Universidade Nacional Timor-Lorosa’e (UNTL), liuhusi Proreitora ba Asuntu Provedoria no Akonsellamentu (PRAPA), realiza misa agradesimentu ba graduasaun ba dala rua-nulu resin sia (XXIX), ne’ebé prezidi hosi Amu Kapelaun Pe. Nívio Lebre Correia, Fdcc no ko-selebrante Pe. Aniceto Maia da Costa, iha Auditóriu FECT, Hera-Díli (21/11).
Iha omilia Pe. Aniceto hateten, laiha ema ida mak matenek liu, laiha ema ida mak la matenek liu, ema hotu matenek tuir grasa ne’ebé simu husi Na'i, tanba ne’e bele matenek oinsá mós tenki hakbesik-an ba Maromak, tanba Maromak mak matenek nia hun ho rohan.
“Matenek ne’ebé imi hetan iha edukasaun presiza halo transformasaun liu-husi transforma imi-nia an, ba komunidade no sosiedade, kuandu edukasaun la hó transformasaun ne’e falla, hanesan mós matenek ne’ebé imi hetan maibé la serbí sosiedade ne’e hanesan isin laiha klamar”, tenik Pe. Aniceto.
Pe. Aniceto hatutan, estudante labele matenek de’it iha kakutak, maibé mós presiza matenek iha hahalok, tanba hahalok ho asaun mak sai sasukat ba kualidade. Sasukat ne’e prova husi asaun la’ós valór, nune’e maské hetan seis deit maibé kualifikadu iha asaun, duke hetan valór dez maibé falla iha asaun.
Iha misa agradesimentu ne’e, hetan partisipasaun husi Proreitora ba Asuntu Provedoria no Akonsellamentu, Profesora, Teresa de Jesus Vaz Cabral, Estrutura UNTL nian, Padre, Madre, Frater, Dosente, Funsionáriu, Inan-Aman no Estudante sira.
#TimorLeste #UNTL #PRAPA 21 Novembru 2023
Média UNTL 📝: Paul Negro (estajiáriu)
Foto 📷: Denilson Amandio Barros