-04-2021 Faculdade de Ciências Sociais.

 

Média UNTL : Agostinho da Cruz e Silva

Foto : Agostinho da Cruz e Silva, Mateus Gonçalves

Comment

Detalhes

Escrito por Mateus Goncalves

Publicado em 20 abril 2021

Atualizado em 20 abril 2021

Visualizações: 3533

TimorLeste #UNTL #FEAH #GabCEDU 19 Abril

Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, hamutuk ho Sívitas Akadémika universidade nian, hato’o sentidu kondolénsia ba matebian Profesór Doutór Cristovão Ramiro Belo, iha nia residénsia Osindo, Díli, (19/04).

 

Hafoin presta tiha omenajen ba matebian, Reitór hateten estrutura ho sívitas tomak hamutuk ho família matebian lakon ema di’ak ida, ne’ebé durante ne’e dedika nia-an ba Universidade Nasionál.

 

“Ita hotu triste, tanba família hamutuk ho univesidade lakon ema di’ak ida ne’ebé dedika-an iha ho tempu kleur nomós hola parte hodi funda Departamentu Ensinu Kimíka to’o oras ne’e konsege prodús ona rekursu umanu barak hodi kontribui ba Timor-Leste”, tenik Reitór.

 

Reitór mós demonstra ho senti triste, tanba loloos ida ne’e la espera atu akontese maibé buat hotu Maromak nia planu, no ho orasaun hamutuk ho família dezeja katak matebian Profesór Cristovão bele hakmatek ho pás.

 

 

Iha omenajem ne’e, Reitór hetan akompaña husi Visereitór, Proreitór, Diretór-Jerál no Diretór Nasional, Dekanu, Vise-dekanu, Dosente no Estudante sira.

 

Biodata Matebian nian:

Cristovão Ramiro Belo, moris iha Munisípiu Viqueque, Postu-Administrativu Ossú, Suco Builale, aldeia Uete Cai Ana, iha loron 10 marsu 1964. Oan husi Elizio de Sousa no Petrolina do Rego Pereira, no oan ba datoluk husi maun alin ida no feton ida.

 

Edukasaun Formál:

Eskola Bázika Katólika Lai-Soro-Lai, iha tempu koloniál Portugés, hanesan 3a no 4a Classe. Husi tinan 1982, eskola Bázika Katólika do Reino de Venilale, iha tempu okupasaun Indonésia, eskola pre-sekundária iha Eskola Salesianu Don Bosco Fatumaca (1985), no kontinua eskola sekundária iha fatin henesan iha tinan 1988.

 

Iha tinan 1993, hasai kursu Baxarelatu iha área Edukasaun, Departamentu Kímika, Fakuldade Matemátika no Siénsia Ezata iha Universdiade Públika Nusa Cendana, Kupang-Indonesia. Kontinua nia Mestradu iha Fakuldade Farmasia husi Universidade do Porto (Portugal, 2010).

 

Edukasaun formál matebian nian konklui ho Doutoramentu iha área Kímika Superfisiál no Material husi Eskola Siénsia no Teknolojia iha Departamentu Kímika, Universidade Évora no remata iha Tinan 2019.

 

Kareira

Dosente iha UNTL-FEAH, Departamentu Ensinu Kímika komesa iha tinan 2000 to’o remata nia jornada iha mundu, aleinde ne’e, iha tinan 2010 hala’o mós knar hanesan dosente iha Programa Pós Graduasaun no Peskiza (PPGP-UNTL) iha area Edukasaun Ambiental, Kursu ne’e halo kooperasaun ho Capes (Brazil) ho Timor-Leste iha Fakuldade Edukasaun,Arte no Umanidade.

 

Esperiénsia no Kontribuisaun

Fundadór ba Departmentu Kímika iha tinan 2001 momentu hanesan asumi mós kargu Diretór Departamentu (2001-2005). hanesan Visedekanu I, iha Fakuldade Edukasaun, Arte no Umanidade (2005-2007).

 

Hafoin iha tinan 2011 to’o 2012 asumi hikas kargu hanesan Diretór Departamentu, iha tinan 2012 to’o 2013 hala’o knar hanesan Asesór inklui Komisaun Independente ba Ensinu Superiór iha Ministériu Edukasaun.

 

Antes matebian hakotu nia viajen iha mundu ne’e, asumi kargu hanesan Diretór-Jerál Gabinete Sertifikasaun Dosente (GabCEDU) iha Universidade Nacional Timor Lorosa’e iha tinan 2021.

 

Média UNTL : Agostinho da Cruz e Silva

Foto : Agostinho da Cruz e Silva

Comment

Detalhes

Escrito por Mateus Goncalves

Publicado em 20 abril 2021

Atualizado em 20 abril 2021

Visualizações: 5950

#TimorLeste #UNTL #MESSC #EmbaixadadePortugalemTimorLeste #COVID19 #COVID19TL 15 Abril 2021

Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins MPH, Ph.D, lori naran universidade nian, agradese ba Embaixadór Portugál nian iha Timor-Leste, S.E José Pedro Machado Vieira, ne’ebé ho esforsu umanitáriu apoiu estudante sira mak rezidente iha kos no afetadu husi inuandasaun.

 

“Lori naran universidade nian agradese ba Sr. Embaixadór ho apoiu ne’e, demonstra solidariedade ne’ebé profunda hanesan maun-alin no universidade sei tau hamutuk hodi fó ba estudante, ne’ebé solisita apoiu iha ámbitu Serka-Sanitária no vítima ba inundasaun nian iha Díli”, tenik Profesór Martins.

 

Iha fatin hanesan, Embaixadór Portugál nian iha Timor-Leste dezeja katak ho apoiu ne’ebé fó bele tulun UNTL nia estudante sira ne’ebé presiza apoiu imediatu relasiona ho implementasaun Serka-Sanitária no inundasaun ne’ebé foin akontese iha Díli.

 

“Apoiu ne’e hatudu Portugál nia prezensa iha timoroan sira-nia sorin hanesan maun-alin, sempre ajuda malun, no ha’u hanoin katak ho baze mós ba parseria ne’ebé la’o ona entre UNTL no Embiaxada Portugál iha Díli durante ne’e”, tenik.

 

Diretora-Jerál Jerál Ensinu Superiór no Siénsia, Dra Maria Filomena Lay Guterres, hateten katak lorin naran MESSC nian agradese ba apoiu refere ne’ebé importante tebes ba estudante sira mak presiza hela apoiu.

“Oferta ne’e hatudu ho signifikadu boot tebes, espesialmente ba estudante rezidente iha alojamentu (kos), tanba ne’e ha’u espera katak ba oin kooperasaun ne’e sei di’ak liután no forte, liuliu iha tempu ne’ebé defisil sira”, dehan reprezentante Ministériu Esinu Superiór Siénsia no Kultura (MESSC).

 

Konta ho foos saka 200 ne’e, ekipa UNTL simu mós apoiu husi instituisaun no pesoál balun hamutuk foos saka 79.

 

Ekipa UNTL sei nafatin atende no rejista pesoál no instituisaun ruma ne’ebé hakarak apoiu universidade nasionál nia estudante sira, bele lori ho forma (foos 25Kg), no tuir kbiit ne’ebé iha, mai iha Kampus Sentrál, iha sala-15 (Fakuldade Direitu).

 

Iha biban ne’e kontinua solisita mós ba dosente, funsionáriu inklui instituisaun no individu balun ne’ebé hakarak fó apoiu bele kanaliza mai iha Ekipa, no hafoin sei rekolla hamutuk hodi koordena ho estudante ka rezidente kos sira atu mai simu, hodi sira bele enfrenta Serka-Sanitária no Inundasaun ne’ebé akontese iha Díli 4 Abril liubá.

 

UNTL nia estudante ne’ebé hela iha “kos” no seidauk simu foos rejista ona rihun ida resin (1000+).

 

Partisipa iha eventu refere maka Visereitór, Proreitór, Dekanu, Pesoál Tékniku sira, Ekipa husi Embaixada nian inklui konvidadu sira.

 

Média UNTL : Miguel Gonçalves, Agostinho da Cruz e Silva

Foto : Agostinho da Cruz e Silva

Comment