Universidade Nacional Timor Lorosa'e (UNTL) nia Diretór Nasional ba Atendimentu Estudante (DNAE) Sr. Rui Loco Pires, iha Kampus Sentral, Díli (19/02), hateten, estudante foun tinan akadémiku 2024 hahú husi loron 12 fevereiru ne’e rejista ona rihun ida atus ida resin-neen (1106) no sira ne'ebé seidauk rejistu hamutuk rihun tolu atus neen, neen nulu-resin hitu (3667).
"Husi totál estudante admitidu mai UNTL iha tinan 2024 hamutuk 4773, ita rejistu ona estudante hamutuk 1106 no estudante ne'ebé seidauk mai rejistu hamutuk 3667, maibé validade sei to'o loron 26 fulan fevereiru bazeia ba oráriu ne'ebé fó ona", dehan.
Estudante foun 2024 Departamentu Ensinu Biolojia, Fakuldade Educação Arte e Humaidade (FEAH), Clara Ramos da Silva sente safistas tebes ho atendimentu universidade nian, tanba fahe oráriu tuir fakuldade hodi halo sira la dudu malu hodi ba rejistu.
"Ha'u sente orgullu tebes, tanba naran sai iha UNTL, no ha'u rejistu ona, husi prosesu rejistu ne'e, ha'u satisfas tebes. Tanba ami mai la dudu malu ida, no pesoal sira halo atendimentu mós di'ak tebes no lalais" dehan Clara.
Iha sorin seluk, Meliana Ximenes Perreira nu'udar estudante foun iha Departamentu Parteira hatete, atendimentu universidade di'ak loos tanba sira sente seguru iha prosesu rejistu.
“Ha’u pesoál sente seguru durante partisipa iha prosesu rejistrasaun nian nomós sente kontente tanba naran sai duni iha Departamento de Parteira tuir ha’u-nia mehi”, dehan nia.
Dsitribuisaun estudante kada fakuldade mak, Faculdade de Agricultura hamutuk 447 no seidauk rejistu hamutuk 281, Faculdade de Ekonomia e Gestão hamutuk 99 seidauk rejistu 300, Faculdade de Direito hamutuk 117, seidauk rejistu hamutuk 30, Filosofia rejistu ona hamutuk 60 no seidauk rejistu hamutuk 44, Faculdade de Ciência Exata rejistu ona hamutuk 40 no seidauk hamutuk 21 no Faculdade de Turismo Arte Indústria Criativas no Culturais rejistu ona hamutuk 46 no seidauk rejistu hamutuk 123.
Média UNTL 
: Leonia de A. da Costa
: Leonia de A. da CostaFoto 
: Mario Jonio Mendonça & Domingos Amaral
: Mario Jonio Mendonça & Domingos Amaral