Detalhes

Escrito por Mateus Goncalves

Publicado em 14 setembro 2020

Atualizado em 14 setembro 2020

Visualizações: 1246

#TimorLeste #UNTL 9 Setembru 2020

Magnífiku Reitór Universidade Nacional Timor Lorosa’e (UNTL) nian, Profesór Doutór Francisco Miguel Martins, partisipa iha Serimónia Asinatura Nota Entendimentu entre Ministériu Ensinu Superiór, Siénsia no Kultura (MESSK) ho Ministériu Edukasaun, Juventude no Desportu (MEJD), Ministériu ba Asuntu Kombantente Libertasaun Nasionál (MAKLN) no Ministériu Solidariedade Sosiál no Inkluzaun (MSSI).

 

Serimónia refere halao iha salaun Ian Martin INFORDEPE Balide, Díli, (08/09), relasiona ho asesu ba Ensinu Superiór Públiku, UNTL no Institutu Politékniku Betanu (IPB), iha tinan akadémiku 2021.

 

Partisipa iha serimónia ne’e, MESSK, S.E Profesór Longuinhos dos Santos, MEJD, S.E. Profesór Armindo Maia, MAKLN, S.E. Júlio da Costa Meta Malik, no VPMAS-MSSI, S.E. Armanda Berta, inklui Magnífiku Reitór UNTL, Profesór Doutór Francisco Miguel Martins, Diretór sira no konvidadu.

Média UNTL : Agostinho da Cruz e Silva

Foto : Agostinho da Cruz e Silva

Comment

Detalhes

Escrito por Mateus Goncalves

Publicado em 07 setembro 2020

Atualizado em 07 setembro 2020

Visualizações: 2273

#TimorLeste #UNTL #ANAAA 4 Setembru 2020

Universidade Nacional Timor Lorosa’e (UNTL), nia Magnífiku Reitór, Profesór Doutór Francisco Miguel Martins, simu vizita husi ekipa avaliadór Ajénsia Nasionál ba Avaliasaun no Akreditasaun Akadémika (ANAAA) nian hodi realiza faze avaliasaun preliminár ba kursu Mestradu foun tolu (3) no kursu Lisensiatura foun ida (1).

 

Kursu Mestradu tolu mak hanesan: Mestradu Ensinu Portugés iha Kontekstu Timor-Leste, Mestrado Estudu Pás i Konflitu no Mestrado Matemátika ba Profesór sira. Kursu Lisensiatura ne’ebé hetan mos avaliasaun mak hanesan Lisensiatura Formasaun Profesór Ensinu Pre-Eskolár iha Fakuldade Edukasaun, Arte no Umanidade (FEAH).

 

Profesór Doutór José Casquilho, nudar responsável ba Programa Pós-Graduasaun UNTL nian, iha Kampus Sentrál UNTL (3/9), Díli, hateten katak iha faze preliminár refere Ekipa ANAAA mai halo avaliasaun ba programa tolu iha nível mestradu no mós ba programa lisensiatura ida.

 

 

 

“Kursu mestradu nian no kursu lisensiatura ne’e aprova husi Konsellu Jerál UNTL nian iha tinan 2018 no 2019. Mestradu Ensinu Portugés iha Kontekstu Timor-Leste, Mestrado Matemátika ba Profesór sira no mos Lisensiatura Formasaun Profesór Ensinu Pre-Eskolár hetan despaixu husi Eis Ministru Edukasaun, Profesór Doutór Fernando Hanjam, no implementa hahu iha tinan akadémiku 2019” dehan Profesór Casquilho.

 

Prosesu ba avaliasaun ne’e sei hala’o durante loron haat, hahú husi loron 3 fulan Setembru, no kontinua iha loron 4, 7 no 10 Setembru 2020.

Iha loron dahuluk avaliasaun ba Kursu Mestradu Esinu Portugés iha Kontekstu Timor-Leste realiza hosi ekipa avaliador sira mak hanesan: Dr. Pedro Ximenes, Dr. Avelino Coelho no Pe. Dr. Agostinho J. Soares.

 

Média UNTL : Mateus Gonçalves

Foto : Agostinho da Cruz e Silva no João Bosco Alves (estajiáriu)

Comment

Detalhes

Escrito por Mateus Goncalves

Publicado em 14 setembro 2020

Atualizado em 14 setembro 2020

Visualizações: 3864

#TimorLeste #UNTL #FCS 9 Setembru 2020

Universidade Nacional Timor Lorosa'e (UNTL), nia Fakuldade Siénsia Sosiál (FCS), liuhusi Departamentu Komunikasaun Sosiál (DCS), hala’o atividade dedikasaun komunitáriu iha Suku Leorema, Postu-Administrativu Bazartete, Munisípiu Likisa, ho objetivu lori estudante sira hakbesik ba komunidade.

 

Atividade refere liuhusi fó apoiu ba konstrusaun Rezidénsia Sentru Pastorál Leorema nian, hamutuk ho komunidade lalin fatuk, fahe informasaun no loke filmajen ba estudante sira iha Eskola Tékniku Vokasionál (TEKVOK) Nicolau Lobato, halo jogu amizade, no partisipa iha misa.

 

Diretór DCS nian, Profesór Marcelino Ximenes Magno, iha Kampus Kaikoli UNTL nian, Díli hateten katak atividade dedikasaun ne’e nu’udar kontribuisaun ne’ebé hala’o ho inisiativa atu prienxe pilár tolu hanesan ensinu, peskiza no dedikasaun ba komunidade.

 

“Ita prepara estudante la’ós matenek de’it liuhusi ensinu no peskiza, maibé hatoman sira servisu hamutuk ho komunidade, iha tinan kotuk ita kuda ai-oan iha suku Kulau, ida ne’e pozitivu tebes no hetan reasaun di’ak no louva husi Amu-Bispu Maliana Dom Norberto Amaral inklui komunidade ba universidade no fakuldade liuliu departamentu”, tenik Profesór Magno.

Profesór Magno hatutan tan katak, atividade dedikasaun komunitária iha Leorema parte ida bele kontribui nomós maneira ida aprende husi komunidade oinsá organiza malu, servisu ho komunidade.

 

 

Entretantu, Amu Vigáriu Parokiál Saun João de Brito Likisa nian, Pe. David Alves da Conceição, apresia ho atividade dedikasaun komunitáriu ne’e no demonstra ho prezensa universitáriu nian bele motiva komunidade iha edukasaun no modelu servisu hamutuk.

 

"Ho presenza universitáriu nian husi Komunikasaun Sosiál bele haree ona buat ruma iha komunidade nia le'et, no imi-nia Almamater bele lori informasaun ba estudante sira iha área ne’e, liuliu iha TEKVOK atu hili sira-nia vokasaun, no motiva sira atu estuda badinas liután", tenik Amu Conceicão.

 

 

 

Amu Conceição mós dezeja katak atividade refere bele hahú kuda iha estudante sira espíritu atu sai líder ideal iha futuru no lori aprendizajen ruma ba universitáriu sira, hodi dezenvolve no aplika mós iha fatin seluk atu komunidade rural sira bele iha esperansa no sente UNTL nia prezensa.

 

Entretantu, estudante DCS nian Anarela Pacheco Lobato destaka mós esperiénsia ne’ebé nia hetan aprende modelu servisu hamutuk entre estudante no estudante ho komunidade.

“Ha’u aprende husi atividade ne’e mak oinsa servisu hamutuk entre estudante ho estudante hodi servi komunidade. Aleinde ne’e ami realiza jogu amizade, tulun komunidade sira lalin fatuk, kuru bee, no halo dokumentasaun ba foto no video ne’ebé sai referénsia ba ami-nia estudu”, dehan estudante.

 

Atividade refere hala’o iha loron 22-23 fulan agostu, inisiativa no kontribuisaun husi estudante no dosente sira Departamentu Komunikasaun Sosiál nian.

 

Implementadór sira husi estudante DCS nian na’in ualunulu resin lima (85), ho dosente na’in rua, reprezentante alumni nian Sr. Arcanjo da Costa Caetano, inklui partisipante ba atividade sira maka Amu-Vigáriu Parokiál, Xefe Komisaun Kontrusaun Rezidénsia nian Sr. Juvinal Soares katekista sira, Diretór TEKVOK, Mestre Rofino Soares Tilman, estudante sira inklui reprezentante autoridade lokál nian Sr. Oscar de Oliveira.

 

Média UNTL : Zita Menezes (estajiária)

Foto : Arkivu DCS: Rafiana Pereira, Rhisto Alves, Hilario da Silva Barros, Rafael dos Reis, Jacob Pinto Guteres (Estajiáriu)

Comment

Detalhes

Escrito por Mateus Goncalves

Publicado em 07 setembro 2020

Atualizado em 07 setembro 2020

Visualizações: 4465

 

#TimorLeste #UNTL #FEAH #INFORDEPE 4 Setembru 2020

Universidade Nacional Timor Lorosa’e (UNTL), nia estudante ne’ebé frekuenta hela Klase Paralelu husi Polo Munisípiu Ainaro nian, hamutuk atus ida haatnulu (140), hala’o estudu komparativu iha Fakuldade Edukasaun Arte i Umanidade (FEAH), hodi hatene ambiente universidade nian.

 

Magnífiku Reitór UNTL, Profesór Doutór Francisco Miguel Martins, hateten, sira-nia vizita iha FEAH atu hatene kle’an liután kona-ba perfíl no nia ierarkia universidade nian, tanba sira mós hola parte iha sivitas akadémiku UNTL nian.

 

“Sira ho inisiativa rasik atu observa diretu no senti rasik tanba sira mos parte integradu ida husi universidade nia Polo iha Munisípiu Ainaro, ho sira-nia vizita ne’e atu hatene klean liután istória nomós ierarkia universidade nian”, tenik Reitór.

Profesór Martins mós enkoraja estudante sira atu badinas estuda hodi hetan diploma lisensiatura no iha oportunidade bele to’o mestradu. Iha fatin hanesan, Vise-Prezidenti Institutu Nasionál ba Formasaun Dosente no Profisionál Edukasaun (INFORDEPE), Profesór Domingos Martins hateten katak objetivu atu koñese ambiente estudu UNTL ho INFORDEPE, instituisaun rua ne’ebé durante ne’e hamutuk fasilita prosesu aprendizajen ba sira.

 

“Ita fasilita de’it atu atividade ne’e bele realiza, tanba ne’e ho inisiativa husi estudante no dosente sira hakarak hatene no haree direita ambiente UNTL ho INFORDEPE nian”, tenik Vise-Prezidente INFORDEPE.

 

Entretantu, reprezentante estudante, Isidoro Magno de Araújo, hateten katak ho vizita refere sira bele haree direita kondisaun UNTL sentrál nian no koñese Magnífiku Reitór ho nia Estrutura.

“Hau senti kontenti tanba bele vizita ona INFORDEPE, UNTL nomós Arkivu & Muzeu Rezisténsia Timorense i bele koñese Reitór UNTL ho nia estrutura, no vizita loron rua ne’e ami bele aprende ho esperiénsia ruma molok ami fila”, hateten Isidoro.

 

Totál estudante universidade nasionál nian iha Polo Ainaro hamutuk 280, no iha estudu refere estudante sira fahe ba grupu rua, no iha grupu ida kompostu husi sira na’in 140.

 

Iha abertura ne’ebé hala’o iha Auditóriu Liceu (03-09), partisipa husi Proreitór ba Asuntu Akadémiku, Profesór Miguel Maia dos Santos, Dekana FEAH, Profesora Doutora Ana Cristina Silveira Soares, ho nia estrutura, Vise-Prezidente INFORDEPE, Profesór Domingos Martins, no konvidadu sira.

 

Média UNTL : João Bosco (estajiáriu), Agostinho da Cruz e Silva

Foto : João Bosco (estajiáriu), Agostinho da Cruz e Silva

Comment