#TimorLeste #UNTL #FECT #COVID19 #COVID19TL 19 Novembro 2021
Universidade Nacional Timor Lorosa'e (UNTL), nia Magnífiku Reitor, Profesór dr. João Soares Martins, MPH, Ph.D, lansa Planu Estratéjiku 2021-2030, no edisaun foun journal "Diálogos" nian, iha ámbitu komemorasaun Dies Natalis universidade nian ba dala XXI, iha Auditóriu FECT-Hera, Díli (17/11).
Iha lansamentu ne'e Magnífiku Reitór hateten, Planu Estratéjiku atu guia da atividade hotu ba planu tinan sanulu nian (10) husi 2021-2030, maibé planu ne'ebé atu halo tenke esforsu nomós aprezenta ba Governu para bele halo ajusta ba Planu Estratéjiku 2021 -2030.
“Liuhusi prosesu sira ne'e hotu ita ajusta Planu Estratéjiku ba tinan sanulu (10) nomós ita lansa ita-nia Planu Estratéjiku ida ne'e ba tinan sanulu oin mai 2021-2030”, tenik Reitor.
Iha fatin hanesan, Proreitor ba Asuntu Planeamentu, Monitorizasaun no Avaliasaun, Profesor José Nelson Salsinha, Ph.D, hateten iha Planu Estratéjiku ida ne'e kontempla programa estratéjiku sanulu (10) no sub programa haat nulu resin neen (46) nomós planu operasionál ne'ebé sei aprezenta iha fulan hirak tuir mai.
“Planu Estratéjiku ida ne'e bele guia ita iha momentu ida, ita bele atinji mehi ne'e iha futuru, no kontempla programa estratéjiku 10 no sup-programa 46, nomós planu operasionál ne'ebé sei aprezenta iha fulan hirak tuir mai”, tenik Proreitor. 
Aleinde ne'e universidade mós lansa edisaun foun journal "Diálogos" nian, ne'ebé dezenvolve husi Fakuldade Filozofia no Siénsia Umanu (FFCH). Tuir Vise-Dekanu FFCH, Professor Luís Maia, hateten, revista "Diálogos" iha misaun ba espasu koñesimentu atu partilla koñesimentu no reflexaun ba esperiénsia kestaun relevansia ba sosiedade nian.
“Tema husi revistaun anualmente ba konsellu editoriál, investigador, profesór nasionál no internasionál husi revista "Diálogos" publikasaun anuál, ne'ebé organiza husi FFCH, revista "Diálogos" hanesan rekezitu internasionál iha versaun rua versa imprime no online”, tenik Vise- Dekanu.
Partisipa iha lansamentu ne'e, Visereitór, Proreitór, Diretór-Jerál, Diretór Nasionál, Prezidente Komisaun Funsaun Públika, Profesór Faustino Cardoso Gomes, Ph.D., Embaixadór Brasil, Prezidente Konsellu Jerál UNTL, Eis Reitor sira, Dekanu, Vise-Dekanu , Dosente, Estudante, no Konvidadu sira.
Média UNTL 📝: Denilson A. Barros
Foto 📷: Agustinho da Cruz e Silva.