Universidade Nasionál Timor Lorosa’e (UNTL), nia graduandu Nolasco Amélia João Viegas de Jesus Torezão nu’udar mellór graduandu husi Faculdade de Ciências Sociais, Departamento de Relações Inernacionais, totál IPK (Index Prestation Communlative) 3,37 ho klasifikasaun exelente.
“Ha’u senti kontenti tebes bainhira ha’u hamriik iha oin reprezenta estudante husi 1.549 nia lian, hodi bele hato’o ami-nia sentimentu de gratidaun ba ami-nia família, konvidadu no dosente sira nu’udar estudante ne’ebé hetan mellór klasifikadu”, dehan iha serimónia graduasaun ba dala rua-nulu-resin-sia (XXIX), iha Auditóriu FECT, Hera-Díli (11/2023).
Nia hatutan, graduasaun la’os ikus ba sira-nia futuru, tanba hanesan joven ida sei kontinua dezenvolve nasaun ne’e sai nasaun ne’ebé di’ak liu, no xave atu sai mellór graduandu maka tenki estuda makaas.
“Ha’u hanoin ida-ne’e la’os atu termina kedas ami-nia futuru, tanba hanesan joven Timor Leste ami-nia futuru sei naruk, tanba luta libertasaun ne’ebé mak ita-nia éroi sira tula mai ita-nia leten ami sei kontinua atu dezenvolve nasaun ida ne’e di’ak liutan ba oin.
Ha’u hanoin dever estudante nian atu atinji estudante mellór klasifikadu nian maka estuda, estuda ne’e importante, tanba bainhira ita tur iha 75% iha ita-nia liman no 25% mak iha dosente sira-nia liman, entaun bukae saida mak ita simu husi ita-nia universidade ita foti sai hanesan referénsia, maibé hanesan ema akadémiku ida, nafatin ba buka esperénsia iha liur hodi bele aumenta ita-nia kapasidade”, hateten.
Mellór Graduandu ne’e hato’o, nia mehi atu sai diplomata ne’e maka inspira tebes nia hodi bele atinji ninia objetivu, nia mós planu atu tinan oin bele kontinua ninia estudu Mestradu nian iha área Relações Internacionais.
Iha fatin hanesan aman husi mellór graduandu Lino de Jesus Torrezão senti kontenti no apresia ba prestasaun di’ak ne’ebé nia oan hetan.
“Nia hanesan ha’u-nia oan, ha’u senti elojiadu ho ninia prestasaun ne’ebé mak di’a. Kuandu nia tuir estudu nu’udar estudante iha UNTL, moralmente ha’u sempre fó motivasaun katak, iha mundu ita hakarak sai hanesan ema ne’ebé gloriozu no ema ne’ebé susesu ne’e presiza estuda.
Imi-nia inan-aman sira sei iha forsa ekonomikamente atu haruka imi ba eskola, di’ak liu aproveita, se imi la i ba futuru. Tanba se la’os ita mak projeta ita-nia futuru sé tan?”, nia hakotu.
#TimorLeste #UNTL #FCS 23 Novembru 2023
Média UNTL 📝: Augusta Neusa Moniz (estajiáriu)/Paul Negro (estajiáriu)
Foto 📷: Altur Ramos