#TimorLeste #UNTL #g7+ #COVID19 #COVID19TL 15 Marsu 2022
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins, MPH, Ph.D, asina Memorandu Entendimentu ho Sekretáriu Jeral g7+, Dr. Helder da Costa, hodi implementa servisu hamutuk iha área tolu, relasaun ho atividade peskiza, estájiu no semináriu nian.
Iha Sede Sekretariadu g7+ nian, Díli (15/03), Magnífiku Reitór agradese ba oportunidade ne'ebé g7+ fó hodi konvida komunidade akadémika atu servisu hamutuk.
"Asina memorandu ne'e importante tebes, nomós agradese ba nasaun sira ne'ebé hola parte iha grupu ida ne'e (g7+), hodi fó imajen kona-bá situasaun país sira-nian relasiona ho peskiza, estájiu no semináriu", tenik Reitór.
Reitór hatutan, envolvimentu universidade nian importante atu bele komunika ho komunidade akadémika no peskizadór sira husi nasaun seluk. 
Iha fatin hanesan, Sekretáriu Jerál g7+, Dr. Helder da Costa, hateten, g7+ selebra akordu estratéjiku entre instituisaun rua tamba, UNTL nu’udar úniku universidade estatál iha Timor-Leste, tanba ne’e MoU refere ho durasaun tinan lima (5).
"Ami hakarak agradese ba UNTL ne'ebé fo fiar mai g7+ ho orgullu bo'ot bele halo parseiru ida ne'e, nune’e ita bele halo buat barak iha ita-nia rain Timor-Leste, liuliu iha área formasaun akadémika nian, liuliu programa estájiu, peskiza no semináriu”, hatutan Dr. Helder.
Partisipa iha asina akordu ne'e Visereitór, Proreitór, Dekanu, Diretór m-Jerál, Dosente, ekipa husi g7+, no estájiáriu sira husi Universidade Díli (UNDIL), FDCH, RYLA no konvidadu sira.
Média UNTL 📝 : Denilson Amandio Barros
Foto 📷 : Laurindo da Cruz Gomes, Denilson A. Barros