#TimorLeste #UNTL #PRAC #COVID19 #COVID19TL 15 Outubru 2021 - Universidade Nacional Timor Lorosa’e (UNTL), nia Magnífiku Reitór, Profesór dr. João Soares Martins, MPH, Ph.D, akompaña husi Proreitora ba Asuntu Kooperasaun, Profesora Doutora Lídia Gomes, SKM, MPH, enserra formasaun ba bolseiru foun UNTL nian ne'ebé atu hala'o estudu iha Portugal, iha Auditóriu Liceu UNTL nian, Díli (15/10).
Relasiona ho enseramentu ne'e, Magnífiku Reitór hateten, formasaun ne’e importante ba bolseiru sira hodi koñese oinsá moris iha sosiedade Portugal nian, liuliu aprende no adaptasaun ba kultura.
"Formasaun ne’ebé UNTL fasilita ba bolseiru sira ne’ebé atu hala'o estudu iha Portugal, ne'e hanesan oportunidade di’ak ba sira, nune’e fasil atu komunika no servisu hamutuk iha sosiedade, liuliu bele koñese realidade moris lor-loron nian", tenik Reitór.
Reitór mós dezeja katak, bolseiru sira sei remata estudu ho susesu iha Portugal, no sei aplika fali koñesimentu sira ne’e iha Timor-Leste, liuliu iha universidade.
Iha fatin hanesan, Proreitora ba Asuntu Kooperasaun nian hateten, formasaun ida ne'e foin dahuluk iha estrutura foun universidade nian, ne'ebé oferese ba sira na'in sanulu resin hat, ne’ebé kompostu husi Doutoramentu na’in 2, Mestradu na’in 7, no Interkámbiu Lisensiatura na’in 5.
" Objetivu husi formasaun, atu fó hanoin ba kandidatu sira atu prepara-an didiak, antes sira ba hala’o estudu iha Portugal", tenik Proreitora.
Tuir Bolseira Madalena da Cruz, bolsu estudu ne'e hanesan buat foun ba iha Interkámbiu lisensiatura nian, liuhusi Programa Prokultura, kona-ba prosesu no preparasaun halo ona durante fulan ida molok viajen.
"Formasaun ne'e, hanesan materia ka matadalan ida oinsá ajuda ami bainhira ami aranka ba Portugal, ho nune’e ami iha ona koñesimentu di'ak hodi bele ajuda hala'o ami-nia estudu", tenik Madalena.
Madalena hatutan katak, maske iha dezafiu maibé sei nafatin esforsu atu aprende hodi eleva kapasidade iha dalen portugés.
Iha enseramentu ne’e mos, Universidade entrega sertifikadu formasaun ba bolseiru sira inklui sertifikadu apresiasaun ba formadór sira.
Partisipa iha enseramentu ne'e, reprezentante husi Embaixada Portugal nian, formadór, ekipa tékniku Gabinete Koperasaun nian, ekipa tékniku Gabinete Reitoria, no bolseiru sira.
Média UNTL 
: Emerenciana Martins
: Emerenciana MartinsFoto 
: Denilson A. Barros
: Denilson A. Barros