Universidade Nacional Timor Lorosa’e (UNTL), Faculdade de Ciências Sociais nia Diretór ba Instituto de Estudos de Paz, Conflito e Social (IEPCS), Profesór Dr. Antero Benedito da Silva hatene, Embaxadór husi Irlandia ba Indonesia, Timor-Leste no ASEAN hala’o vizita ne’e atu observa direta kondisaun no servisu sentru nian, iha Kampus Kaikoli, Díli (21/02).
“Objetivu husi vizita ne’e atu haree no observa direta kona-ba servisu ne’ebé ami halo ona durante ne’e, desde 2007 to’o agora ne’e, nomós ami aprezenta kona-ba mestradu estudante nain tolunulu iha IEPCS.
Ami hahú estabelese IEPCS/Peace Center sira fó apoiu fundu oituan liuhusi Governu, Ministériu Estranjeiru Irlandia nian, liuhusi vizita ne’e, ami mós diskuti oituan kona-ba kazu Myanmar nomós kona-ba Timor-Leste nia reprezentante ba membru ASEAN”, dehan.
Iha fatin hanesan Pádraig Francis, Embaxador husi Irlandia ne’e, hateten, nia hakarak vizita Timor-Leste tanba uluk sira sempre fó apoiu Timor-Leste nia independénsia, nune’e husi vizita ne’e mós bele haree direta servisu IEPCS nian.
“Ha’u hakarak mai vizita Timor-Leste no mai haree direta servisu iha IEPCS, tanba uluk ami sempre fó apoiu Timor-Leste liuliu independénsia, nune’e hakarak hametin liutan relasaun entre nasaun rua ne’e nian. Mós bele haree direta servisu IEPCS nian no hakarak hametin di’ak liutan relasaun Timor-Leste nian ho Irlandia”, hatutan.
Iha vizita ne’e akompaña husi reprezentante Dekanu Faculdade de Ciências Sociais nian, Profesór Ananias Soares, dosente sira no estudante voluntáriu sira IEPCS nian.
Média UNTL : Domingos Amaral
Foto : Domingos Amaral