#TimorLeste #UNTL #FCS #FMCS #AsosiaçãoTaneConsumidor #COVID19 #COVID19TL 09 Jullu 2021
Universidade Nasional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, asina akordu kooperasaun ho Prezidente Asosiasaun Tane Konsumidór, Sr. António Ramos da Silva, iha sala Vídeokonferénsia UNTL nian, Díli (08/07).
Magnífiku Reitór agradese ba asinatura akordu kooperasaun ho Asosiasaun Tane Konsumidór ne’e, importante tebes ba Universidade nia Fakuldade Siénsia Sosiál (FCS), no Fakuldade Medisina no Siénsia Saúde (FMCS), iha peskiza, advokasia no estájiu.
“Akordu ne’e nia importansia ne’e boot tebe-tebes, la’os de’it ba Departamentu Komunikasaun Sosiál maibé mós ba Fakuldade Medisina no Siénsia Saúde ligadu ba produtu ne’ebé labele afeta ba saúde populasaun em jerál no Fakuldade Direitu relasiona ho kestaun Direitus Humanus nian” dehan Reitór.
Reitór mós espera katak, liuhusi akordu refere bele kontinua servisu hamutuk hodi implementa atividade konjunta (peskiza, advokásia, estájiu) nune’e bele asegura konsumidór sira-nia direitu atu asesu ba produtu ne’ebé di’ak no kualidade.
Iha fatin hanesan, Prezidente Asosiasaun Tane Konsumidór hatete akordu kooperasaun ne’e ba dahuluk ho Magnífiku Reitór maibé antes ne’e ho Departamentu Komunikasaun Sosial nia estajiáriu sira liuhusi estájiu konsege prodús ona programa audiovizuál ne’ebé diginifika Tane nia visibilidade iha nasional.
"Afinal, ita la presiza selu konsultán ho kustu boot hodi prodús produtu ho kualidade ne'ebé hetan apresiasaun as hosi União Europeia, maibé estudante Departamentu Komunikasaun Sosiál mós bele prodús video sira ho kualidade as no foti Asosiasaun Tane Konsumidor nia vizibilidade iha nível nasionál nomós internasionál ho nune’e ami agradese ba UNTL," dehan Prezidente Asosiasaun Tane Konsumidór.
Sasin ba akordu refere mak Visereitór, Proreitór, Dekanu Fakuldade FCS, Profesór Camilo Ximenes Almeida, Diretór DCS, Profesór Marcelino Ximenes Magno, ho nia estrutura no Prezidente Asosiasaun Tane Konsumidór, Dr. António Ramos da Silva, ho nia ekipa.
Média UNTL : Leonia Araújo (estajiária）
Foto : Pio Belo Ximenes (estajiáriu)