#TimorLeste #UNTL #FCS #DCS #COVID19 #COVID19TL 19 Novembru 2021
Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH, Ph.D, lansa livru rua ne’ebé hakerek husi Dosente Departamentu Komunikasaun Sosiál, Fakuldade Siénsias Sosiais (DCS-FCS), Profesora Dulce Martins da Silva, ho tópiku “The Role of Media to Prevent Martial Art related Conflicts in Timor-Leste, no Profesór Marcelino Ximenes Magno ho tópiku "A study of Jornalist Resistence Against Indonesia's New Order, 1994-1998”.
“Ita sente kontente tebes tanba ita konsege lansa tan livru rua husi Profesór Marcelino no Profesora Dulce, liuhusi Sentru Estudu Kultura no Arte (SEKA), agradese mós tanba Profesór Vicente Paulino hadaet ona kultura hakerek nian ba profesór sira no ha’u gosta tebes livru rua ne’e ho tema ne’ebé interesante”, hateten Magnífiku Reitór iha Auditóriu Liceu, Díli (18/11).
Iha fatin hanesan, Profesór Marcelino Ximenes Magno, M.A agradese ba sentru SEKA iha UNTL tanba bele publika livru sira ne’e.
“Ha’u hakarak agradese ba SEKA ne’ebé lidera husi Profesór Doutór Vicente Paulino tanba bele publika livru sira ne’e, no hanesan inisia atu motiva ba hakerek tan no bele motiva dosente seluk, liuhusi prosesu lubuk ho moto DCS nian katak “Se ha’u la lee oinsá ha’u bele hakerek”, hatutan Diretór DCS. 
Tuir Profesora Dulce Martins, livru ne’ebé elabora transforma husi peskiza mestradu nian konsentra iha Papél Média ba prevensaun Konflitu iha Timor-Leste.
“Ha’u-nia livru ne’e kona-ba teze-mestradu nian ha’u peskiza iha Rádiu Komunidade Comoro, tanba rádiu ne’e hakbesik liubá komunidade, momentu ne’ebá Comoro mak sai sentru ba konflitu no haree liubá papel rádiu nian ba prevene konflitu entre arte-marsiál”, dehan Autora. 
Relasiona ho lansamentu refere, Diretór SEKA, Profesór Doutór Vicente Paulino, hato’o mós katak iha livru barak mak mak iha hela faze redasaun no sei publika.
“Livru hirak ne’e esforsu ida makaas tebes husi autór, publika liuhusi SEKA, iha mós ISBN (International Standard Book Number) no sentru sempre disponivel ba dosente sira ne’ebé ho vontade hakarak no publika”, dehan Diretór.
Partisipa iha lansamentu ne’e, Dosente DCS, no FEAH, Estudante, reprezentante Alumni Komunikasaun Sosial nian, ekipa SEKA no konvidadu sira.
Média UNTL 📝: Leonia de A. da Costa
Foto 📷: Denilso