- Detalhes
- Visualizações: 434
#TimorLeste #UNTL #FAGRI #COVID19 #COVID19TL 23 Dezembru 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D no Ministru Ensinu Superiór, Siénsia no Kultura (MESSK) S.E. Longuinhos dos Santos, lansa fatuk dahuluk ba kontrusaun edifísiu foun Fakuldade Agrikultura (FAGRI) nian, iha Kampus Hera (23/12).
Liuhusi diskursu, Magnífiku Reitór agradese ba parte hotu ne’ebé esforsu makas iha prosesu naruk dezde 2017 husi Reitór sesante (Profesór Doutór Fracisco Miguel Martins, M.Hum) nia mandatu no iha 2021 Universidade konsege inísia prosesu konstrusaun.
“Ita hotu espera katak ho konstrusaun edifísiu foun ida ne’e, atu bele halo di’ak liután ba ita-nia estudante no profesór sira atu bele servisu makas liután hodi kontribui ba dezenvolvimentu iha Timor-Leste nian, liuliu iha área Agrikultura nian”, tenik Reitór.
Iha fatin hanesan, MESSK S.E Longuinhos dos Santos hateten, atu garante kualidade di’ak presiza hadi’a uluk infraestrutura hodi prepara ba prosesu ensinu aprendizajen ida ho di’ak’. 
”Hato’o ha’u nia parabéns ba Magnífiku Reitór ho estrututura tomak ne’ebé mak halolon prosesu tomak husi estrutura anteriór no atuál, ohin ita konsege realiza lansamentu ida ne’e”, dehan Ministru Ensinu Superiór, Siénsia no Kultura (MESSK).
Iha fatin hanesan, Proreitór ba Asuntu Dezenvolvimentu Instituisional (PRADI), Profesór Lelis Gonzaga Fraga hateten, PRADI nia estrutura sesante halo ona levantamentu dadus, dezeñu tékniku sira halo aprezentasaun iha Ministeriu Finansas iha fulan Outubru 2020.
“Kontrusaun ne’e sei konstrui edifísiu tolu (building 1 to’o 3) ho medida kada edifísiu ho metro 17X43, kada edifísiu ho saladeaula 16, hosi edifísiu tolu ne’e ho totál saladeaula hamutuk 48, kada aula akumula estudante másimu 35”, tenik.
Profesór Lelis salienta liután katak, konstrusaun refere ho kustu milaun ida rihun atus ualu sianulu resin ida, atus neen haatnulu resin ualu, sentavu sianulu ($1,891,648.90) fahe ba edifísiu I, responsabiliza husi kompañia Gani Star, Lda ho kustu ($655, 395.42), edifísiu II Bobolait Lda ho kustu ($630,916.64), no konstrusaun ba edifísiu III kompañia Gani Star, Lda ho kustu ($605, 335.84).
Partisipa iha serimónia ne’e Ministru Agrikukultura, S.E. Pedro Reis, Visereitór no Proreitór sira, Diretór-Jerál sira ho estrutura, Diretór Nasionál sira ho estrutura, Diretór Sentru sira, Dekanu Fakuldade sira ho estrutura, estudante sira, autoridade lokál no konvidadu sira. 
Média UNTL 📝 : Altur Ramos
Foto 📷 : Denilson A. Barros, Leonia de A. da Costa
- Detalhes
- Visualizações: 311
#TimorLeste #UNTL #WFP #COVID19 #COVID19TL 22 Dezembru 2021
Universidade Nacional Timor Lorosa’e (UNTL), nia Magnífiku Reitór, Profesór dr. João Soares Martins, MPH, Ph.D, ho Organizasaun ba Aihan Mundiál (Word Food Program-WFP) iha Timor-Leste, nia Emergency Coordinator, Sr. Ashley James Rogers, asina Memorandu Entendimentu hodi implementa programa formasaun ba estudante sira no peskiza konjunta.
“Akordu antes ne’e iha tiha ona, maibé liu ona prazu, tanba ne’e renova fila fali hodi permite kontinua kooperasaun servisu entre UNTL ho WFP, ho foku liubá hasa’e kapasidade estudante sira, liuliu sira bele envolve iha projetu peskiza konjuntu iha área nutrisaun no merenda eskolár nian”, tenik Reitór iha Sala Vídeo Konferénsia Kampus Sentrál nian, Díli (22/12).
Magnífiku Reitór hatutan, WFP kolabora ho UNTL kona-ba implementasaun programa Nutrisaun no Merenda Eskolar ne’e, tanba estudante mak futuru nasaun nian, nune'e tenki kontribui ba prevene mal-nutrisaun ba labarik sira.
Iha fatin hanesan, WFP nia Emergency Coordinator, Sr. Ashley James Rogers, hateten, objetivu husi asina MoU ne’e kona-ba servisu hamutuk entre WFP ho UNTL iha programa peskiza, seguransa alimentar, servisu estensionista relasiona ho merenda eskolar nian.
“Ita koopera hodi implementa programa ne’e, tanba estudante sira mak jerasaun foun ba sosiedade iha nasaun ida, tanba ne’e asuntu seguransa alimentar, servisu estensionista, no peskiza ne'e importante tebes”, dehan Coordinator James.
Partisipa husi Visereitór ba Asuntu Akadémika no Garantia Kualidade, Profesór Doutór Samuel Venâncio de Sousa Freitas, Visereitora ba Asuntu Estudantís, Profesora Eng.ª Lígia Tomás Correia, M.Sc, Proreitora ba Asuntu Kooperasaun, Profesora Doutora Lídia Gomes, no ekipa WFP iha Timor-Leste, no konvidadu sira.
Média UNTL 📝 : Leonia de A. da Costa
Foto 📷 : Laurindo da Cruz Gomes
- Detalhes
- Visualizações: 300
#TimorLeste #UNTL #PNTL #COVID19 #COVID19TL 22 Dezembru 2021
Universidade Nacional Timor Lorosa’e (UNTL) nia Visereitora ba Asuntu Estudantís servisu hamutuk ho Polísia Nasionál Timor-Leste (PNTL) halo enseramentu ba programa Edukasaun Sívika kona-ba “Kultura Hadomi Vida”, iha nível universitáriu, iha Auditóriu FECT nian, Díli (21/12).
Reprezentante Magnífiku Reitór, Profesór Dr. Samuel Venâncio de Sousa Freitas, iha enseramentu ne’e hateten, "Kultura Hadomi Vida" ne’e, importante tebes ba nasaun hotu, liu-liu sinais tránzitu, tanba ne’e forma ida atu kumpre regra tránzitu nian.
“Agradese ba PNTL tanba bele fasilita edukasaun sívika "Kultura Hadomi Vida" ba estudante sira iha nível universitáriu, no husu atu bele kontinua formasaun ida ne’e kada tinan, tamba estudante foun sira sempre aumenta no balu mai husi munisípiu, nune’e presiza mós formasaun ida ne’e,” tenik Visereitór ba Asuntu Akadémiku no Garantia Qualidade.
Iha fatin hanesan, Segundu Komandante Jerál PNTL, Komisáriu Mateus Fernandes, hateten, Timor-Leste ne’e potensia tebes no joven sira mak xave, joven sira konsentra iha universidade entaun universidade mak responsabilidade boot atu fasilita sira.
“PNTL iha papel atu bele proteje ema no kada relatóriu mensál, ami haree labarik sira mate iha asidente ho motór husi 7-21 pesoas no sira ne’e tanba laiha lisensa no kontra regra, laiha dokumentu, ita haree husi rezultadu sira ne’e katak ameasa boot ba joven”, dehan Komisáriu Mateus .
Iha fatin hanesan, Xefe Departamentu Polisiamentu Komunitáriu Nasionál (POLCON), Superintendente Polísia António da Luz, hateten programa ida ne’e atu konsiensializa foinsae sira. 
“Objetivu husi programa ne’e atu konsensializa joven sira, atu bele respeita no hadomi sira nia vida no hadomi mós ema seluk nia vida, eduka sira atu komprende kona-ba Lei no.6/2003 kona-ba Kódigu Estrada nian”, tenik.
Iha programa ne’e PNTL halo kooperasaun ho UNTL, UNPAZ, UNDIL, UNITAL, DIT, IOB, ISC, ISFIT no IPDC hodi fo formasaun no fasilita estudante sira hetan kartaun kondusaun no fahe mós sertifikadu ba universidade sira, formadór no dosente.
Partisipa iha seremónia ne’e, Visereitora ba Asuntu Estudantís, Profesora Eng.ª Lígia Tomás Correia, M.Sc. Membru Polísia, dosente, no estudante sira.
Média UNTL 📝 : Laurindo da Cruz Gomes
Foto 📷 : Laurindo da Cruz Gomes
- Detalhes
- Visualizações: 283
#TimorLeste #UNTL #VRAAGQ #MESSK #COVID19 #COVID19TL 22 Dezembru 2021
Universidade Nacional Timor Lorosa’e (UNTL) nia Visereitór ba Asuntu Akadémiku no Garantia Qualidade (VRAAGQ), Profesór Doutór Samuel Venâncio de Sousa Freitas, iha Auditóriu UNTL nian, Díli hateten universidade haruka ona lista ho total finalista na’in atus neen haatnulu resin rua (642) ba Ministériu Ensinu Superiór, Siénsia no Kultura (MESSK) hodi omologa ba graduasaun. 
“Lista estudante sira ne’e haruka ona MESSK iha 24 novembru no sei fó resposta durante fulan ida, ita hein hela omologasaun, tanba kuandu seidauk iha omologasaun ita seidauk bele halo graduasaun, nune’e mak data provizóriu ba graduasaun iha 28 Dezembru 2021”, tenik Visereitór.
Profesór Samuel mós hatutan, parte universidade hein hela informasaun husi MESSK no desizaun kona-ba omologasaun buat hotu los ona laiha irregularidade mak foin halo graduasaun.
Rejistu ba graduasan tinan ida ne’e ba periodu XXV kompostu husi Fakuldade sira iha UNTL (menus Fakuldade Siensia Ezata) no estudante sira hamutuk 642, no graduasaun possibilidade sei hala’o iha Fakuldade Engeñaria, Siénsia no Teknologia (FECT) Hera-Díli, no bele mós iha Sentru Konvensaun Dili (CCD).
Média UNTL 📝 : Laurindo da Cruz Gomes
Foto 📷 : Altur Ramos
- Detalhes
- Visualizações: 301
#TimorLeste #UNTL #MESSK #Aileu 22 Dezembru 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, akompaña husi Visereitór no Proreitór sira partisipa iha Lansamentu Ofisiál tau fatuk dahuluk ba Sidade Universitáriu Aileu ne’ebé lokaliza iha Suku Lauhisi, Postu Administrativu Aileu Vila, Munisípiu Aileu (21/12).
Sidade Universitáriu Aileu ne’e sei hahú konstrui iha tinan 2022, no tuir dezeñu ne’ebé mak iha sei kompleta ho fasilidade sira ba ensinu aprendijazen, rezidénsia ba dosente no estudante sira ne’ebé modernu.
Partisipa iha serimónia lansamentu ne’e Visereitór ba Asuntu Pósgraduasaun no Peskiza, Profesór Doutór Afonso de Almeida, Proreitór ba Asuntu Planeamentu, Monitarizasaun no Avaliasaun, Profesór Nelson Salsinha, Ph.D, Proreitór ba Asuntu Dezenvolvimentu Institusionál, Profesór Doutór Lelis Gonzaga, Diretór-Jerál ba Servisu Apoiu Reitoria, Sr. Jacinto H. S. Belo, Membru Governu, Membru Parlamentu Nasional, Relijiozu, Autoridade Munisípiu Aileu no Autoridade Lokál sira.
Média UNTL 📝 : Agostinho da Cruz e Silva
Foto 📷: Agostinho da Cruz e Silva