#TimorLeste #UNTL #FCS #DCS #COVID19 #COVID19TL 29 Setembru 2021 - Universidade Nasional Timor Lorosa’e (UNTL), nia Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas, iha Kampus Sentrál UNTL nian, Díli (28-09), hateten avaliasaun ba DCS ne’e bazeia ba kritéria Ajénsia Nasionál Avaliasaun no Akreditasaun Akadémika (ANAAA), fahe ba sesaun entrevista, verifikasaun dokumentu no vizita ba fasilidade sira.
“Site visit ne’e, ekipa painel sira ba haree direta fasilidade sira iha DCS nian no Avaliasaun ida ne’e hala’o tuir prosedimentu ne’ebé ANAAA hatur ona, no justifika evidénsia sira bazeia ba relatóriu nomós aneksu sira hodi hatan ba avaliadór sira no kuriozidade hodi bele fó formula feedback katak, departamentu ne’e iha duni kualidade”, tenik Profesór Samuel.
Iha fatin hanesan, Diretór Departamentu Komunikasaun Sosiál (DCS), Profesór Marcelino Ximenes Magno, hateten, DCS nia preparasaun dezde 2019 tanba atu halo avalia iha tinan ne’e.
Diretór Departamentu Komunikasaun Sosiál (DCS), Profesór Marcelino Ximenes Magno
“Valór di’ak ne’ebé ha’u haree iha preparasaun ne’e, mak servisu iha ekipa, hanesan alumni, estudante, dosente, pesoál administrasaun sólidu tebes, maské iha dezafiu balun parte hotu iha solidariedade ba malu no sólidu tebes, ita sente hanesan kman, apoiu hahan, lojístika no prepara video”, tenik Diretór DCS.
Diretór DCS mós agradese ba Visereitór Asuntu Akadémiku no Garantia Kualidade, Xefe Departamentu Média no Komunikasaun UNTL no stakeholder sira: UNICEF, UNESCO, STL, Tane Komsumidór, Ministériu Asuntu Kombatente Libertasaun Nasionál, Dosente, Alumni, Estudante no Administrasaun DCS.
Média UNTL 📝: Laurindo da Cruz Gomes (estajiáriu)
Foto 📷: Laurindo da Cruz Gomes & Luis de Almeida/Arkivu DCS