#TimorLeste #UNTL #DNRU #COVID19 #COVID19TL 09 Jullu 2021
Universidade Nacional Timor Lorosa’e (UNTL) nia Diretór Diresaun Diresaun Nasionál Rekursu Umanu (DNRU), Sr. Agustinho Quelo, L. DC, iha Kampus Kaikoli, UNTL nian, Díli (08-07), hateten parte universidade nian simu ona lista funsionáriu na’in atus tolu hitu (307) ne’ebé sei partisipa iha promosaun grau iha 2021 ne’e.
“Bazeia ba lista ne’ebé mai hosi Komisaun Funsaun Públika (CFP), UNTL nia funsionáriu na’in 307 sei tuir teste ba promosaun grau iha tinan ida ne’e, DNRU hamutuk ho CFP mak sei estabelese no prepara teste ba funsionáriu sira”, tenik Diretór DNRU.
Sr. Quelo hatutan promosaun ne’e hahú iha 2019, UNTL nia funsionáriu hamutuk 372 mak partisipa, na’in 40 mak promovidu ba iha kategoria ka mudansa grau, teste daruak iha 2020 ba UNTL nia funsionáriu hamutuk 371 no promovidu na’in 14.
Bazeia ba mapa-pesoál UNTL nian, funsionáriu permanente 307 no tuir kategoria na’in 30 grau G ba grau F, F ba grau E hamutuk 49, kategoria tékniku administrativa grau E ba D hamutuk 76, tékniku profisionál grau D ba C hamutuk 114, grau C ba B hamutuk 72, grau B ba A hamtuk 19 no na’in haat mak la partisipa.
Promosaun grau ba funsionáriu Administrasaun Públika sira, bazeia ba Dekretu Lei Nu. 1/2017, depois de alterasaun daruak Dekretu Lei Nu. 22/2017 hatuur ona katak, CFP iha kompeténsia halo asaun direta ba promosaun grau ba funsionáriu administrasaun públika sira.
Média UNTL : Altur Ramos (estajiáriu)
Foto : Altur Ramos (estajiáriu)