Universidade Nacional Timor Lorosa’e (UNTL) nia Magnífiku Reitór Profesor dr. João Soares Martins, MPH,Ph.D partisipa iha diskusaun Mesa-Redonda ho tema “A Importância do Ensino de Português Pelo Mundo” organiza husi Programa Doutoramento Internacional (DINTER) UNTL nian, iha Auditóriu Centro Cultural de Português Jorge Sampaio, Embaxada Portugal, Díli (29/01).
‘’Importante tebes mai ita atu bele aprende Português iha Timor-Leste, hodi hanorin iha aula. Nune’e mós bele halo komunikasaun di’ak ho ema portuges no hakarak aprezenta ba imi doutorandu hotu iha ne’e katak, aprende di’ak, bainhira termina kursu ne’e bele sai rekursu di’ak ba universidade no país’’, dehan Magnífiku Reitór liuhusi diskursu.
Iha fatin hanesan Ministru Ensinu Superior Siensia no Kultura (MESSK) S.E. José Honório da Costa Pereira agradese, tanba bele partisipa iha mesa redonda kona-ba importánsia ensinu portugés no lansamentu ba Revista Mozaiku husi estudante doutorandu sira-nian.
“Língua-Portugeza importante tebes ba ita uza hodi halo konversa iha mundu, no portugés hanesan veíkulu ba kompreensaun ema nian iha prosesu ensinu, negósiu, relasaun internasionál no kooperasaun, tanba ne’e ema hatene konversa uza portugés bele hetan opurtunidade iha área oin-oin”, dehan MESSK.
Iha okasiaun ne’e lansa mós revista MOZAIKU ne’ebé hakerek husi estudante Doutoramento Internacional (DINTER) nian.
Partisipa husi Visereitór ba Asuntu Pós-Graduasaun no Peskiza Profesór Afonso de Almeida, Diretora Jerál Ensinu Superiór no Siénsia Sra. Maria Filomena Lay Guterres, Diretór Nasionál sira, dosente, estudante no konvidadu sira.
#TimorLeste #UNTL#VRAPGP #DINTER #CAPES 30 Janeiru 2024
Média UNTL 📝: Laurindo da Cruz Gomes
Foto 📷: Domingos Amaral