- Detalhes
- Escrito por Adelaide da Cunha
- Visualizações: 2202
#TimorLeste #UNTL #VAPFAJ #DNPF #COVID19 #COVID19TL 11 Agostu 2021
Universidade Nacional Timor Lorosa’e (UNTL) liuhusi Visereitor ba Asuntu Administrasaun no Finansa no Administradór-Jerál (VRAPFAJ), nia Diresaun Nasional Planu no Finansas (DNPF), aprezenta ona proposta Orsamentu Jerál do Estadu (OGE 2022) nian ba Konsellu Jestaun no Xefia sira, iha Auditóriu Liceu UNTL nian, Díli (11/08).
Magnífiku Reitór UNTL, Profesór dr. João Soares Martins MPH, Ph.D, iha nia abertura hateten, envelope fiskál ba Orsamentu Jerál Estadu ba tinan 2022 menus tanba ne’e husu estrutura sira atu elabora planu ho di’ak ho orsamentu ne’ebé prevé ba nesesidade Universidade nian.
“Agradese tebes ita hasoru malu fali iha ne’e, atu ko’alia kona-ba OJE ne’e aloka mai UNTL ba Anu Fiskal 2022 nian, ita hatene ne’e orsamentu Anual, OJE-2022 ita tenki haka’as an, tanba menus husi OJE-2021 ida agora, tan ne’e ita presiza planu no jestaun ne’ebé di’ak ba nesesidade universidade nian”, tenik Reitór.
Iha fatin hanesan, Visereitór ba Asuntu Administrasaun no Finansa no Administradór-Jerál, Profesór Helio A. da Costa Mauquei, Ph.D, hateten, hafoin simu envelope fiskál OJE 2022 halo kedas enkontru ho Proreitór no Diresaun iha nia Gabinete.
“Ita simu envelope fiskál OJE ba 2022 nian, ha’u hamutuk ho Proreitór ba Asuntu Planeamentu, Monitorizasaun no Avaliasaun, Profesór José Nelson Salsinha, Ph.D. ita halo kedas enkontru ho Diresaun sira Gabinetw Visereitoria, ita halo diskusaun bazeia ba envelope OJE ne’ebé Governu aloka mai UNTL, liu miliaun 16 tanba ne’e hein katak bele akumula atividade hotu ne’ebé atu halo iha tinan oin”, tenik Profesór Helio.
Iha sorin seluk, Diretór Nasionál Planu no Finansa, Sr. Egidio dos S. Filipe, hateten, aprezentasaun refere importante tanba Konsellu Jestaun sira tenke aprova proposta OJE, moluk enkamiña ba Governu.
“Ohin ita aprezenta ba Konsellu Jestaun sira, liuliu Fakuldade sira, atu hatene pakote fiskal ba 2022 nian ne’e, atividade hotu ne’ebé atu realiza ita tenki kobre ba Dolar ($) milaun 16, fahe ba (1) Boa Governasaun no Jestaun Institusionál, (2) Formasaun no Edukasaun, no (3) Inkluzaun Sosiál ” tenik Sr. Egidio.
Partisipa iha enkontru ne’e Visereitór, Proreitór, Diretór-Jerál, Diretór Nasionál, Dekanu Fakuldade no kargu xefia sira.
Média UNTL : Agostinho da Cruz e Silva
Foto : Pio Belo Ximenes
- Detalhes
- Escrito por Adelaide da Cunha
- Visualizações: 1051
#TimorLeste #UNTL #PRAK #COVID19 #COVID19TL 11 Agostu 2021
Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins MPH, Ph.D, partisipa enkontru liuhusi Zoom ho Bolseiru sira UNTL nian iha Portugál , iha Sala Videokonferénsia UNTL nian, Díli (10/08).
Objetivu husi reuniaun virtuál refere, parte Universidade atu hatene kondisaun kada bolseiru sira iha Portugál, no iha oportunidade ba bolseiru sira hato’o idaidak nia preokupasaun mai universidade hodi bele buka solusaun.
Sorumutu virtuál ne’e realiza tanba inisitiva husi Proreitora ba Asuntu Kooperasaun (PRAK), Profesora Doutora Lídia Gomes. Partisipa iha reuniaun ne’e PRAK nia ekipa no bolseiru sira iha Portugál.
Média UNTL : Agostinho da Cruz e Silva
Foto : Pio Belo Ximenes
- Detalhes
- Escrito por Adelaide da Cunha
- Visualizações: 1026
#TimorLeste #UNTL #COVID19 #COVID19TL 11 Agostu 2021
Liuhusi Despaxu Ministériu Ensinu Superiór, Siénsia no Kultura (MESSK), nune’e hakarak informa ba Sívitas Akadémika UNTL katak, hahú loron 9 Agostu tinan 2021, aula prezensiál hahú reativa fali ona.
Husu ba membru Sívitas Akadémika hotu wainhira tama ona iha resintu UNTL, tenke kumpri regras sira ne’ebé estabelese iha universidade, hanesan distansiamentu fíziku, uza maskara, fase liman bebeik ho bee no sabaun ka uza hand sanitazer no tenke hatudu komprovativu vasina iha kada Fakuldade.
Mai ita hamutuk kontribui hodi prevene nafatin moras COVID-19 iha Timor-Leste.
Informasaun kompletu bele haree iha komunikadu aneksu.
Média UNTL
- Detalhes
- Escrito por Adelaide da Cunha
- Visualizações: 1684
#TimorLeste #UNTL #FECT #COVID19 #COVID19TL 11 Agostu 2021
Universidade Nacional Timor Lorosa’e (UNTL), nia Magnífiku Reitór, Profesór dr. João Soares Martins MPH, PhD, hasoru malu ho Xefe Komisaun ba Eleisaun Dekanu foun Fakuldade Enjeñaria, Siénsia no Teknolojia (FECT), Profesór Domingos de Sousa Freitas, ho nia ekipa, hodi hanoin no diskute instrusaun servisu Dekanu foun tinan 2021 to’o 2025.
“Sorumutu ohin ho Ekipa Komisaun ba Eleisaun Dekanu foun FECT nian, sira mai atu husu Reitór nia opiniaun bazeia ba despaxu husi Dekanu Fakuldade ne’ebé estabelese ona, tanba ne’e sira tenki halo lalais eleisaun inísiu iha fulan Setembru nia laran” tenik Reitór iha Sala Vídeo Konferênsia (10/08).
Reitór hatutan, kandidatura ba Dekanu FECT tenke ho nível Doutoradu, nune’e bele iha koñesimentu di’ak iha Servisu Akadémiku, Edukasaun no Peskiza iha UNTL, hanesan hatuur ona iha estatutu Fakuldade nian.
Iha fatin hanesan, Xefe Komisaun, Domingos de Sousa Freitas hateten, objetivu husi sorumutu ne’e atu husu instrusaun husi Reitór, nune’e mós parte komisaun aprezenta rekizitu internál bazeia ba Estatutu Fakuldade nian.
“Iha enkontru ida ohin atu rona instrusaun husi Magnífiku Reitór, nune’e ekipa komisaun bele hala’o servisu, no ami mós aprezenta rekezitu internál ne’ebé ekipa prepara bazeia ba estatutu FECT nian ne’ebé kategoria ba kandidatu Dekanu”, tenik Xefe Komisaun.
Eleisaun ba Dekanu foun FECT nian, sei hala’o iha fulan Setembru, no hafoin rona tiha opiniaun husi Reitór, faze tuir mai Komisaun sei fó sai prosesu sira ho kalendáriu ba eleisaun nian.
Média UNTL : Leonia de Araújo (estajiária)
Foto : Laurindo da Cruz (estajiáriu)
- Detalhes
- Escrito por Adelaide da Cunha
- Visualizações: 4568
#TimorLeste #UNTL #CECA #COVID19 #COVID19TL 11 Agostu 2021
Universidade Nacional Timor Lorosa’e (UNTL) nia Diretór Sentru Estudu ba Arte no Kultura (SECA), Profesór Doutór Vicente Paulino, iha Kampus Sentrál UNTL nian, Díli (30/07) hateten, Sentru ne’e nia foku ba pilar haat, (1) peskiza, (2) aprezentasaun semináriu, (3) publikasaun no (4) promove eventu kulturál atu promove kultura iha nível sientífiku ba Timor-Leste.
“Atu promove kultura iha UNTL no ba Timor-Leste, ami garante katak, sei publika obra lubuk ida, tanba agora iha ona prosesu, maibé obra rua sei lansa iha fulan Setembru no iha fulan Outubru no Novembru lansa tan livru rua, relasaun ho komunikasaun tanba ita mós nakloke ba asuntu sira ne’ebé ligadu ho SECA”, hatutan Diretór SECA.
Profesór Vicente mós hatutan, objetivu prinsipál mak atu insentiva profesór sira iha investigasaun ne’ebé asosiadu ba kultura no arte ho enkuadramentu antropolójiku, sosiolójiku no estudu kultura reál sira, liga mós ba aspetu komunikasaun nian no área seluk tan.
“Dadaun SECA halo ona servisu hamutuk ho universidade balun iha rai liur, hodi kontribui ba servisu sentru ne’e nian, nune’e mós nakloke parte hotu ne’ebé hakarak koopera, tanba ne’e ba períodu tinan lima mai garante katak, sei konsentra barak ba peskiza, aprezentasaun sira iha semináriu no publikasaun”, hatutan Diretór SECA.
Sentru ne’e kontinuidade husi sentru anteriór nian ne’ebé ho naran Sentru ba Konservasaun no Dezenvolvimentu Arte no Kultura (SKDAK) atu Konserva no Divulga Kultura tradisionál no seluk tan liuhusi eventu kultural sira, maibé dadaun ne’e transforma ona ba Sentru Estudu ba Kultura no Arte (SECA).
Média UNTL : Leonia de A. da Costa (estajiária)
Foto : Agostinho da Cruz e Silva