#TimorLeste #UNTL #VRAE #COVID-19 #COVID-19TL 15 Jullu 2021
Universidade Naciopnal Timor Lorosa’e (UNTL) nia Visereitora ba Asuntu Estudantís (VRAE), Profesora Eng. Lígia Tómas Correia, M.Sc, ho nia ekipa, sorumutu ho Asosiasaun Estudante Fakuldade sira, iha Sala Videokonferénsia UNTL nian, Díli (14/07), hodi akumula opiniaun sira hodi kontribui ba elaborasaun ba Planu Estratéjiku 2021-2030.
“Objetivu enkontru ne'e hanesan aproximasaun hodi akumula idea prinsipál sira ba Planu Estratégiku Tinan 2021 – 2030, nune’e bele hato’o hikas ba Ekipa Elaborasaun ba Planu Estratéiku (EEPE)-UNTL ba Tinan 2021-2030”, tenik Visereitora.
Profesora Lígia mós sita kona-ba preparasaun atu realiza atividades estrakurikulár iha fulan agostu hanesan Kompetisaun Traballu Sientífiku, Diskursu Públiku, Trio-Vokál, Pintura, inklui Atividade Desportiva sira.
Iha fatin hanesan, Reprezentante Asosiasaun Estudante ba Konsellu Jerál UNTL, Moises Soares Magno, hateten, apresia ho inisiativa VRAE nian tan hakarak rona ideia husi senadu sira hodi akumula ba planu estratéjiku universidade nian (2021 to’o 2030).
“Akumula ideia konstrutivu, analítiku no krítiku husi senadu sira hato’o ba VRAE hodi aprezenta iha revizaun ba planu estratéjiku 2021 too 2030 nian, tanba konsidera planu prioridadde hodi implementa iha futuru”, tenik atuál Prezidente Asosiasaun Estudante Fakuldade Filozofia.
Partisipa iha enkontru ne’e ekipa husi Gabinete VRAE nian hanesan Xefe Departamentu ba Alumni no Empregabilidade, Sr. Andre da Costa Oliveira, funsionáriu, Asosiasaun Senadu sira husi Fakuldade iha Universidade Nacional Timor Lorosa’e.
Média UNTL : Leonia Araújo (estajiária)
Foto : Pio Belo Ximenes (voluntáriu)