#TimorLeste #UNTL #CECA #COVID19 #COVID19TL 29 SETEMBRU 2021 - Universidade Nacional Timor Lorosa’e (UNTL) nia Sentru Estudu Kultura no Arte (CECA), realiza Kolókiu Internasionál ho tema ”Timor-Leste Edukasaun, Siênsia no Kultura” iha Auditóriu Liceu UNTL nian, Díli (29/09).
Magnífiku Reitór, Profesór dr. João Soares Martins MPH, Ph.D, iha diskursu agradese CECA ne’ebé organiza ona kolókiu refere, no husu atu promove liután siénsia, kultura no seluk tan.
“Agradese ba sentru ne’ebé bele organiza ona hodi hala’o kolókiu ne’e, no tenta nafatin atu bele haree no esplora liután kestaun siénsia, edukasaun no kultura liu-liu aspetu kultura nian, nomós presiza halo estudu klean liubá ita-nia kultura rasik”, tenik Reitór.
Reitór dezeja katak ho atividade ne’e, bele kontribui ba transmite valor kultura timoroan nian ba jerasaun foun sira, hodi promove nafatin tradisaun bei’ala sira husik hela, nune’e jerasaun foun sira kontinua hatutan.
Iha fatin hanesan, Diretór Sentru Estudu Kultura no Arte, Profesór Doutór Vicente Paulino hateten, liuhusi eventu siénstifiku ne’e bele fahe nafatin informasaun relasiona ho siénsia, kultura no seluk tan.
“Atu promove traballu profesór sira-nia, estudante ne’ebé lisensiadu ona hanesan traballu kolatoria ida, tanba Timor-Leste presija duni promosaun ba eventu sentífiku sira, hodi bele fahe informasaun kona-ba siénsia, kultura, edukasaun nian no rezultadu aprezentasaun sira sei publika iha livru”, tenik Profesór Vicente.
Kolókiu ne’e rasik aborda temátika sira hanesan Língua Ensinu, Média no Komunikasaun, Kultura, Linguístika, Kurríkulu, no Meiu Ambiente.
Eventu akadémiku ne’e, ninia espasu limitadu ba akadémiku no estudante sira, rezultadu husi kolókiu ne’e sei publika liuhusi livru atu públiku bele asesu.
Partisipa iha kolókiu ne’e Visereitór, Proreitór, Dekanu, Visedekanu sira, Dosente, Estudante, Funsionáriu no konvidadu sira.
Média UNTL 📝 :Denilson A. Barros
Foto 📷 : Pio Belo Ximenes