- Detalhes
- Escrito por Adelaide da Cunha
- Visualizações: 4319
#TimorLeste #UNTL #FECT #CongregaçãoCanossiana 18 Abril 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, akompaña husi Vise Reitór no Proreitór sira, inaugura uma temporária ne’ebé konstrui husi estudante Dormitóriu-Fakuldade Enjeñaria, Siénsia no Teknologia (FECT) Hera, ho materiál apoiu husi Kongregasaun Canosiano, hodi fó ba vítima ne’ebé afeita husi inundasaun iha loron 4 Abril liubá.
Iha serimónia ne’ebé hala’o iha Hera-Díli (17-05), Reitór iha nia diskursu orgullu ho universitáriu sira-nia apoiu, tanba momentu hanesan, sira mós hasoru difikuldade maibé tanba domin prontu konstrui uma refere.
“Orgullu tebes ba estudante sira, tanba dadaun ne’e ita bo’ot sira mós iha situasaun defísil nia laran, maibé servisu ne’ebé ita bo’ot sira halo ne’e, reflete duni ita bo’ot sira-nia domin ba ita -nia maun alin no bin sira, iha situasaun ne’ebé dadaun ne’e sira hasoru”, tenik Reitór.
Iha fatin hanesan, Xefi Adeia Ailoklaran, Suku Hera Sr. Rafael S. Ribeiro, agradese ba Padre no Madre Kongregasaun Canosiano sira no Padre Kapelaun-UNTL ne’ebé tulun ona komunidade ne’ebé hetan inundasaun iha fulan kotuk liuba to’o ohin loron.
“Agradese ba Padre no Madre sira, durante ne’e halibur ona komunidade iha fatin ne’e, dezde 4 Abril liubá, apoiu hirak ne’ebé alin estudante halo, laiha buat ida atu selu, maibé sei reza nafatin ba Aman-Maromak hodi tau matan ba sira-nia unidade no prosesu estudu hotu”, hatutan Xefe Aldeia.
Responsável Estudante Dormitóriu FECT-Hera nian, Ajino Batista hateten, iha momentu hanesan sira mos iha difikuldade tanba enfrenta hela Konfinamentu Obrigatóriu, maibé la taka matan hodi apoiu maluk ne’ebé presiza.
“Ami mós sente susar iha Dormitoriu ne’ebá, maibé ami mós sente katak ita nia inan feton sira, ita-nia maluk, no alin sira presiza liu, tanba ne’e, ami simu responsável husi Na’i Padre, ha’u fila ba enkontru ho kolega sira katak ita hetan oportunidade atu ajuda tuir kbiit hanesan estudante nian, ami-nia rezultadu mak ida ne’e”, tenik Ajino.
Uma temporáriu ne’e, material sira sosa ho apoiu finanseira husi Kongregasaun Canosiano husi Itália, no konstrui durante loron 30, husi estudante sira ne’ebé hela iha Dormitóriu FECT nian, no kolabora ho estrutura Fakuldade nian.
Partisipa iha serimónia ne’e, Visereitór, Proreitór, Diretór-Jerál ba Servisu Apoiu Reitoria, Amu Kapelaun UNTL, Pe. Nivio Lebre Correia, Fdcc, reprezentante estrutura FECT nian, Profesór sira, Autoridade Lokal, Padre Canosiano sira, estudante no Komunidade.
Média UNTL : Agostinho da Cruz e Silva
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 452
#TimorLeste #UNTL #COVID19 #COVID19TL 17 Maiu 2021
Graduandu 2020 sira ne’ebé rejistu tiha ona ba Graduasaun Online Dahuluk, tenke konfirma sira-nia dadus liuhosi link tuir mai ne’e:
https://drive.google.com/.../143zm2VyECJHb2Ikx3bM.../view...
Karik sei presiza informasaun ruma ka sei presiza hatama “dados pessoais” tuir formuláriu ne’ebé hato’o tiha ona, bele kontatu Gabinete Visereitoria Asuntu Akadémiku no Garantia Kualidade (VRAAGK) liuhosi e-mail: Este endereço de email está protegido contra piratas. Necessita ativar o JavaScript para o visualizar. no/ka WhatsApp +67077860319.
NB: Rejistu foun ba Graduasaun Online Dahuluk taka tiha ona.
Graduandu sira ne’ebé seidauk simu atributu Graduasaun, tenke dirije ba Diresaun Nasionál Atendimentu Estudante (DNAE-Kampus Sentrál), hahú loron-tersa 18 fulan Maiu tinan 2021, oras servisu nian, to’o loron kuarta-feirs 19 fulan Maiu, oras 11:30 (dadeer), hodi simu sira-nia atributu, verifika diploma no hasai fotografia.
IMPORTANTE: Graduandu sira ne’ebé la foti sira nia atributu tuir oráriu ne’ebé determina, labele tuir Graduasaun Online Dahuluk no tenke tuir Graduasaun ho forma seluk tuir mai (Online ka Prezensiál).
Iha tempu besik tuir mai, UNTL sei fó sai avizu tan kona-ba Graduasaun Online, nomós kona-ba Graduasaun Prezensiál.
Ami apela ba membru hotu husi Sívitas Akadémika UNTL atu kontinua tuir ho rigór medida ne’ebé fó sai husi autoridade kompetente ba luta kontra pandemia COVID-19, liuliu distansiamentu fíziku no kuidadu espesiál ijiene no saúde.
Informasaun ofisiál Reitoria UNTL durante tempu pandemia COVID-19 sei kontinua fó sai de’it iha website www.untl.edu.tl no pájina Facebook UNTL nian Universidade Nacional Timor Lorosa'e (Universidade Nacional Timor Lorosa'e).
Halo favór fahe no kumpre.
Mai Ita Hamutuk Luta Kontra COVID-19!
Ita-nia Saúde Iha Ita-nia Liman Rasik!
Reitoria UNTL
- Detalhes
- Escrito por Adelaide da Cunha
- Visualizações: 597
#TimorLeste #UNTL #COVID19 #COVID19TL 15 Maiu 2021
Membru Sívitas Akadémika UNTL (dosente, funsionáriu ka estudante) ne'ebé hakarak simu vasina COVID-19 iha tempu besik tuir mai, tenke kompleta no submete formuláriu rejistu online liuhosi link tuir mai ne’e:
https://forms.gle/Cwvd6q9NVT2wddQw7
Data no oras limite atu rejistu (ba membru Sívitas Akadémika UNTL ne’ebé seidauk simu vasina COVID-19 de'it): loron-segunda 17 fulan-Maiu tinan 2021, oras 18:30 (lokraik).
Iha tempu besik tuir mai, UNTL sei fó sai avizu detalladu kona-ba fatin no oráriu ba imunizasaun COVID-19 iha UNTL.
Ami apela ba membru hotu husi Sívitas Akadémika UNTL atu kontinua tuir ho rigór medida ne’ebé fo-sai husi autoridade kompetente ba luta kontra pandemia COVID-19, liuliu distansiamentu fíziku no kuidadu espesiál ijiene no saúde.
Informasaun ofisiál Reitoria UNTL durante tempu pandemia COVID-19 sei kontinua fó sai de’it iha website www.untl.edu.tl no pájina Facebook UNTL nian Universidade Nacional Timor Lorosa'e.
Halo favór fahe no kumpre.
Mai Ita Hamutuk Luta Kontra COVID-19!
Ita-nia Saúde Iha Ita-nia Liman Rasik!
Reitoria UNTL
- Detalhes
- Escrito por Adelaide da Cunha
- Visualizações: 4707
#TimorLeste #UNTL #MESSK #FDCH 17 Maiu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, hamutuk ho Reitór no Prezidente husi Instituisaun Ensinu Superiór (IES) públiku no privadu sira, asina Memorandu Entendimentu hodi implementa programa Bolsu Estudu Hakbiit, ne’ebé oferese husi Fundu Dezenvolvimentu Kapitál Umanu (FDCH).
“Agredese tebes ba VIII Governu, liuhusi FDCH ho inisiativa ne’e, ohin ita asiste hamutuk asinatura ba lansamentu programa bolsa hakbiit, importante tebes atu promove mós timoroan sira ne’ebé kbiit la’ek asesu ba edukasaun”, hateten Reitór iha salaun Ian Martin INFORDEPE nian, Díli (17/05).
Iha fatin hanesan, Ministru Ensinu Superiór, Siénsia no Kultura (MESSK), S.E. Longuinhos dos Santos hateten katak, programa bolsa hakbiit ne’e realiza ho kolaborasaun entre Instituisaun Ensinu Superiór públiku no privadu sira iha Timor-Leste, hamutuk ho FDCH.
“Programa Bolsa Hakbiit ne’e, hanesan inisiativa no medida foun Governu nian, liuhusi MESSK ne’ebé ho objetivu oferese liu ba joven sira ne’ebé ho kapasidade potensiál, no mai husi família kbiit la’ek atu asesu ba ensinu superiór”, hateten MESSK.
Governante ne’e, dezeja katak liuhusi Bolsa Hakbiit ne’e ba futuru bele dignifika família kbiit la’ek sira-nia moris liuhusi formasaun umana, no asesu ba empregu.
Diretora Ezekutiva FDCH nian Sra. Leila Carceres dos Santos, agradese ba prezensa husi Magnífiku Reitór no Prezidente husi IES públiku no privadu sira ne’ebé marka konkretizasaun iha implementasaun ba programa Bolsa Hakbiit.
“Aproveita atu informa mós katak, iha tinan 2021 ne’e, FDCH atribui ona bolsa liuhusi bolsa hakbiit hamutuk atus sia sanulu (910) ba UNTL no IPB, no atribui mós bolsa ne’e ba instituisaun ensinu superiór privadu sira 13, hamutuk benefisiáriu 400 resin, ne’ebé sira estuda iha área oioin ne’ebé sira hili”, informa Diretora FDCH.
Partisipa iha eventu, Reitór UNTL, Reitór no Prezidente husi IES públiku no privadu sira, estrutura FDCH, no konvidadu.
Média UNTL : Miguel Gonçalves
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 4282
#TimorLeste #UNTL #KIPKI #MS 13 Maiu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, ho reprezentante Ministériu Saúde (MS) nian, Dr. Victor Soares Martins, hala'o abertura ba vasinasaun ne'ebé halo ba Sívitas Akadémika, liuliu dosente no funsionáriu sira, iha Kampus Sentral UNTL nian, Díli (13/05)
"Vasinasaun ne'e importante atu asegura ita-nia an hodi luta kombate COVID-19, tamba ne'e lori naran universidade nian agradese ba Ministériu Saúde ne'ebé hatan ona ba pedidu ne'ebé Universidade hato'o iha fulan ida liubá", tenik Reitór.
Profesór ne'e mós agradese ba médiku sira ne'ebé fasilita ona vasinasaun AstraZeneca ne'e, no kontinua husu ba Sívitas Akadémika tomak atu vasina.
Iha fatin hanesan, reprezentante Ministériu Saúde nian mós hateten katak ho vasinasaun ne'e bele ajuda benefisiáriu sira (dosente, funsionáriu no estudante sira) bele iha sistema imunizisaun forte kontra surtu COVID-19.
"Ita-nia vasinasaun iha ne'e ohin ekipa prontu no bele vasina ema na'in rihun ida atus lima (1500), maibé dalaruma la hotu ami prontu kuaker tempu se universidade presiza fali, ho hanoin ida katak UNTL mak forte no seguru hodi forma timoroan sira ba futuru", dehan representante MS ne'e.
Dr. Victor mós agradese ba estrutura universidade nian ne'ebé fasilita ona prosesu ne'e tanba ho vasina mak dalan ida hodi proteje an husi COVID-19.
Eventu ne'e realiza tanba organiza husi Komisaun Implementasaun Planu Kontijénsia Interna (KIPKI-UNTL) ne'ebé lidera husi Dr. Teresa Madeira Soares, no fasilita husi médiku sira.
Partisipa husi Magnífiku Reitór, ho nia estrutura, Dekanu, Diretór-Jerál no Diretór Nacional sira, Amu Kapelaun Pe. Nivio Lebre Correia, Fdcc, dosente, funsionáriu no estudante balun inklui familia husi Sívitas Akademika sira.
Média UNTL : Miguel Gonçalves
Foto : Agustinho da C. e Silva