- Detalhes
- Visualizações: 399
#TimorLeste #UNTL #FCS #COVID19 #COVID19TL 26 Novembru 2021
Universidade Nacional Timor Lorosa’e (UNTL) liuhusi Fakuldade Siénsia Sosiál (FCS) realiza Semináriu Nasionál hodi komemora loron Proklamasaun Independénsia RDTL ba 46, 28 Novembru 1975- 28 Novembru 2021, hodi konvida oradór nasionál sira partilla hanoin ba sivitas akadémika universidade nasionál nian iha Kampus Kaikoli UNTL nian, Díli (25-11). 
Iha abertura, Magnífiku Reitór Profesór dr. João Soares Martins MPH, PhD, hateten semináriu refere marku importante ida atu hanoin hikas fali loron proklamasaun independénsia RDTL nian ba dala 46.
“Ohin loron importante atu hanoin fila fali istória ita-nia fundadór sira halo iha 28 Novembru 1975 liubá, ita orgullu tanba ita-nia sasin no autór ida iha altura ne’ebá Dr. José Ramos Horta ne’ebé sei partilla hanoin ruma ba ita no hafanun joven universitáriu sira atu haree valor sira ne’ebé mak uluk ita-nia avó, ita-nia aman, luta-na’in sira barani, no determinasaun proklama independénsia”, hatutan Reitór.
Iha aprezentasaun, Dr José ramos Horta hato’o katak, komunidade internasionál apresia Timor-Leste, no Estadu Unidus Amérika, Uniaun Europeia kompriende situasaun polítika Timor-Leste nian.
“Komunidade internasionál hatene prosedimentu ne’ebé ita-nia Prezidente Repúblika, Parlamentu Nasionál, Tribunál implementa baze ho ita-nia Konstituisaun iha hatuur kontekstu demokrasia nian, no garante direitus humanus, seguransa no estabilidade iha prosesu demokrátiku laiha segrese iha orgaun soberánia ida”, dehan Dr. Horta.
Premiadu Nobél ba Pás ne’e husu ba Sívitas Akadémika sira atu observa ho maturidade akadémiku no kontribui ba situasaun iha kualker tempu rai laran nian. 
Iha fatin hanesan, Ministru Prezidensia Konsellu Ministru Fidelis Leite Magalhães hateten katak, dezde Covid-19 ba dahuluk afeta iha Timor-Leste, Governu hola dezafiu no desizaun hodi asegura sidadaun hotu nia vida.
“Dezde marsu 2020, ita-nia Governu halo intervensaun oioin, ho objetivu asegura saúde públika ba sidadaun hotu, maské to'o ohin loron iha krítika husi parte oioin maibé ita konsege ultrapassa situasaun ida ne'e, ita bele haree ohin imi bele aula fila fali”, hatutan Ministru.
Governante ne'e mós apresia katak, mezmu iha situasaun desífil maibé akadémiku, liuliu estudante sira kontribui tebes, ne dezesa katak ba ba oin sei kontribui di'ak liután. 
Eventu refere konstitui ho sesaun dader Dr. José Ramos Horta, ko’alia kona-ba Perspetiva Komunidade Internasionál ba Ezisténsia VIII Governu, Dr. Fidelis Leite Magalhães, atuál Ministru Presidénsia Konsellu Ministru hato’o kona-ba Implementasaun Programa VIII Governu iha ámbitu pandemia COVID-19.
Iha sesaun lokraik nian, Sr. Aderito Hugo da Costa, reprezentante Partidu CNRT, hato’o kona-ba knar opozisaun iha Parlamentu Nasionál ba kontrola Implementasaun VIII Governu iha durante pandemia COVID-19, Sr. Adriano do Nascimento, Deputadu husi Bankada Opozisaun (Knaar PN ba fiskalizasaun programa VIII Governu iha situasaun pandemia COVID-19), no Prof. Dr. Alarico da Costa Ximenes (perspetiva akadémika ba implementasaun programa VIII Governu iha pandemia COVID-19).
Eventu komemorativu ne'e Media Komunikasaun UNTL no Diresaun Nasionál Informasaun no Teknolojia (DNIT) no apoiu husi Telkomsel halo live-streaming liuhusi www.facebook.untl.edt.tl no audiénsia bele asesu husi uma.
Partisipa husi Visereitor Asuntu Estudantís, Profesora Eng.ª Lígia Tomas Correia, M.Sc, estrutura fakuldade nian, dosente, funsionáriu, estudante, no konvidadu sira. 
Média UNTL 📝 : Miguel Gonçalves
Foto 📷 : Leonia da Costa Araújo, Pio Ximenes, Miguel Gonçalves
- Detalhes
- Visualizações: 279
#TimorLeste #UNTL #VRAE #FDA-TL 27 Novembru 2021
Universidade Nacional Timor Lorosa’e (UNTL) nia estudante manan tasa hamutuk 32, inklui tasa rotativa iha kompetisaun Desportu Akadémiku Timor-Leste (FDA-TL) ho modalidade 5 hanesan, Futebol, Volleybal, Xadres, Taekwondo, no Atletizmu.
Objetivu husi jogu FDA-TL ne’e, atu selesiona jogadór sira ne’ebé sei partisipa iha eventu ASEAN University Games iha Tailandia tinan oin, jogus ne’e partisipante husi Universidade no Institutu hamutuk sanulu resin lima (15) ne’ebé eziste iha Timor-Leste.
Responsavél ba ekipa UNTL nian, Sr. José de Jesus dos Santos, iha Gabinete VRAE, Kampus Sentrál (26/11) hateten, husi modalidade 5 ne’e ekipa universidade nasionál nian partisipa hotu no konsege manan tasa barak liu, duke universidade no institutu sira seluk.
“UNTL partisipa iha modalidade lima, mak hanesan futebol mane, xadres feto-mane, volleybal feto-mane, taekwondo feto-mane, atletizmu feto-mane, rezultadu husi jogu ne’e UNTL hetan prémiu hamutuk tolunulu resin inklui tasa rotativa ida”, tenik atual Xefe Departamentu ba Atividade Extra-kurikulár-GVRAE.
Sr. Jose mós hatutan, nia parte enkontru ona ho Vise-Reitora ba Asuntu Estudantís atu realiza serimónia agradesimentu no apresiasaun ba estudante hirak ne’ebé presta ona sira-nia partisipasaun ho rezultadu exelente iha eventu refere.
Iha atividade enseramentu partisipa direita husi, Magnífiku Reitór UNTL, Profesór dr. João Soares Martins, MPH, Ph.D akompaña husi Visereitora ba Asuntu Estudantís, Profesora Eng.ª Lígia Tomás Correia, M.Sc, ho funsionáriu no estudante sira.
Média UNTL 📝 : Agostinho da Cruz e Silva
Foto 📷 : Agostinho da Cruz e Silva
- Detalhes
- Visualizações: 269
#TimorLeste #UNTL #VRAE #FCS #JicaTimorLeste #KoicaTimorLeste #PeaceCorps #AVI #UNVolunteer #COVID19 #COVID19TL 26 Novembru 2021
Universidade Nacional Timor Lorosa’e (UNTL), liuhusi Visereitoria ba Asuntu Estudantís (VRAE) servisu hamutuk ho Ajénsia Voluntáriu sira realiza semináriu ho tema “Volunteer Now For Our Common Future", iha Kampus Fakuldade Siénsia Sosiál (FSS), Kaikoli UNTL nian, Díli (24/21).
Ajénsia Voluntáriu Internasionál sira mak hanesan, Ajénsia Kooperasaun Internasional Japaun (JICA), Korea International Cooperation Agency (KOICA), UN Volunteer, Australian International Volunteer, Peace Corps Timor-Leste. 
Objetivu husi Semináriu ne’e atu fahe informasaun ba estudante sira, liuhusi servisu voluntáriu no motiva atu kontinua nafatin saida maka bele halo iha terenu, nomós servisu voluntáriu hanesan ezemplu di’ak ba sosiedade nune’e eleva koñesimentu ho espíritu voluntáriu nian.
Partisipa iha semináriu ne’e, Visereitora ba Asuntu Estudantís, Profesora Eng.ª Lígia Tomás Correia, M.Sc, dosente, no reprezentante estudante husi Fakuldade Direitu (FD), Fakuldade Edukasaun, Arte no Umanidade (FEAH), Fakuldade Siénsia Sosiál (FCS), funsionáriu no konvidadu sira.
Média UNTL 📝 : Denilson Amandio Barros
Foto 📷 : Denilson Amandio Barros
- Detalhes
- Visualizações: 334
#TimorLeste #UNTL #FECT #COVID19 #COVID19TL 26 Novembru 2021
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins, MPH, Ph.D, halo abertura aprezentasaun no diskusaun ba estatutu universidade nian ne’ebé elabora husi ekipa ne’ebé lidera husi Profesór Tomé Xavier Jerónimo, iha Auditóriu Hera, FECT-UNTL, Díli (26/11).
Objetivu husi eventu ne’e mak ekipa traballu ba avaliasaun nian aprezenta progresu servisu ne’ebé revé estatutu universidade nian, liuhusi Dekretu Lei Nu. 16/2010, ne’ebé aprova iha 20 Outubru 2010. 
Hafoin aprezentasaun ba estrutura UNTL nian Magnífiku Reitór, Visereitór, Proreitór, Dekanu, Diretór-Jerál, Diretór Nasional, Diretór Akadémiku, Xefe Departamentu Administrasaun, Asosiasaun Estudante Fakuldade nian. Iha diskusaun elabora ideia sira ba esbasu revizaun refleta ba Misaun, Vizaun no Valór UNTL nian.
Média UNTL 📝 : Leonia de A. da Costa
Foto 📷 : Leonia de A. da Costa
- Detalhes
- Visualizações: 659
#TimorLeste #UNTL #FEG #COVID19 #COVID19TL 25 Novembru 2021
Universidade Nacional Timor Lorosa’e (UNTL) liuhusi Fakuldade Ekonomia i Jestaun (FEG) nia Klibur Alumni FEG nian (KAFEG), organiza Semináriu Internasionál ho tema “Polítika VIII Governu ba Diversifikasaun Ekonomia” iha Kampus FEG UNTL nian, Díli (24/11)
Dekanu FEG nian, Profesór Custódio Barata Ximenes, MRIE, hateten, semináriu ne'ebé realiza ho objetivu atu fahe informasaun kona-ba lala'ok VIII Governu nian ba diversifikasaun ekonomia ba estudante sira.
“Objetivu prinsipál hakarak konvida oradór sira, mai fahe informasaun kona-ba lala'ok VIII Governu Konstitusionál ba estudante sira relasiona ho knar ne’ebé mak sira assume hela, tanba oradór (atual Vise-Ministru Komérsiu Indústria) ne’ebé refleta kona-ba diversifikasaun ekonomia iha Timor-Leste”, tenik Dekanu FEG.
Dekanu mós hatutan, objetivu seluk mak atu enkoraja estudante sira atu estuda maka’as ba futuru bele kontribui ba dezenvolvimentu nasaun nian.
Iha fatin hanesan, Oradór Prinsipal, atuál Vise-Ministru Komérsiu Indústria, S.E. Domingos Lopes Antunes, agradese ba KAFEG ne’ebé bele organiza eventu akadémiku refere hodi partilla hanoin kona-ba polítika governu nian iha diversifikasaun ekonomia ba estudante sira.
“Ita ko'alia kona ba ekonomia, ko'alia kona-ba negósiu, ita ba impresta osan iha banku sira atu halo ita nia negósiu, ita tenki esplika klaru kona-ba ita foti hira no atu hatama fali hira, no ita atu halo saida, agora dadauk ami bele fasilita imi maibé tenki imi-nia planu negósiu ne’e tenki klaru, ezemplu iha BNCTL ita foti kréditu bele hatama fulan tolu dala ida” tenik Vise-Ministru.
Governante ne’e mós motiva estudante sira atu kria rasik sira-nia negósiu liuhusi faan etu no loke kafetaria hanesan dadaun ne'e iha Kampus FEG no bele fó benefísiu ba sira hodi aprende no peskiza.
Iha fatin hanesan, Prezidente Klibur Alumni Fakuldade Ekonomia i Jestaun (KAFEG), Sr. Elvino Alves Correia, hateten KAFEG iha papel atu apoiu Fakuldade no presiza fahe informasaun polítika VIII Governu nian ba diversifiksaun ekonomia iha Timor-Leste liuliu hasoru pandemia COVID-19.
“Ita ko'alia kona-ba ekonomia, no ita-nia polítika ne’ebé hala’o bele rekupera liuhusi setór produtivu no ita hahú investe liuhusi negósiu kiik sira, no ita husu atu sira bele rejistu no bele serve, hodi hetan dadus ne’ebé loloos atu nune’e ita hasoru risku ruma ba ekonomia ita bele identifika problema sira”, dehan Correia.
Partisipa iha semináriu ne'e, estrutura Fakuldade nian, dosente, funsionáriu, estudante, reprezentante alumni sira, no konvidadu sira. 
Média UNTL 📝 : Laurindo da Cruz Gomes
Foto 📷 : Laurindo da Cruz Gomes