Universidade Nacional Timor Lorosa’e (UNTL) nia Gabinete do Certificação dos Docentes (GABCEDU) nia Direção Nacional de Dados e Procesos de Acumulação de Créditos (DNDPAC) Dr. Junior Raimundo da Cruz, informa katak prosesu verifikasaun dadus rejime kareira ba dosente faze datoluk ba dosente na’in neennulu resin rua (62) iha tinan 2024.
“Planu ba tinan ida-ne’e tuir progresaun profesór hamutuk neen nulu resin rua (62), maibé tenke priense kritéria hanesan ponderasaun kréditu tenke 550, grau mestradu, abilitasaun literária mínimu no tenke iha avaliasaun dezempeñu pozitivu”, dehan Junior, iha Kampus Sentral UNTL nian, Díli (30/01).
Diretór ne’e mós salienta, profesór neen nuluresin rua (62) ne’e, tinan kotuk sira seidauk tuir progresaun, tanba la priense kritéria nune’e tinan ne’e fó oportunidade ba sira hodi kompleta dokumentu.
“Iha inísiu fulan ne’e, ami haruka ona karta no lista naran ba kada fakuldade, nune’e bele mai submete sira-nia dokumentu. Fulan Marsu nia laran akumula hodi verifika no halo avaliasaun ba kréditu.
Bainhira sira priense ona kritéria mak prosesu ba progresaun, se seidauk priense tinan oin mak bele tuir fila-fali, tanba tuir lei, 31 Marsu tenke submete ona dokumentu ba iha Ministériu Ensinu Superior Siénsia no Kultura (MESSK), nune’e sira mós halo verifikasaun hafoin halo publikasaun iha Jornal da Repúblika”, hatutan.
Kada tinan GABCEDU haree dosente sira ne’ebé priense ona kondisaun bele tuir progresaun, tanba tuir lei iha termu rua progresaun no promosaun eskalaun ida hanesan, eskalaun D, C, B no A. Mudansa ba nivel bainhira priense ona kondisaun, enkuantu mudansa husi eskalaun D atu ba C ne’e tenke konkore liuhusi vaga. Nune’e atu halo avaliasaun ne’e presiza konsellu doutór mak halo progresaun ne’e.
#TimorLeste #UNTL #GBACEDU #DNDPAC 31 Janeiru 2024
Média UNTL 📝: Domingos Amaral
Foto 📷: Laurindo da Cruz Gomes