#TimorLeste #UNTL #VRAPGP #MESSK #MS #COVID19 #COVID19TL 11 Marsu 2021
Universidade Nacional Timor Lorosa’e (UNTL), nia Magnífiku Reitór Profesór dr João Soares Martins MP.H Ph.D, lansa kursu nível Pós-Graduasaun no Mestradu iha área lima (5), ba tinan akadémiku 2022 nian, iha Auditóriu Fundasaun Oriente nian, Díli (09/03). 
Magnífiku Reitór hateten, ohin halo lansamentu ba kursu Pós-Graduasaun no Mestradu sira iha UNTL, ne’ebé organiza husi Programa Pós-Graduasaun no Peskiza UNTL nian, ho kursu hamutuk lima ne'ebé universidade oferese iha tinan akadémiku 2022.
“Ohin lansa kursu Pós-Graduasaun iha Area Klínika ba Médiku (Espesialidade Oftalmolojia) no Mestradu iha Estudus ba Dame no Konflitu, Ensinu Portugés iha Kontestu Timor-Leste, Matemátika ba Profesór no Medisina Tropikál no Saúde Komunitária”, tenik Reitór. 
Iha fatin hanesan, Ministru Ensinu Superiór, Siénsia no Kultura, S.E. Longuinhos dos Santos, hato’o felisitasaun ba Universidade tanba bele lansa kursu Pós-Graduasaun no Mestradu nian, ne’ebé sosiedade hein hela.
“’Lori MESSK nia naran hakarak hato’o felisitasaun ba UNTL nia lideransa tomak, tanba ohin lansa kursu mestradu, siénsia sira ne’e mak sosiedade hein hela, Universidade Públika iha Timor-Leste ne’e UNTL de’it, entaun tenke iha estratéjia hodi kontribui ba dezenvolvimentu nasionál”, hatutan MESSK.
Partisipa iha eventu ne’e, Visereitór, Proreitór, Eis-Reitór, Dekanu, Diretór Jerál, Diretór Nasional, Ministra Saúde, S.E Odete Maria Freitas Belo, Prezidente Komisaun Funsaun Públika, Dr. Faustino Cardoso Gomes, no Konvidadu sira. 
Média UNTL 📝 : Leonia de A. da Costa
Foto 📷 : Leonia de A. da Costa