Universidade Nacional Timor Lorosa’e (UNTL) realiza serimónia solene liuhusi graduasaun ba dala XXIX iha loron kinta-Sesta 23-24 Novembru 2023 ho total graduadu rihun ida atus lima, limanulu resin haat (1554), iha Auditóriu Faculdade de Engenharia Ciência e Tecnologia (FECT), Díli (24/11).
Iha entrevista Magnifiku Reitór Profesor dr. João Soares Martins, MPH.Ph,D hatete, ohin no aban selebra graduasaun ba estudante sira husi fakuldade sira iha UNTL nian no foin ba dahuluk estudante sira ho númeru boot tebes selebra sira nia gratidaun ba estudu nian.
‘’Ohin ne’e loron ida importante ba graduadu sira no hanesan jubiloza ba sira festeza sira nia susesu no gratidaun, no liuhusi siénsia ne’ebé sira konkista iha prosesu perkursu akadémiku nian hodi apoiu iha sosiadade no dezenvolvimentu nasionál”, dehan Reitór.
Iha fatin hanesan Ministru Ensinu Superior Siénsia no Kultura S.E. José Honório da Costa Pereira Jerónimo, hato’o parabéns ba graduadu sira, tanba bele konkista sira-nia estudu to’o remata iha hodi hetan grau akadémiku nian.
“Ita tenki fó kontribuisaun pozitivu ba instituisaun ida-ne’e. Ne’e importante, profesór no funsionáriu sira, estudante sira no ita hotu hodi melhora UNTL ba futuru no ita hotu iha dever atu halo kontribuisaun ba ita nia rai”, dehan MESSK.
“Kontribuisaun UNTL ba dezenvolvimentu nasionál ne’e makas, se ita haree ba rekursu umanu ne’e boot loos, maibé ne’e lato’o, ita presiza tan, tanba ne’e fó hanoin ba Universidade no ba Graduadu sira iha nível akadémika di’ak tenki uza rekursu sira-ne’e apoiu iha Universidade no Fakuldade”, hatutan.
Partisipa iha sesaun gradusaun nian husi membru Governu, Membru Parlamentu, Sosiedade Sivíl, Korpu-diplomata, Amu Kapelaun UNTL nian Pe.Nivio Lebre Coreia, Fdcc, parseiru dezenvolvimentu universidade nian, estrutura universidade nian, dosente, funsionáriu inan-aman, graduadu no konvidadu sira.
#TimorLeste #UNTL #MESSK 25 Novembru 2023
Média UNTL 📝: Laurindo da Cruz Gomes
Foto 📷: ALtur Ramos, Abrão do Rosario Soares (estajiáriu)