#TimorLeste #UNTL 1 Fevereiru 2021
Magnífiku Reitór Universidade Nacional Timor Lorosa’e (UNTL) nian, Profesór dr. João Soares Martins, MPH, Ph.D, asina termu entrega Bolseirus Pós-Laborál ho Ministra da Saúde, dra. Odete M. F. Belo, iha Palácio das Cinzas (01/02), ho objetivu atu implementa kursu Pós-Laborál ba Diploma Tolu (DIII), iha Fakuldade Medisina no Siénsia Saúde (FMCS), liuhusi Departamentu Enfermajen no Parteira.
Magnífiku Reitór UNTL nian iha nia diskursu hateten kata, iha serimónia refere Ministériu da Saúde entrega estudante Pos-Laborál nian hamutuk na’in atus ida ualunulu (180) mai iha UNTL atu hahú prosesu ensinu.
“ Ohin asina termu entrega hodi entrega estudante Pós-Laborál husi Departamentu Enfermajen no Parteira nian ba Diploma Tolu (3), akordu ne’e asina antes ona iha VII Governu Konstitusional no agora mak ita hahú implementa” tenik Magnífiku Reitór.
Magnífiku Reitór mós hatutan tan katak liuhusi akordu ne’ebé instituisaun rua hala’o, atu hahú ona prosesu ensinu aprendisajen ba estudante Pós-Laborál sira iha Departamentu Enfermagen no Parteira.
Iha fatin hanesan, Ministra Saúde, dra. Odete M. F. Belo hateten katak akordu refere importante atu eleva liután kapasidade pesoál saúde sira-nian iha área ne’ebé sira atu estuda ba.
“Husi akordu ida ne’e atu bele eleva liután pesoál saudé sira ne’ebé servisu ona, ita fiar katak liuhusi formasaun ida ne’e sira mós bele kapasita sira-nia an tuir evolusaun siénsia ne’ebé universidade nasionál oferese” tenik Ministra Saúde.
Partisipa iha serimónia ne’e Pro-Reitora ba Asuntu Kooperasaun, Professora Doutora Lídia Gomes, SKM, MPH, Dekanu FMCS nian, Profesór José Deonisio Ximenes ho nia estrutura, Vise-Ministru Saúde, Sr. Bonifácio Mau Coli dos Reis, ho nia Diretór sira, estudante Pos-Laborál nian, reprezentante Fundu Dezenvolvimentu Kapital Umanu (FDCH) nian no konvidadu sira.
Média UNTL 📝: Agostinho da Cruz e Silva
Foto 📷: Mateus Gonçalves