- Detalhes
- Escrito por Mateus Goncalves
- Visualizações: 8842
#TimorLeste #UNTL #FAGRI 17 Fevereiru 2021
Universidade Nacional Timor Lorosa’e (UNTL), simu vizita ikus matebian Henrique Mau Doben da Costa nia isin mate iha kampus Sentral , UNTL nian (17/02) hodi presta omenajen ikus husi Magnífiku Reitór Profesór Doutór dr. João Soares Martins, MPH, Ph.D ho nia estrutura tomak, Amu Kapelaun Pe. Nívio Lebre Correia Fdcc, no Sívitas Akadémika tomak.
Iha vizita ne’e Sívitas Akadémika tomak ho matanben tanba lakon ona manorin na’in di’ak ida husi Fakuldade Agrikultura, Departamentu Agronomia, profesór ne’ebé dedika dezde inísiu Universitas Timor Timur (UNTIM) no Politéknika Hera ne’ebé ikus mai transforma ba UNTL.
Magnífiku Reitór hateten katak ho Matebian nia dedikasaun lori ona tempu naruk iha universidade hanesan patrimóniu ida ba UNTL.
“Ohin ita hotu-hotu iha ne’e atu hato’o ita-nia omenajen ikus ba ita-nia Profesór Henrique Mau Doben da Costa ne’ebé husik ona ita, dalan ne’ebé ita hotu-hotu tenki liu, tanba ninia dedikasaun iha ne’e mós kleur nia hanesan patrimóniu ba universidade nian”, tenik Reitór.
Reitór hatutan nia kontribuisaun bo’ot hanesan dosente ema barak ona mak liuhusi nia hodi hetan siensia tanba ne’e hotu-hotu atu kontinua obra ne’ebé nia husik hela, hakarak enkoraja mós ba família katak nia isin laiha ona iha mundu maibé domin hela nafatin ho família sira.
Biografia matebian Henrique Mau Doben da Costa:
Henrique Mau Doben da Costa moris iha loron 31 fulan Agostu 1965 iha Limanaru, suku Aidabaleten, postu-adminisitrativu Atabae, munisípiu Bobonaro. Henrique Mau Doben nu’udar oan primeiru husi aman Felix Bau Laka no inan Felisberta Lepa Bau, maun husi feton ida no maun alin na’in hitu.
Iha tina 2000, liubá Profesór Mau Doben hari’i uma-kain ho Carmina dos santos husi suku Bogoro, Postu Administrativu Bazartete, husi domin sira na’in rua nian kous oan na’in tolu, Nigela Romana dos Santos da Costa, Tifania da Costa Pereira no Lexy Geofania Gabriel Mau Doben Costa.
Edukasaun no esperiénsia:
Hahu eskola primária iha Eskola (Sekola Dasar Negeri) Atabae (1978 to’o 1983), Pre-Sekudariu (Sekolah menegah Pertama) Colégio Maliana, Sekundária (Sekolah Menegah Atas) Santo Petrus ne’ebé dadaun ne’e bolu São Pedro, kontinua iha Fakuldade Agrikultura Universitas Timor Timur (UNTIM) iha tinan (1990 to’o 1996). Mestradu iha área Fitotecnica/Agronomia iha Universidade Federal do Ceará, Brazil (2007 to’o 2009)
Hahú husi 1996 to’o 1997 Mau Doben nu’udar asitente dosente iha Departamentu Agronomia, iha Fakuldade Agrikultura UNTIM no hanorin materia Fisiolojia Aihoris no Teknolojia Fini (1997 to’o 1999).
Matebian nu’udar dosente iha (2003 to’o 2004), hanesan Visedekanu ba Asuntu Akademiku, (2009 to’o 2013), Visedekanu ba Asuntu Administrasaun (2015 to’o 2016) no iha kargu seluk sai mós Diretór Diretór Agronomia.
Iha tinan 2000 liu, Mau Doben mós hola parte iha tranformasaun UNTIM no Politeknika Hera ba Univerisdade Nacional Timor Lorsa’e, iha nia alamamater liuliu Departamentu Agronomia durante tinan 21, fahe ona no husik ona koñesimentu ba nia estudante sira, oituan ka barak mau doben kontribui Dezenvolvimentu.
Iha loron 16 fulan fevereiru 2021, Mau Doben termina nia jornada moris, hodi fila ba hamutuk ho aman Maromak iha mundu seluk.
Adeus Profesór Henrique maské isin la hamutuk ona ho dosente, estudante, família no maun alin sira maibé domin no siénsia sei kontinua nafatin ba nafatin.
Média UNTL 📝: Agostinho da Cruz e Silva
Foto 📸: Agostinho da Cruz e Silva
- Detalhes
- Escrito por Mateus Goncalves
- Visualizações: 10577
#TimorLeste #UNTL #PRAPA #FECT 17 Fevereiru 2021
Universidade Nacional Timor Lorosa’e (UNTL) nia Proreitór ba Asuntu Provedoria no Akonselhamentu, Profesór Tomé Xavier Jerónimo, hamutuk ho Amu Kapelaun UNTL nian, Padre Nívio Lebre Correia, Fdcc realiza misa Kuarta Feira Sinzas nian, iha Kapela São João Paulo II, ne’ebé lokaliza Fakuldade Enjeñaria, Siénsia no Teknolojia (FEST) UNTL nian, Hera, (17/02).
Hafoin misa, Magnífiku Reitór UNTL nian, Profesór dr. João Soares Martins, hato’o mensajen ba sívitas akadémika tomak katak universidade fó konfiansa ba Fakuldade FEST atu bele organiza nafatin Viasakra Dalan-Kruz hodi labele hamauk kapela durante Tempu-Kuarezma.
“Kontente tebes tanba ohin kapela ne’e nakonu ho estudante no sarani sira, espera iha Tempu-Kuarezma ne’e parte espirituál nafatin metin ba Maromak, nune’e mós Viasakra sira, ami ekipa reitorál fó konfiansa ba Fakuldade ne’e atu organiza Viasakra atu labele hamamuk Kapela durante Tempu-Kuarezma”, Tenik Reitór.
Misa ne’e hetan partisipasaun másimu husi Magnífiku Reitór, Visereitór, Proreitór, Dekanu Fakuldade Enjeñaria, Profesór Doutór Ruben Jerónimo Freitas, ho nia estrutura sira, estudante no no sarani sira.
Média UNTL 📝: Agostinho da Cruz e Silva
Foto 📷: Agostinho da Cruz e Silva
- Detalhes
- Escrito por Mateus Goncalves
- Visualizações: 14957
#TimorLeste #UNTL #SEJD 17 Fevereiru 2021
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins, MPH, Ph.D, akompaña husi Visereitór no Proreitór sira hala'o sorumutu ho Sekretáriu Estadu Juventude no Desportu (SEJD), S. E. Abrão Saldanha, ho nia estrutura sira hodi diskute kona-ba Memorandum de Entendimentu (MoU), ne'ebé asina ona iha tinan kotuk (2020).
Iha enkontru ne'ebé hala’o iha salaun SEJD nian, Díli (16/03) ne’e, Magnífiku Reitór hateten katak universidade nasionál disponível nafatin atu servisu hamutuk ho SEJD hodi lori Departamentu Ensinu Edukasaun Fízika no Desportu (DEFD), Fakuldade Edukasaun, Arte no Umanidade (FEAH) nian, bele hetan akreditasaun iha futuru.
"UNTL disponivel atu ita servisu hamutuk liuliu lori kursu ne’e (Departamentu Ensinu Edukasaun Fízika no Desportu-FEAH) ba rekizitu sira no hetan akreditasaun tuir ita hotu nia hakarak bainhira reaplika, tanba estudante barak mak dadaun partisipa hela prosesu aprendizajen", tenik Reitór.
Magnifiku Reitór mós agradese ba Sekretáriu Estadu Juventude no Desportu tanba iha inisitiva bele reabilita mós kampu tenis UNTL nisn hodi prepara ba Jogu CPLP nian iha futuru, aleinde ne’e mós bele fasilita estudante DEFD sira bele uza ba hala’o prátika.
Iha fatin hanesan, SEJD S.E. Abrão Saldanha hateten katak parte SEJD iha kompromisu nafatin bazeia ba akordu ne’ebé iha hodi buka dalan apoiu DEFD- FEAH nian.
“Agora dadaun profesór sira iha eskola hanorin kona-ba desportu no edukasaun fizika la iha tanba ita difikuldade rekursu umanu, ne’e mak parte SEJD iha komitmentu bazeia ba akordu ne’ebé iha, hodi apoia iha parte rekursu umanu no fasilidade sira atu bele hetan akreditasaun husi Ajénsia Nasionál Avaliasaun no Akreditasaun Akadémika (ANAAA)”, tenik Alumni UNTL ne’e.
Governante ne'e mós hatutan aleinde asuntu seluk, informa mós ba Magnífiku Reitór ho estrutura kona-ba reabilitasaun kampu tenis UNTL nian ne'ebé lokaliza FEAH, tanba ne'e proriedade Universidade nian mak informa uluk antes halo reabilitasaun.
Partisipa iha enkontru ne'e Visereitór ba Asuntu Akadémiku no Garantia Kualidade, Profesór Doutór Samuel Venancio Freitas, Visereitora ba Asuntu Estudantíl, Profesora Eng. Ligia Tomas Correia, M.Sc, Proreitora ba Asuntu Kooperasaun Profesora Doutora Lídia Gomes, SKM, M.D., parte SEJD nian Diretór Desportu Nasionál no Komunitáriu, Sr. João Rodrigues, inklui konvidadu sira.
Média UNTL 📝: Agostinho da Cruz e Silva
Foto 📷: Mateus Gonçalves
- Detalhes
- Escrito por Mateus Goncalves
- Visualizações: 11826
#TimorLeste #UNTL #VPMMPO 17 Fevereiru 2021
Universidade Nacional Timor Lorosa’e (UNTL), nia Magnífiku Reitór, Profesór dr. João Soares Martins, hala’o audiénsia ho S.Exa. Vise-Primeiru-Ministru, no Ministru Planu no Ordenamentu (VPMMPO), S.E. José Maria dos Reis hodi aborda kooperasaun ba futuru, entre instituisaun rua.
Audiénsia ne’ebé hala’o iha Fatuhada, Díli (16/2), ho objetivu hodi koopera ba levantamentu dadus ba ordenamentu teritoriál Timor-Leste nian inklui planu urbanu.
Reitór UNTL nian agradese ba Governu Timor-Leste, liuhusi VPMMPO ,ne’ebé ho disponibilidade hodi servisu hamutuk ho instituisaun públiku, liuliu universidade nasionál.
“Audiénsia ne’e espera katak ho servisu hamutuk no apoiu husi Governo, tantu rekursu, finanseiru no infrastrutura ho rekursu ne’ebé universidade iha,” Hateten Reitór UNTL.
S.E. Vise-Primeiru-Ministru, no Ministru Planu no Ordenamentu, hakarak diskuti konseitu ho universidade to’o planu ne’ebé atu halo, ba levantamentu dadus no ordenamentu teritoriál tomak Timor-Leste nian.
“Ha’u hakarak parseria ho universidade no organiza semináriu nasionál, internasionál no konvida mós peritu internasionál sira, hodi diskuti planu levantamentu dadus ba ordenamentu teritoriál ne’ebé planea ona ba tinan 30.
Partisipa iha enkontru ne'e Visereitór ba Asuntu Akadémiku no Garantia Kualidade, Profesór Doutór Samuel Venancio Freitas, Visereitór ba Asuntu Pós-Graduasaun no Peskiza, Profesór Doutór Gabriel António de Sá, Proreitór ba Asuntu Planeamentu, Monitorizasaun no Avaliasaun, Profesór José Nelson Salsinha, Ph.D, no Proreitora ba Asuntu Kooperasaun, Profesora Doutora Lídia Gomes, SKM, M.D.
Média UNTL 📝: Mateus Gonçalves
Foto 📸: Mateus Gonçalves no Agostinho da Cruz e Silva
- Detalhes
- Escrito por Mateus Goncalves
- Visualizações: 10725
#TimorLeste #UNTL #DNA #DNPF 16 Fevereiru 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, akompaña husi Visereitór no Proreitór sira, enkontru ho Diretór Nasionál Aprovizionamentu (DNA) no Diretór Nasionál Planu no Finansa (DNPF) hodi haree hamutuk siklu ezekusaun orsamentu universidade nian 2021.
Iha sorumutu ne'ebé hala’o iha sala Video Konferénsia UNTL nian, Díli (16/02) ho objetivu atu Diretór DNPF aprezenta kada rubrika ne’ebé iha no Diretór DNA aprezenta prosesu sira ligadu ho sistema aprovizionamentu sira.
Partisipa iha reuniaun ne'e Visereitór ba Asuntu Administrasaun no Finansa no Administradór-Jerál Profesór Helio Augusto da Costa Xavier Mauquei, Ph.D, Proreitór ba Asuntu Planeamentu, Monitorizasaun no Avaliasaun, Profesór José Nelson Salsinha, Ph.D, Diretór Nasionál Aprovisionamentu, Sr Afonso Lopes, ho nia estrutura, Diretór Nasionál Planu no Finansa, Sr. Egidio dos Santos Filipe, ho nia estrutura.
Média UNTL 📝: Agostinho da Cruz e Silva
Foto 📷: Agostinho da Cruz e Silva