Universidade Nacional Timor Lorosa'e (UNTL) nia Dekanu Faculdade de Agricultura (FAGRI), Profesór Dr. Vicente de Paulo hatete, tuir planu sei muda FAGRI nia atividade ensinu-aprendizajen husi Kampus Sentrál UNTL nian, ba Hera iha semestre pár 2024.
"Ami atu muda ba edifísiu foun iha Hera, ne’e depende ba fasilidade mesa no kadeira tenki konklui maibé ami nafatin koordena ho parte lojístika no ami prontu atu muda", dehan Dekanu FAGRI, iha knaar fatin Kampus Sentrál UNTL nian, Díli (20/02).
Dekanu mós apela ba estudante no dosente sira atu prepara an bainhira muda ba Hera ho hanoin ida katak iha semestre par bele hahú aula iha kampus Hera.
Iha sorin seluk estudante Agro-Socio Economia, Mateus Pinto Madeira, hatete transferénsia FAGRI ba iha Hera ne'e di'ak, tanba estudante sira bele minimiza movimentu prátika kampu ba iha munisípiu.
"Relasiona transferénsia FAGRI ba kampus Hera ita presiza edifísiu ne'ebé kualidade ba estudante sira hodi fasilita kampu prátika. Nune'e bele minimiza movimentu prátika iha munisípiu sira ne'ebé iha relasaun ho matéria ne'ebé ami aprende", dehan Mateus.
Mateus mós dehan, bainhira muda ba kampus Hera di’ak, tanba ne'e benefisiu di'ak atu nune'e bele halo prátika kampu tuir departamentu ida-idak.
Média UNTL 
: Denilson Amandio Barros
: Denilson Amandio BarrosFoto 
: Eugenia de Jesus
: Eugenia de Jesus