#TimorLeste #UNTL #VRAE #COVID19 #COVID19TL 16 Novembro 2021
Universidade Nacional Timor Lorosa'e (UNTL) nia Magnífiku Reitor, Profesór dr. João Soares Martins, MPH, Ph.D, halo abertura da atividade kompetisaun programa 4 (Master of Cerimony, Jornal Parede, Traballu Sientífiku, Fotográfiku, Trio-Vocal) ne'ebé promove husi Visereitoria ba Asuntu Estudantís (VRAE) hodi komemora Diesnatalis ba dala XXI (2000-2021).
“Ha'u husu ba estudante sira atu kompete ho didi'ak no imi mós tenke hatudu imi-nia talentou atu sai vensedór iha eventu sira hanesan ne'e, maibé labele haree ema sira ne'ebé imi konsege manan kiik liu fali, tanba karik sira laiha ita labele sai vensedór, nune'e mós hatudu kultura ita respeitu malu”, tenik Reitor.
Magnífiku Reitor dezeju, husi Aniversáriu UNTL nian ba dala XXI, sei fortalese liután ezisténsia UNTL nian hodi kontribui ba dezenvolvimentu siénsia no teknolójia, peskiza, service komunitária iha nasaun ida ne'e.
“Aniversáriu Universidade nian ba tinan 21 ne'e, dezeja bele fortalese ezisténsia UNTL nian iha Timor-Leste, liuliu estudante sira bele maduru aplika siénsia ne'ebé imi aprende iha sosiedade, no sai esperansa ba família, ho meiu partisipa iha atividade sira ne 'e hodi hasa'e liután kapasidade”, hatutan.
Iha fatin hanesan, tuir Visereitora ba Asuntu Estudantís, Profesora Eng.ª Lígia Tomás Correia, M.Sc hateten, atu selebra aniversáriu, UNTL hala'o programa hirak ne'e hodi konkista estudante sira-nia abilidade, hodi enkoraja sira bele halo mudansa litán.
“Ita atu selebra dala XXI ba ezisténsia UNTL nian mak ita mós realiza programa hirak ne'e, nune'e bele konkista estudante sira nia talentu, no ita mós sei foka ba talentu sira ne'e, nune'e bele enkoraja sira kontinua mantein no dezenvolve sira-nia poténsia sira ne'e”, dehan VRAE.
Viseireitora mós sent satisfeitu tanba maské iha difikuldade barak,maibé estudante sira partisipa másimu nune'e dezenvolve di'ak liután sira-nia talentu.
Partisipa iha abertura ne'e, Visereitór, Proreitor, Diretór-Jerál, Dosente, Funsionáriu no Estudante sira, inklui konvidadu sira.
Média UNTL 📝: Leonia de A. da Costa
Foto 📷: Leonia de A. da Costa