#TimorLeste #UNTL #VRAAGK #FCS #DCS #COVID19 #COVID19TL 28 Setembru 2021 - Universidade Nacional Timor Lorosa’e (UNTL) liuhusi Fakuldade Siénsia Sosiál (FCS), nia Departamentu Komunikasaun Sosiál (DCS), hetan Avaliasaun husi Ajénsia Nasionál ba Avaliasaun no Akreditasaun Akadémika (ANAAA), hahú husi 27-28 Setembru 2021.
Sesaun ba avaliasaun nian, abertura no sesaun jerál nian, iha sala Vídeo Konferénsia UNTL nian, Díli (27-28), no tuir hala’o vizita lokál hodi haree Laboratóriu Multimedia, Klínika Jornalizmu, no Rádiu Akadémika FM 90.00 Mhz, fasilidade infraestrutura, saladeaula, eskritóriu no verifikasaun ba dokumentu sira.
Ekipa Jurí ba avaliasaun ne’e Profesór Hazman Shah Abdulah (Internasionál) no avaliadór nasionál sira maka Sr. Zidho Correia no Dr. Francedes Suni, akompaña husi ekipa ANAAA nian ne’ebé lidera husi Sr. Hipolito da Cruz.
Alende halo avaliasaun ba DCS, antes ne’e ANAAA hala’o ona iha Fakuldade sira seluk no iha FCS mak Departamentu Relasaun Internasionál, Fakuldade Edukasaun Arte no Umanidade (FEAH) nia Departamentu Ensinu Dalen Tetun, no Departamentu Ensinu Edukasaun Fízika I Desportu.
Partisipa iha Avaliasaun ne’e, Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas, Dekanu Fakuldade Siénsia Sosiál, Profesór Camilo Almeida, Diretór DCS Profesór Marcelino Ximenes Magno, Vise-Diretór, Profesór Roberto Pacheco, Pesoál Adminitrasaun Sra. Candida Ramos, Dosente DCS nian, Stakeholders, Alumni, no estudante sira.
Média UNTL 📝: Leonia de A. da Costa (estajiária)
Foto 📷: Leonia de A. da Costa, Francisco Colo (estajiáriu)