#TimorLeste #UNTL #CECA #FEAH-DELT #COVID19 #COVID19TL 24 de Novembro de 2021
Universidade Nacional Timor Lorosa'e (UNTL) nia Magnífiku Reitor, Profesór dr. João Soares Martins, MPH, Ph.D, hala'o abertura no I Semináriu Internasionál Linguístiku no Kulturál no tema "Estudos Linguísticos e Culturais em Transformação", no Auditóriu Liceu UNTL nian, Díli (23/11).
Iha abertura ne'e, Magnífiku Reitór hateten, kestaun linguístika no kulturál, rua ne'e bele halo ligasaun ba malu, enkuantu siénsia bele sai matéria ba peskiza, tanba ho peskiza bele lori transformasaun ba sosiedade.
“Hau kongratula ba profesór, Diretor SECA, Professor Doutór Vicente Paulino, no Diretor DELT tanba bele konvoka semináriu ida ne'e atu orador sira bele fahe sira-nia matenek ba estudante sira hodi aprende klean liu no bele halo peskiza barak ba futuru”, tenik Reitor.
Reitor mós husu ba estudante sira atu labele baruk estuda, tanba língua mak identidade povu ida nian, não tenki badinas halo peskiza, deskobre problema no buka solusaun ho estudu ida.
Iha fatin hanesan, Diretór Departamentu Ensinu Dalen Tetum (DELT), Fakuldade Edukasaun, Arte no Umanidade (FEAH), Profesor Jorge da Silveira Guterres rekoñese katak, semináriu ne'e loloos hala'o ona iha tinan rua ba kotuk maibé ho situasaun rai laran nian.
“Objetivu husi semináriu ida ne'e atu DELT bele hala'o knaar nu'udar peskizadór hodi aprezenta rezultadu peskiza ne'e ba estudante sira, tanba kritériu atu sai dosente tenki hatene halo peskiza no liuliu estudante sira bele aprende mós matéria husi oradór sira ”, tenik Diretór DELT.
Iha fatin hanesan, Diretor do Institutu Nasionál Linguístika (INL), Professor Benjamim de Araújo e Corte-Real, Ph.D, hatete ema hotu iha ligasaun ho edukasaun, língua, kultura no sai hanesan grupu naturál ida.
“Ita tenki iha konsiénsia ba língua, tanba língua ne'e importante tebes atu ita aprende, bele ba fízika, matemátika mós, maibé tenke iha língua lae sei hasoru problema atu siénsia ne'ebé interpreta aprende”, tenik Diretór INL.
Partisipa iha seminário ne'e Magnífiku Reitor, Diretor SECA, Diretor INL, Diretor DELT-FEAH, Dosente sira Estudante, Ekipa SEKA nian inklui konvidadu sira.
Média UNTL 📝 : Laurindo da Cruz Gomes
Foto 📷 : Pio Belo Ximenes