#Timorleste #UNTL #PRAPA #COVID19 #COVID19TL 17 Novembro 2021
Universidade Nasional Timor Lorosa'e (UNTL) liuhusi Proreitoria ba Asuntu Provedoria no Akonsellamentu (PRAPA) nia Amu Kapelaun, Padre Nívio Lebre Correia, Fdcc, hamutuk ho estrutura universidade nian no Sívitas Akadémika selebra misa agradesimentu ba aniversáriu UNTL nian ba dala XXI iha Kampus Hera, Díli (17/11).
Padre Kapelaun UNTL nian Pe. Nívio Lebre Correia, liuhusi omilia konvida Sívitas Akadémika tomak atu agradese ba Maromak ba ezisténsia universidade nian (2000-2021), reflete katak “buat hotu ne'ebé iha rai ne'e Maromak nian”.
“Ohin ita halibur hamutuk iha ne'e atu agradese ba Maromak ba ezisténsia UNTL nian iha Timor-Leste, tanba ne'e ha'u husu ita hotu mi reflete ba Salmu ne'ebé liu dadaun katak “buat hotu iha rai ne'e Maromak nian inklui ita-nia vida”, dehan Padre Nívio.
Padre Nivio hatutan katak, ho idade XXI ne'e hanesan ema karik, bele foti ona desizaun rasik ba nia an ona, tanba ne'e keta haluha katak, matenek no buat hotu ne'ebé ema sempre iha prezensa Maromak nian.
Padre Kapelaun mós enkoraja estrutura universidade nasionál nian no Sívitas Akadémika tomak nafatin esforsu nune'e matenek ne'ebé hetan kontribui ba mudansa sosiedade nian nomós ba nasaun ida ne'e.
Partisipa iha misa refere, Magnífiku Reitor, Profesór dr. João Soares Martins, MPH, Ph.D, Visereitór, Proreitor, Dekanu no Sívitas Akadémika UNTL nian.
Média UNTL 📝: Leonia de A. da Costa
Foto 📷: Leonia de A. da Costa