#TimorLeste #UNTL #PrecidênciaRepública #COVID19 #COVID19TL 19 Outubru 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, ho nia estrutura hasoru malu ho Prezidente da Repúblika (PR), Timor-Leste, Dr. Fransisco Guterres “Lu Olo”, iha Palásiu Prezidente, Aitarak Laran, Dili, (19/10).
Vizita refere atu kumprimenta Sua Exelénsia Prezidente Repúblika, no solisita mós opiniaun ruma relasiona ho Planu Estratéjiku UNTL nian ne’ebé iha hela presesu revizaun nian.
Magnífiku Reitór iha nia entrevista hafoin enkontru hateten, bainhira simu posse iha fulan hirak liubá tenta atu hasoru Prezidente Repúblika maibé lakonsege tanba pandemia.
“Ami-nia prezensa atu kumprimenta Sua Exelénsia Prezidente Repúblika, tanba inísiu tomada-posse tenta atu hasoru, maibé situasaun ho impaktu COVID-19, nune’e, ohin mak ami hetan oportunidade mai hasoru no agradese tebes tanba Sua Exelénsia simu ami ho diak no fó mós hanoin ruma ba universidade”, tenik Reitór.
Reitór mós hatutan, husi prezensa ne’e universidade solisita Prezidente Repúblika fó hanoin ruma relasiona ho planu universidade nian ba futuru, liga ho Planu Estratéjiku ba 2021-2030 nian, iha fatin hanesan mos agradese tanba alumni UNTL bele sai Prezidente Repúblika iha Timor-Leste.
Partisipa iha sorumutu ne’e, Prezidente Repúblika, akompaña husi asesór sira, Visereitór, Proreitór no Diretór Nasional husi UNTL nian.
Média UNTL 📝: Agostinho da Cruz e Silva
Foto 📷: Agostinho da Cruz e Silva