REITÓR UNTL HO PREZIDENTE RTTL-EP DEFINE ATIVIDADE ATU HALA’O IHA FUTURU

 

201875642 4275239842497368 8846310965374587601 n

168428471 4275241549163864 2970073637869444903 n

#TimorLeste #UNTL #RTTLEP #COVID19 #COVID19TL 09 Jullu 2021

Universidade Nasional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, reuniaun ho Prezidente RTTL-EP, Sr. José António Belo, hodi define atividade konjunta entre UNTL ho RTTL-EP ne’ebé sei implementa iha futuru.

Reuniaun ne’ebé hala’o iha sala Vídeokonferensia UNTL nian, Díli (09/07), ne’e ho objetivu atu define prioridade ba implementasaun Memorandu Entendimentu (MoU) ne’ebé asina ona iha loron 25 Maiu liubá.
“Ohin ami ko’alia opsaun lubuk ida hanesan (1) RTTL mai iha kampus, ne’ebé ami kontente tebes ho inisiativa ida ne’e, (2) asuntu seluk Sr. Prezidente husu ba ita kona-ba probilidade pesoál sira bele mai estudu iha UNTL ami sei diskute kona-ba kestaun ne’e tanba sei iha prosedimentu lubuk ida mak presiza diskuti antes iha desizaun finál”, tenik Reitór.

Reitór husu atu fasilita UNTL kona-ba aula sira liuhusi kanál RTTL nian hodi transmite aula tanba Zoom, no Google Meet ladun funsiona ho di’ak no Prezidente RTTL-EP iha konkordánsia hodi bele implementa.
Iha fatin hanesan, Prezidente RTTL-EP agradese ba UNTL tanba oferese ona buat balun ba estudante sira nune’e mós parte RTTL-EP sei fó espasu ba universidade atu implementa nia programa liuhusi kanál RTTL.
“Ami mai haklean memorandu ne’ebé asina ona, tanba ne’e agradese ba UNTL ne’ebé ho fuan bo’ot oferese ona buat balun ba ami funsionáriu sira, ami identifika ona funsionáriu hamutuk na’in 94, atu haree ba longu-prazu nian mak liuhusi Universidade atu fó espasu ba sira bele asesu iha UNTL”, tenik Sr. Prezidente RTTL-EP.

Partisipa iha enkontru ne’e Visereitora ba Asuntu Estudantís, Profesora Eng. Lígia Tomás Correia, M.Sc, Proreitóra ba Asuntu Kooperasaun, Profesora Doutora Lídia Gomes, SKM, MPH, no Parte RTTL-EP nian mak Diretór ba Programasaun, Sr. Horacio Babo, ho nia ekipa no tékniku sira.

Média UNTL : Leonia Araújo (estajiária)
Foto : Agostinho Crus e Silva