Universidade Nacional Timor Lorosa’e (UNTL) nia Visereitór ba Asuntu Akadémiku no Garantia Kualidade (VAAGK), Profesór Doutór Samuel Venâncio de Sousa Freitas, hala’o abertura ba Kolókiu ho tema ‘’COVID-19, Media e Comunicação Social em Timor-Leste”, ne’ebé organiza husi Sentru Estudu Kultura no Arte (CECA) no koopera ho Departamentu Komunikasaun Sosiál (DCS), Fakuldade Siénsia Sosiál (FCS) UNTL, iha Sala Auditóriu-Liceu UNTL nian, Dili (21/10).
‘’Kolókiu ne’e importante tebes hola parte iha misaun universidade nian, hanorin, peskiza no tranzmite koñesimentu ba sosiedade, tanba halo peskiza ne’e atu kria ideia no lori feedback foun ruma, fó solusaun ba problema ne’ebé akontese, tanba ne’e importante tebes ba estudante sira partilla no diskuti asuntu relevansia ho DCS nomós UNTL”, tenik reprezentante Reitór nian, VRAAGK.
Visereitór mós enkoraja DCS atu dezenvolve atividade peskiza, bele elabora hamutuk iha livru akta, tanba hanesan rezultadu partilla atu hatan ba rekomendasaun ANAAA nian liuliu envolvimentu dosente no estudante iha peskiza.
Iha fatin hanesan, Diretór CECA, Profesór Doutór Vicente Paulino, hateten, Kolókiu ne’e realiza bazeia ba pilar Universidade nian, hodi promove traballu ne’ebé dezenvolve husi dosente no estudante sira.
“CECA iha nia obrigasaun atu organiza Kolókiu hanesan ne’e no realizasaun ne’e sempre hamutuk ho profesór sira ne’ebé hamahan an iha UNTL no liuliu fó espasu ba dosente no estudante sira hodi aprezenta sira-nia peskiza, nune’e ita bele hatene katak estudante sira envolve an duni iha parte peskiza nian’’ tenik Diretór CECA.
Profesór Doutór Vicente Paulino mós hatutan, CECA simu ona testu hamutuk 9 husi oradór sira no kontinua hein tan sira seluk nian nune’e bele finaliza iha prosesu estruturasaun nomós revizaun nune’e CECA bele lansa rezultadu aprezentasaun iha livru.
Entretantu, Diretór DCS nian, Profesór Marcelino Ximenes Magno, agradese ba servisu hamutuk ne’ebé hala’o ho CECA, tanba importante atu departamentu bele promove peskiza.
“Departamentu agradese ba apoiu universidade nian, liuliu VRAAGK ne’ebé sempre apoiu departamentu dezde inísiu preparasaun ba Avaliasaun ANAAA (Ajénsia Nasionál ba Avaliasaun no Akreditasaun Akadémika) nian, nomós iha kolókiu ne’e CECA apoiu tebes”, agrade Diretór.
Kolókiu akadémiku ne’e hala’o durante loron rua (21-22 outobru), aborda temátiku sira; (1) COVID-19 no Média, (2) Produsaun Notísia iha Rádiu no Televizaun, (3) Edukasaun no Notísia, (4) Notísia iha Eleisaun Parlamentár, (5) Satisfasaun no impaktu rede sosiál no telenovela.
Partisipa husi dosente-investigadór, estudante DCS, no estudante sira husi Fakuldade Edukasaun, Arte no Umanidade, no konvidadu sira.
Média UNTL 📝: Leonia de Araújo da Costa
Foto 📷: Laurindo da Cruz Gomes, Pio Belo Ximenes