- Detalhes
- Escrito por Mateus Goncalves
- Visualizações: 1428
#TimorLeste #UNTL 4 Agostu 2020
Universidade Nacional Timor Lorosa’e (UNTL), nia funsionáriu sira partisipa workshop ne’ebé organiza husi Komisaun Funsaun Públika (KFP), iha Auditóriu Fakuldade Enjeñaria Siénsia no Teknolojia UNTL nian Hera, Díli, kona-ba Diseminasaun ba Sistema Informasaun Jestaun Administrasaun Publika (SIGAP).
Diretór Nacional Rekursu Umanu (DNRU)-UNTL nian, Sr. Agustinho Quelo, hateten katak diseminasaun ne’e kona-ba sistema SIGAP ne’ebé foin kria husi KFP atu fasilita funsionáriu atu asesu ba sira-nia dadus.
“Diseminasaun ne’ebé foin lalais halo husi KFP ne’e atu fahe informasaun relasiona ho sistema SIGAP nian, ne’ebe sentraliza dadus hotu funsionáriu nian iha sitema refere, atu nune’e pesoál hotu bele asesu diretu ba sira nia informasaun iha baze dadus”, tenik Diretór DNRU.
Diretór Quelo hatutan tan katak liuhusi sistema SIGAP ne’e, karik funsionáriu ruma presiza sira nia dadus la presiza ba husu iha edifísiu KFP nian maibé bele asesu diretu liuhusi liña internet. Karik balun nia dadus seidauk kompletu parte DNRU sei kolabora ho KFP hodi kria formulariu ida ba funsionáriu atu fasilita hodi kompleta sira nia dadus.
“Antes ne’e bainhira funsionáriu ida presiza nia dadus tenki ba KFP mak foin bele asesu, agora muda ona ba SIGAP entaun iha ne’ebé de’it ita bele asesu liuhusi Internet, liga ba dadus foin lalais apresenta, dadus iha koluna balun mak seidauk kompletu tanba ne’e mak parte DNRU sei kolabora nafatin ho KFP hodi halo kompletu” hatutan atual Diretór DNRU-UNTL
Diretór ne’e akresenta liutan bainhira diseminasaun no dadus kompleta ona parte Rekursu Umanu sei kolabora nafatin ho KFP hodi distribui seña (pasword) no kartaun identidade (ID) ba funsionáriu ida-ida hodi asesu.
Média UNTL 📝: Agostinho da Cruz e Silva
Foto 📷: Moises do Rego
- Detalhes
- Escrito por Mateus Goncalves
- Visualizações: 2511
#TimorLeste #UNTL 4 Agostu 2020
Universidade Nacional Timor Lorosa’e (UNTL) hala’o atividade Isar-Bandeira kada fulan, iha loron segunda dahuluk nian, hodi fundamenta nasionalizmu no patriotizmu sivitas akadémika (estudante, dosente no funsionáriu) sira universidade nasionál nian, iha kampus Ekonomia i Jestaun (FEJ) UNTL nian (03/08).
Iha serimónia ne’e, prezide husi Magnífiku Reitór UNTL nian, Profesór Doutór Francisco Miguel Martins no partisipa husi Proreitór, Dekanu, Diretór-Jerál, Diretór nasionál, estudante, dosente no funsionáriu sira.
Iha nia diskursu, Reitór UNTL hateten katak universidade nasionál atualmente tama ona ba inísiu semestre pár 2020 nian, tanba ne’e Proreitória ba Asuntu Akadémiku halo ona ajustamentu ba kalendáriu akadémika ne’ebé aprezenta ona ba Konsellu Jestaun no hetan aprovasaun iha semana kotuk.
“Dezde 29 Juñu, ita hahú fila mai kampus hodi rekupera aula bazeia ba sílabus aula nian. Ita-nia aula iha semana ne’e tama ona iha avaliasaun hafoin rekuperasaun durante fulan Jullu nia laran, no dosente hotu konsege halo duni idaidak nia funsaun, tanba ne’e iha semestre oin mai atividade hotu sei ajusta iha kalendáriu inklui atividade letiva, estájiu sosiál no estájiu profisionál sira”, hatutan Reitór.
Serimónia isar-bandeira fulan agostu nian Magnífiku Reitór orgullu ho ekipa koru, korpu-isar-bandeira, komandante-parada, ne’ebé responsável husi Fakuldade Ekonomia I Jestaun (FEJ) nian.
Média UNTL : Miguel Gonçalves
Foto 📷: Miguel Gonçalves, Agostinho da Cruz e Silva
- Detalhes
- Escrito por Mateus Goncalves
- Visualizações: 3642
#TimorLeste #UNTL #FCE 17 Jullu 2020
UNTL-FSE BA DAHULUK SEI GRADUA IHA ÁREA SIÉNSIA EZATA
Universidade Nacional Timor Lorosa’e (UNTL) nia Visedekanu Asuntu Akadémiku Fakuldade Siénsia Ezata (FSE), Profesór Romualdo Lopes da Cruz, iha Kampus Balide Díli (15-7), hateten katak atualmente FSE nia estudante na’in haat prienxe ona kritériu hotu hodi gradua.
“Estudante hirak ne’e maka Willibrodus Usfinit, Joana Ximenes Belo, Claudina Ângela Pereira, no Avenancia Tavares Belo de Carvalho. Sira na’in haat ne’e mak produtu dahuluk FSE nian dezde 2015, ne’ebé kompleta ona sira-nia koñesimentu teoria i prátika inklui rekizitu hotu hodi hein ba graduasaun”, dehan Profesór Romualdo.
Visedekanu hatutan tan katak husi espetativa Fakuldade nian ba sira maka bele aplika sira-nia koñesimentu multidisiplinár iha área Siénsia Ambiente, Didátika, Enjeñaria Kímika, Informátika, Jestaun no Estatístika.
“Fakuldade dezeja susesu kandidatu graduadu sira, no hirak ne’ebé sei ativu bele buka aprende barak liután. Nomós aproveita atu enkoraja estudante sira husi ensinu sekundáriu sira atu hili FSE bele responde ba karénsia rekursu umanu iha siénsia ezata nian”, dehan visedekanu.
Entretantu, estudante Joana Ximenes ho orgullu nu’udar primeiru kontinjente ne’ebé estuda iha FSE-UNTL, no dezeja atu aplika siénsia ne’ebé hetan ona.
“Siénsia ne’ebé ami aprende husi profesór sira, hirak ne’e hakonu ami-nia koñesimentu iha Matemátika, Fízika i Kímika, no fiar-an bele kontribui ba sosiedade liuliu dezenvolvimentu iha área indústria, estudu dadus, no iha área ne’ebé relevante iha siénsia ezata”, hateten Joana.
Finalista ne’e dezafia mós estudante hirak ne’ebé sei ativu katak estuda iha Siénsia Ezata difísil maibé ho badinas estuda bele hakat liu difikuldade hotu.
Dezde FSE estabelese no hahú nia atividade letiva iha tinan akadémiku 2015 to’o ohin loron, konsege prodús nia primeru alunu na’in haat ne’ebé preparadu ba graduasaun.
Entre sira na’in haat, Joana Ximenes i Claudina Pereira ho abilitasaun iha Matemátika, enkuantu Willibrodus Usfinit ho Avenancia Tavares Belo de Carvalho ho espesialidade iha Kímika. Sira hotu iha domíniu mós iha dalen portugés no konklui sira-nia monografia iha Portugal liuhusi mobilidade akadémika bazeia ba kooperasaun UNTL ho Universidade Aveiro.
Média UNTL https://static.xx.fbcdn.net/images/emoji.php/v9/tcc/1/16/1f4dd.png")">📝: Miguel Gonçalves
Foto https://static.xx.fbcdn.net/images/emoji.php/v9/t5d/1/16/1f4f7.png")">📷: Miguel Gonçalves, Arkivu FSE
- Detalhes
- Escrito por Mateus Goncalves
- Visualizações: 4866
#TimorLeste #UNTL #ANAAA 17 Jullu 2020
Magnífiku Reitór Universidade Nacional Timor Lorosa’e (UNTL), Profesór Doutór Francisco Miguel Martins, partisipa iha lansamentu (Workshop) ne’ebé realiza husi Ajénsia Nasionál ba Avaliasaun no Akreditasaun Akadémika (ANAAA) ho tema “Reforsa Sistema Garante Kualidade Ensinu Superiór iha Timor-Leste” no iha sesaun hanesan ekipa ANAAA nian aprezenta rezultadu avaliasaun nian, iha Salaun “Ian Martin”, INFORDEPE, Balide, Díli (16/07).
Reitór UNTL nian hateten katak rekomendasaun sira ne’ebé ekipa ANAAA hato’o nu’udar dezafiu, nune’e presiza mellora liután kualidade instituisaun nian iha aspetu hotu-hotu.
“Rezultadu avaliasaun husi ekipa avaliadór ANAAA nian, ita simu saida de’it liuliu ita-nia dezafiu sira atu ita bele hadia iha futuru, nomós rekomendasaun ne’ebé sujere, atu mellora liután kualidade institusionál nian”, tenik Reitór.
Magnífiku Reitór mós enkoraja nia estrutura tomak universidade nasionál nian atu kontinua konsentra iha planu atu hatan ba rekomendasaun hirak ne’ebé ANAAA hato’o.
Iha fatin hanesan, Diretór Ezekutivu ANAAA nian, Profesór Doutór Edmundo Viegas, hateten katak parte ANAAA nian konvida Reitór hotu husi Universidade no Institutu sira atu aprezenta rezultadu avaliasaun ANAAA nian ne’ebé ekipa halo ona.
“Pontu lima ne’ebé parte ANAAA sujere ba instituisaun ensinu superiór sira, atu eleva liután kualidade hodi priense kritériu akreditasaun no avaliasaun nian hanesan: korpu-dosente, estrutura, finansa, fasilidade no propriedade sira, i rekomendasaun ikus liu mak peskiza”, rekomenda Diretór Viegas.
Entretantu husi aprezentasaun ANAAA nian, rezultadu demostra katak UNTL nia departamenetu hamutuk ruanulu resin sia (29) mak avalia ona, kompostu husi departamentu sia (9) ho klasifikasaun B, departamentu sanulu resin (19) hetan klasifikasaun C no departamentu ida la akreditadu.
Partisipa iha eventu refere Magnifiku Reitór UNTL, Professór Doutór Francisco Miguel Martins, Proreitór Garantia Kualidade Interna, Profesór Marcos António Amaral , Diretór Nasional ba Sertifikasaun, Profesór Eurico Celestino dos Reis Araújo ho nia ekipa, Ministru Ensinu Superiór, Siénsia no Kultura (MESSK), S. E Longuinho dos Santos, ho nia funsionáriu sira, estrutura husi Universidade no Institutu sira no Prezidente Konsellu Diretivu ANAAA, Profesór Doutór Samuel Freitas, Diretór Ezekutivu ANAAA, Profesór Doutór Edmundo Viegas, no funsionáriu sira.
Média UNTL https://static.xx.fbcdn.net/images/emoji.php/v9/tcc/1/16/1f4dd.png?_nc_eui2=AeHNRnu6O-mFGH2F8JmiGizQVsm2fAeLPjtWybZ8B4s-OxtsxO76r825ZcBhjIq7ri8")">📝: Agostinho da Cruz
Foto https://static.xx.fbcdn.net/images/emoji.php/v9/t5d/1/16/1f4f7.png?_nc_eui2=AeFv_Nlsa062yl4GWWWN2YPqUd1eRImZxm5R3V5EiZnGbprtGEHukJVJ0yzjmKnUC38")">📷: Agostinho da Cruz & Francisco Colo
- Detalhes
- Escrito por Mateus Goncalves
- Visualizações: 4057
Prevensaun ba Moras Virus Corona -2020
