- Detalhes
- Escrito por Adelaide da Cunha
- Visualizações: 714
#TimorLeste #UNTL #FECT #COVID19 #COVID19TL 30 Jullu 2021
Universidade Nasional Timor Lorosa’e (UNTL) nia Fakuldade Enjeñaria, Siénsia no Teknolojia (FEST), hahú forma komisaun ba eleisaun Dekanu FEST nian hodi troka Profesór Ruben J. Freitas, Ph.D., ne'ebé asume ona kargu iha instituisaun estadu nian, no bazeia ba estatutu Fakuldade nian tenke liuhusi eleisaun.
Dekanu Interinu FEST nian, Profesór Junior Raimundo da Cruz, Ph.D, iha Kampus Hera UNTL nian (29/07) hateten, nia parte hatun ona despaxu atu estabelese komisaun ba eleisaun Dekanu foun.
“Iha semana kotuk, ha’u hatuun ona despaxu ida bazeia ba enkontru Konsellu Xefia Fakuldade nian, ami deside ona hodi estabelese komisaun hodi prepara ba eleisaun Dekanu nian, tanba Dekanu Interinu agora liuhusi despaxu Magnífiku Reitór nian”, tenik Profesór Junior.
Profesór Junior mós hatutan, atualmente komisaun hahú halo hela preparasaun, no seidauk marka data ba eleisaun, kandidatu ne’ebé eleitu sei aprezenta rezultadu ba Magnífiku Reitór hodi nomeia.
Profesór Junior deskreve mós kritériu sira, bazeia ba Estatutu-FEST nian, iha artigu 12 hatuur ona katak kandidatu prezisa ho nível doutoramentu, mínimu tinan 5 sai dosente permanente iha FEST, saúde di’ak, iha kapasidade ba jestaun no responsabilidade profisionál ba funsaun Dekanu, kapasidade iha komunikasaun ba lian (inglés, portugés, tetun no bahasa Indonesia) no seluk tan.
Média UNTL : Agostinho da Cruz e Silva
Foto : Pio Belo Ximenes
- Detalhes
- Escrito por Adelaide da Cunha
- Visualizações: 4461
#TimorLeste #UNTL #CFA #COVID19 #COVID19TL 30 Jullu 2021
Universidade Nasional Timor Lorosa’e (UNTL) nia Diretór Sentru Formasaun Avansada (SFA), Profesor Apolinário Magno, MBA, hateten sei organiza formasaun avansada no konsentra ba kapasitasaun dosente foku iha pedagojia-ensinu, no ba funsionáriu sira sei konsentra ba formasaun servisu administrasaun nian.
“Prioridade ba oin, SFA sei fasilita formasaun pedagojia ba dosente sira ne’ebé la’os iha área edukasaun nian, maibé dosente iha universidade no iha mós formasaun seluk ba funsionáriu administrasaun sira” tenik Diretór SFA iha Sala Vídeo konferénsia UNTL nian, Díli (29/07).
Diretór ne’e mós hatutan, antes ne’e Sentru Formasaun Avansada fasilita ona treinamentu kona-ba utilizasaun Google Tools ba profesór sira relasiona ho aula online durante implementasaun Serka Sanitária.
SFA mós simu ona lista funsionáriu sira nian husi Diresaun Nasional Rekursu Humanu (DNRH) atu fó formasaun administrasun nian, liga ba Língua Inglés, Portugés no IT nian (oinsá uza programa komputador) tanba sira mós iha nesesidade ba formasaun refere.
Média UNTL : Leonia de A. da Costa (estajiária)
Foto : Laurindo da Cruz (estajiáriu)
- Detalhes
- Escrito por Adelaide da Cunha
- Visualizações: 919
#TimorLeste #UNTL #FECT # VPMMPO #JICATimorLeste #COVID19 #COVID19TL 30 Jullu 2021
Universidade Nacional Timor Lorosa’e (UNTL) nia Fakuldade Enjeñaria, Siénsia no Teknolojia (FECT), liuhusi Departamentu Enjeñaria Sívil no Departamentu Jeolójia i Petróleu realiza simpóziu ho tema, “𝑯𝒂𝒎𝒖𝒕𝒖𝒌 𝑹𝒐𝒏𝒂 𝒏𝒐 𝑯𝒂𝒓𝒆𝒆 𝑯𝒐𝒅𝒊 𝑭𝒐́ 𝑺𝒐𝒍𝒖𝒔𝒂𝒖𝒏 𝒃𝒂 𝒑𝒓𝒆𝒗𝒆𝒏𝒔𝒂𝒖𝒏 𝑫𝒆𝒛𝒂𝒔𝒕𝒓𝒆 𝑰𝒏𝒖𝒏𝒅𝒂𝒔𝒂𝒖𝒏 𝒊𝒉𝒂 𝑭𝒖𝒕𝒖𝒓𝒖”, iha Auditóriu FECT nian, Hera, (29/07).
Reprezentante Magnífiku Reitór nian, Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas, hateten, universidade iha papel atu kontribui ba Dezenvolvimentu Nasionál liuhusi kria no tranzmite koñesimentu foun ho forma informasaun ba estadu.
“Iha atividade ohin hola parte ba papel universidade nian, atu tranzmite informasaun ne’ebé feitu liuhusi peskiza ba públiku no estadu, ho asaun ida ne’e signifika universidade hanesan líder ba Dezenvolvimentu Sustentável”, tenik Profesór Samuel.
Visereitór ba Asuntu Akadémiku no Garantia Kualidade ne’e mós, agradese ba FECT no parseiru sira ne’ebé apoiu ona hodi realiza simpóziu nasionál refere.
Vise-Primeiru-Ministru no Ministru ba Planu i Ordenamentu (VPMMPO), S.E. José Maria dos Reis, enkoraja ba universidade atu dezenvolve simpóziu sai kultura akadémiku .
“Atividade estudu no simpóziu hanesan ne’e tenki sai kultura ba universidade regularmente hodi kontribui ba polítiku no estratéjia sira ne’ebé governu implementa, liuliu sai sentru ba estudu no protesaun sientífiku sira kona-ba risku no oportunidade sira sei mosu iha futuru”, tenik VPMMPO.
VPMMPO ho orgullu, bazeia ba akordu ne’ebé VPMMPO ho UNTL halo ona, ne’ebé finalidade envolve universidade tenki sai sentru ba estudu sientífiku hodi fó apoiu ba dezenvolvimentu nasionál.
Iha fatin hanesan, Dekanu Interinu FECT nian, Profesór Junior R. da Cruz, Ph.D, hateten, atividade ida ne’e hodi aprezenta mós relatóriu no akumula hanoin kona-ba prevensaun dezaste sira iha futuru, ho hamosu rekomendasaun sira ba governu no sosiedade.
“Simpóziu ne’e aprezenta rezultadu kona-ba dezastre naturais ne’ebé akontese iha 2020 no 2021 ne’e, ho nia kauza ne’ebé estraga uma, ema mate, no seluk tan, ho difikuldade hirak ne’e mak departamentu rua iha FECT ho inisiativa halo levantamentu dadus ba fatin hirak ne’ebé risku ba inundasaun”, hatutan Dekanu Interinu.
Levantamentu dadus ne’ebé hala’o, relasiona ho inundasaun ne’ebé invade Díli iha loron 04 abril liubá no hetan apoiu husi Japan International Cooperation Agency (JICA) iha Timor-Leste, kolabora ho Universidade Gifu-Japaun.
Partisipa iha atividade ne’e, Dekanu Interinu FECT ho nia estrutura, dosente no estudante, reprezentante JICA iha Timor-Lest, Sr. Goto Ko, Prezidente BTL,EP Eng. Carlos Peloi dos Reis, reprezentante Ministériu ne’ebé relevante sira, inklui konvidadu.
Média UNTL : Agostinho da Cruz e Silva
Foto : Pio Belo Ximenes
- Detalhes
- Escrito por Adelaide da Cunha
- Visualizações: 692
#TimorLeste #UNTL #MESSK #COVID19 #COVID19TL 30 Jullu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, partisipa iha Reuniaun Konsellu Reitór nian, ne’ebé prezide husi Ministru Ensinu Superiór, Siénsia no Kultura (MESSK), S.E Longuinhos dos Santos, iha Salaun Delta Nova (29/07).
Reitór UNTL nian hateten, partisipa iha eventu refere tanba hola parte hanesan membru ida, ba hodi fó hanoin bazeia ba ajenda ne’ebé MESSK aprova.
“UNTL nia prezensa hanesan Reitór atu fó hanoin ruma relasiona ho ajenda ne’ebé ohin aprova lubuk ida hanesan Sr. Ministru ohin hato’o, no universidade nasionál hala’o hela nia knaar, bainhira iha desizaun ruma UNTL laiha problema atu hala’o”, tenik Reitór.
Relasiona ho situasaun surtu COVID-19, Reitór mós hatutan meiu prinsipál mak vasinasaun tanba ne’e husu ba dosente, funsionáriu no estudante sira atu vasina, nune’e fó posibilidade atu ativa aula prezensiál.
Relasiona eventu ne’e, liuhusi entrevista MESSK, S. E. Longuinhos dos Santos hateten, reuniaun Konsellu Reitór ne’e kada tinan hala’o dala rua atu rona hanoin husi lideransa sira ensinu superiór nian.
“Objetivu husi eventu ne’e atu rona hanoin no balansu kona-ba atividade konfinamentu nian, no ajenda ida maka preparasaun ba atividade letiva prezensiál ensinu superiór nian, rekuperasaun aula no ikus liu maka informa mós kona-ba liña kréditu ba instituisaun kualidade sira nomós distribui simbolikamente fasilidade prevensaun COVID-19 nian ba instituisaun sira”, hatutan Ministru.
Atu reativa aula prezensiál Governante ne’e kontinua husu ba universidade sira atu kontinua prepara fasilidade no vasinasaun, enkuantu parte MESSK bainhira hetan ona rekomendasaun husi Ministériu Saúde mak bele autoriza aula prezensiál.
Partisipa iha reuniaun ne’e, Diretora-Jerál Ensinu Superiór no Siénsia MESSK, Sra. Maria Filomena Lay Guterres, Magnífiku Reitór no Prezidente husi Instituisaun Ensinu Superiór sira mak eziste iha Timor-Leste, Diretór Ezekutivu Ajénsia Nasionál ba Avaliasaun no Akreditasaun Akadémika (ANAAA), Profesór Edmundo Viegas, PhD, no konvidadu sira.
Média UNTL : Miguel Gonçalves
Foto : Miguel Gonçalves
- Detalhes
- Escrito por Adelaide da Cunha
- Visualizações: 1201
TimorLeste #UNTL #DNRU #COVID19 #COVID19TL 28 Jullu 2021
Uiversidade Nasional Timor Lorosa’e (UNTL) nia Diretor Diresaun Nasional Rekursu Umanu (DNRU), Sr. Agostinho Quelo, iha Kampus Sentrál UNTL nian, Díli (27/07) hateten katak, planu prioridade DNRU nian ba tinan 2022 mak sei hadia Sistema ba dadus liuhusi Sistema Human Resource Information System (HRIS) no Sistema Informasaun Administrasaun.
“Planu Prioridade DNRU nian mak sei hadia Sistema HRIS no sistema informasaun administrasaun públika mak agora dadauk ami uza ba faze input dadus kona-ba pesoal administrasaun no dosente sira no tuir mai mak sei mellora mós atendimentu administrasaun UNTL nian ba públiku ”,tenik Sr. Quelo.
Diretór DNRU mós hatutan, sira nia parte sei hadia mos jestaun ba arkivu iha sistema manuál ba dijitál atu asegura dadus sira ba tempu naruk nian.
“Iha futuru sei tau mós prioridade atu hadia sistema rekrutamentu, monitorizasaun ba bolseiru iha UNTL no tau prioridade liuliu ba ninia prosesu rekrutamentu, promosaun no formasaun iha área konsentrada.
Sistema Human Resource Information System (HRIS) mak sistema informasaun ne’ebé uza atu prosesu dadus sira pesoál nian, hanesan perfíl, prosesu payroll, prosesu rekrutamentu, avaliasaun, no arkivu dadus funsionáriu sira nian.
Média UNTL : Laurindo Da Cruz (estajiáriu)
Foto : Laurindo Da Cruz (estajiáriu)