Universidade Nacional Timor Lorosa’e (UNTL) nia Magnífiku Reitor Profesór dr. João Soares Martins,MPH.Ph.D halo abertura ba Jornada Sientífika ne’ebé organiza husi Gabinete Visereitoria ba Asuntu Estudantís, iha ámbitu komemorasaun Dies Natalis UNTL nian ba dala 23 (17 novembru 2000-2023), iha Auditóriu Liceu UNTL nian, Díli (14/11).
Magnifiku Reitor hatete, ohin loron di’ak tebes halo abertura ba jornada sientífika ne’e hodi komemora Dies Natalis UNTL nian badala ruanulu resin tolu (23) no agradese ba Gabinete VRAE bele realiza atividade ida ne’e hodi promove estudante sira pro ativu, espresa talentu no matenek iha Universidade.
“Alende ne’e ita boot sira mós tuir aula normal, estájiu, peskiza no prátika. Ita mós tenki partilla ita nia koñesimentu ba Siénsia no iha momentu jornada hanesan ne’e importante tebes atu ajuda ita forma ita-nia matenek ho katakter inteletuál. Ho atividade sira ne'e ha’u espera ba oin bele organiza di’ak liutan iha nivel fakuldade no Departementu’’, dehan Reitór.
Iha fatin hanesan Visereitora ba Asuntu Estudantís Profesora Lígia Tomás Correia hatete, atividade refere organiza iha ámbitu Dies Natalis atu enkoraja estudante sira sai adekuadu, sai toman oinsa bele halo aprezentasaun sientífika.
‘’Iha momentu ida ne’e ha’u hakarak dezafia estudante sira la’ós de’it ko’alia no komentáriu maibé hanoin ho pensamentu krítiku oinsa bele aprezenta traballu sientífiku ne’ebé durante ne’e imi hala’o tiha ona iha fakuldade.
Traballu hirak ne’e mak konsege prodús ona poster sientífiku ne’e. Ba oin ita nafatin realiza jornada sientífika hodi nafatin fó korajen ba estudante sira atu bele halo aprezentasaun sientífiku’’, dehan Visereitora.
Atividade ne’e hetan partisipasaun husi aprezentador sira hanesan, Jonio Soares finalista husi FCS, Cesaltina Hingis G. de Sousa Belo finalista husi FECT no Don Vinton Cae Armando finalista husi FCE, Vise-Dekanu, Dosente, Funsionáriu inklui estudante sira.
#TimorLeste #UNTL #VRAE 14 Novembru 2023
Média UNTL 📝: Laurindo da Cruz Gomes
Foto 📷: Laurindo da Cruz Gomes