- Detalhes
- Visualizações: 463
#TimorLeste #UNTL #FDCH #COVID19 #COVID19TL 24 Marsu 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, simu bolseiru hakbi’it hamutuk na’in 350 husi Fundu Dezenvolvimentu Kapitál Umanu (FDCH), liuhusi serimónia entrega ne’ebé hala’o iha Auditóriu Fakuldade Enjeñaria, Siénsia no Teknolojia (FECT), Hera Díli (23/03).
“Hakarak agradese ba VIII Governu Konstitusionál liuhusi FDCH ne’ebé atribui ona bolsu-estudu ba família ho rendimentu naton nia oan sira, hodi asesu ba ensinu superiór iha Timor-Leste liuliu UNTL, ha’u hanoin ne’e ba dahuluk FDCH oferese ba lisensiatura iha rai laran”, tenik Magnífiku Reitór.
Magnífiku Reitós mós hato’o bemvindu ba estudante sira ne’ebé hetan oportunidade hodi asesu mai UNTL, maibé presiza kumpri nafatin rekezitu hirak ne’ebé mak FDCH tau iha kontratu laran.
Iha fatin hanesan, Diretór Ezekutivu FDCH, Doutór Cristóvão dos Reis, hateten, tinan ne’e governu atribui bolsu hakbi’it ho totál rihun ida hodi asesu ba ensinu superiór iha Timor-Leste.
“Tinan ida ne’e FDCH fó bolsa hakbi’it ba benefisiáriu hamutuk rihun ida, fahe ba UNTL 350, 40 ba iha Instituto Politécnico Betano, 610 ba iha universidade no institutu privadu sira iha Timor-Leste”, tenik Diretór Ezekutivu.
Partisipa iha serimónia atribuisaun refere, Visereitór, Proreitór, Diretór, Dekanu, Bolseiru sira ho nia família, Funsionáriu sira husi FDCH no konvidadu sira seluk.
Média UNTL 📝 : Agostinho da Cruz e Silva
Foto 📷 : Pio Belo Ximenes
- Detalhes
- Visualizações: 516
#TimorLeste #UNTL #KonselluJestaun #COVID19 #COVI19TL 24 Marsu 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, hala’o enkontru ho Konsellu Jestaun hodi diskuti regulamentu sira ba Sentru Desportu Akadémiku UNTL nian, iha sala Vídeo Konferénsia UNTL nian, Díli (22/03).
Objetivu husi enkontru ne’e, atu deskuti regulamentu ba Sentru Desportu Akadémiku nian inklui atividade desportu sira ne’ebé sei implementa iha futuru, antes ne’e estudante UNTL sira partisipa ona iha kompetisaun desportu no sira konsege hetan mellór klasifikasaun. 
Partisipa husi Visereitora ba Asuntu Estudantís, Eng.ª Lígia Tomás Correia, M.Sc, Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas no Dekanu sira.
Média UNTL 📝 : Leonia de A. Da Costa
Foto 📷 : Denilson A. Barros
- Detalhes
- Visualizações: 436
#TimorLeste #UNTL #DNAE #MESSK #COVID19 #COVID19TL 22 MARSU 2022
Universidade Nacional Timor Lorosa’e (UNTL) liuhusi Diresaun Nasionál Atendimentu Estudante (DNAE), rejista ona estudante foun tinan akadémiku 2022 nian na’in rihun haat atus neen ruanulu resin tolu (4.623) no selu propinas husi totál admitidu na’in 6.007 ne’ebé publika husi Ministériu Ensinu Superiór, Siénsia no Kultura (MESSK) iha 25 Fevereiru 2022 liubá. 
Diretór DNAE nian, Sr. Rui Loco Pires, iha Kampus Sentral UNTL nian, Díli (22/03) hateten rejistrasaun ba estudante foun sira, hahú iha loron 7 fulan Marsu to’o 24 Marsu no sira ne’ebé rejistu no selu ona propinas hamutuk 4.623.
“Estudante foun ne’ebé publika ona husi MESSK hamutuk 6.007, agora sira ne’ebé rejistu propinas hamutuk 4.623 no husi númeru ne’e, sira ne’ebé mai hatama ona dokumentu iha Sistema Akadémiku nian atu halo númeru rejistu estudante (NRE) foin estudante 3.968 mak mai submete dokumentu, falta 655”, tenik Sr. Rui Loco. 
Bazeia ba totál estudante na’in 4.623 ne’ebé rejistu ona ho reprezentasaun 77%, husi estudante admitidu asesu ba universidade nasionál tinan akadémiku 2022 hamutuk na’in 6.007, no seidauk rejistu hamutuk 1.384 ho reprezentasaun 23%.
Dadaun ne’e Diresaun Nasionál ba Atendimentu Estudante (DNAE) sei kontinua fó atendimentu ba estudante sira ne’ebé seidauk rejistu to’o 24 Marsu 2022, iha lokál ne’ebé antes ne’e fó sai ona. 
Média UNTL 📝 : Laurindo da Cruz Gomes
Foto 📷 : Laurindo da Cruz Gomes/ Altur Ramos
- Detalhes
- Visualizações: 452
#TimorLeste #UNTL #FAGRI #COVID19 #COVID19 24 Marsu 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, hamutuk ho estrutura no funsionáriu, presta omenajen ikus ba matebian Eng. Osório Fernandes Verdial, M.Agr.Sc, iha nia rezidénsia Bemori, Díli (23/3).
Matebian hanesan dosente iha Universidade Nacional Timor Lorosa’e Fakuldade Agrikultura (FAGRI), nia Departamentu Agronomia , dezde inísiu ezisténsia UNTL nian iha tinan 2000 to’o hakotu nia jornada moris iha mundu iha 23 marsu 2022.
Patisipa iha presta omenajen ne’e, Visereitora ba Asuntu Estudantis, Profesora Eng.ª Lígia Tomás Correia, M.Sc, Diretór-Jerál Servisu Apoiu Reitória, Sr. Jacinto H.S. Belo, M.EGA.Egn, dosente, funsionáriu no estudante sira.
Biodata **
Matebian ho naran kompletu Eng. Osório Fernandes Verdial, M.Agr.Sc, moris iha loron 10 Jullu 1964 iha Suku Bemori, Postu-Administrativu Na’in Feto, Munisípiu Díli no fila hikas ba Aman-Maromak iha 23 marsu 2022, ho idade 58. Profesór matebian husik hela fen kaben Sra. Elizabeth Roza Branco Oliveira Verdial, ho oan na’in 6 (Mane 4 no feto 2).
Kualifikasaun Akadémika:
Eng. Verdial, hahú eskola Pre-Primária iha Eskola Santa Maria Ainaro (1970-1974), Primaria iha (SD Negeri VIII), Dili (1978-1979), Pre-Sekundáriu (SMP Negeri Ainaro, 1979-1982), Eskola Profesional Dezenvolvimentu Agrikultura (SPP-SNAKMA, Malang Java Leste Indonesia, 1982-1985).
Kontinua ba hasai kursu lisensiatura iha área Teknolojia Produsaun Agrikola iha Universidade Katolika “Widya Karya”, Malang-Jawa Leste Indonesia (1985-1991). Mestradu iha area Teknolojia Agrikultura, iha Universidade Gadjah Mada (2005-2007).
Dedikasaun
Bainhira sei moris, matebian hanesan dosente iha Fakuldade Agrikultura Departamentu Agronomia dezde 2000, no hetan fiar husi universidade hodi asumi kargu hanesan Diretór Departamentu Agronomia-FAGRI (2008-2013). Iha toman 2014 hetan fiar husi Universidade hodi asumi knaar hanesan Koordenadór Konferénsia Sientífika Investigasaun, Kooperasaun no Desenvolvimentu País Língua Portuguesa, Kooperasaun entre UNTL ho Universidade do Minho,
Iha 2015, matebian asumi mós knaar hanesan prezidente painel jurí prémiu nutrisaun iha Casa Civil Presidente Repúblika-RDTL.
Durante tempu okupasaun Indonézia matebian asumi kargu hanesan Diretór Eskola Téknika Agríkola Maubisse 1994-1999, Diretór Eskola Públika Tékniku Agríkola Natarbora-Manatuto, Abril-Agostu 1999.
Haree husi esperiénsia no dedikasaun ba universidade nasionál, matebian husik hela nia família no Sívitas Akadémika tomak iha loron 23 fulan Marsu 2022.
Agradese ba dedikasaun tomak. Adeus Eng. Osório👏.
Média UNTL 📝 : Denilson Amandio Barros
Foto 📷 : Agostinho da Cruz e Silva
- Detalhes
- Visualizações: 437
#TimorLeste #UNTL #COVID19 #COVID19TL 16 Marsu 2022
Universidade Nacional Timor Lorosa'e (UNTL) nia Magnífiku Reitor Profesór Dr. João Soares Martins MPH,Ph.D, prezide reuniaun Xefias UNTL de nian, hodi rona aprezentasaun kona-ba Planu Operasionál UNTL 2022 to'o 2026, ne'ebé hato'o husi Proreitor ba Asuntu Planeamentu, Monitorizasaun no Avaliasaun, Profesor José Nelson Salsinha, Ph.D, iha sala Vídeo Konferénsia UNTL Díli, (16/03). 
Objetivu husi enkontru semanál ne'e, hodi aprezenta no analiza proposta planu operacional ne'ebé kada responsabilidade atu implementa ba períodu 2022-2026, atu uza hanesan matadalan ba estrutura tomak universidade nian. 
Partisipa iha enkontru ne'e, eis Reitor Profesor Aurelio Guterres, Ph.D, ne'ebé hola parte iha elaborasaun Planu Operasionál nian, Visereitór, Proreitor, Diretór Sentru, Diretór Nasional no Dekanu Fakuldade sira.
Média UNTL 📝 : Leonia de A. da Costa
Foto 📷 : Laurindo da Cruz Gomes