#TimorLeste #UNTL #FDCH #COVID19 #COVID19TL 09 Jullu 2021
Universidade Nasional Timor Lorosa’e (UNTL) nia Proreitora ba Asuntu Kooperasaun, Profesora Doutora Lídia Gomes, SKM, MPH, aprezenta ezekusaun Fundo de Dezenvolvimento do Capital Humano (FDCH) ne’ebé apoiu bolseiru sira UNTL nian durante fulan Janeiru too Juñu, liuhusi enkontru, iha Salaun Delta Nova, Díli (08/07).
Iha enkontru ne’e, Proreitora ba Asuntu Kooperasaun, Profesora Doutora Lídia Gomes, SKM, MPH, hateten partisipa iha enkontru refere atu klarifika ezekusaun fundu ne’ebé apoiu husi FDCH.
“Sorumutu refere atu fó justifikasaun kona-ba ezekusaun orsamentu 2021, ne’ebé hetan apoiu husi FDCH ba iha Bolseiru sira UNTL nian, no ita ezekuta ona 21%, ne’e ba kustu de vida no subsídiu balu, dalarabarak ita atu ezekuta 100% ne’e wainhira ita selu tan propinas iha inisiu tinan letivu”, tenik Doutora Lídia.
Proreitora ba Asuntu Kooperasaun ne’e hatutan, alokasaun refere halo pagamentu ba bolseiru na’in 45 ne’ebé hala’o estudu iha Portugál, Brazil nomós Indonézia
Partisipa iha enkontru ne’e, Diretór-Jerál, Diretór Nasionál husi liña ministeriál sira hanesan, Ministériu Saúde, Ministériu Justisa, SEFOPE, F-FDTL, Ministériu Ensinu Superior Siénsia no Kultura (MESSK), INAP, Diretora Ezekutiva FDCH nian, Sra. Leila Cárceres dos Santos, ho nia ekipa no instituisaun relevante sira seluk.
Média UNTL 📝 : Leonia Araújo (estajiária)
Foto 📷 : Laurindo a Cruz (estajiáriu)