- Detalhes
- Escrito por Adelaide da Cunha
- Visualizações: 959
: Leonia de A. da Costa
: Leonia de A. da Costa- Detalhes
- Escrito por Mateus Goncalves
- Visualizações: 1815
#TimorLeste #UNTL #FCS #COVID19 #COVID19TL 11 Outubru 2021 - Universidade Nacional Timor Lorosa’e (UNTL), liuhusi Fakuldade Siénsia Sosiál (FCS), realiza formasaun Estájiu Servisu Sosiál (ESS) períodu 2021 nian, ba estudante finalista na’in atus haat limanulu resin rua (452), antes dezloka ba hamutuk ho komunidade iha munisípiu Baucau,Viqueque, no Lauten.
Dekanu FCS nian, Prófesor Camilo Ximenes Almeida, iha Kampus Kaikoli UNTL nian, Dili (11/10), hateten katak ESS implementa bazeia ba pilár tolu universidade nian katak (1) ensinu, (2) investigasaun no (3) dedikasaun ba sosiedade.
"Estájiu ne’e hanesan rekezitu importante ba estudante sira antes apresenta sira-nia proposta no monografia, tanba ne’e sira tenke tuir estájiu atu aplika koñesimentu ba komunidade no aprende husi komunidade, nune’e bele preparadu ba futuru bainhira sira remata estudu” tenik Dekanu FCS.
Dekanu hatutan tan katak, estudante sira sei ba lokál durante fulan rua, hahú husi 14 fulan Outubru to’o 17 fulan Dezembru tinan 2021, nune’e mós estudante sira ne’ebé atu ba estájiu tenke iha kartaun vasina dala rua tanba relasaun ho situasaun pandemia COVID-19.
Iha fatin hanesan, estudante Administrasaun Públika, Luis Maria Agosto, hateten formasaun refere esplika liu kona-ba oinsá estudante sira bele hala’o ESS iha terenu hamutuk ho sosiedade, liuliu atu hatene oinsá halo adaptasaun ho komunidade iha fatin estájiu.
“Antes ami ba estájiu, ami sei hetan formasaun husi Fakuldade iha relasaun ho oinsá ami ba halao estájiu servisu sosiál hamutuk ho komunidade iha Munisípiu” Tenik Luis.
Luis hatutan, nu’udar estudante estajiáriu, dezeja katak sei aplika no aprende husi komunidade nune’e bele buka solusaun hamutuk ba problema ne’ebé komunidade hasoru bazeia ba kbiit ne’ebé iha.
Bazeia ba totál 452 ne’e, kompostu husi Departamentu Komunikasaun Sosiál (120), Administrasaun Públika (92), Siénsia Polítika (22), Dezenvolvimentu Komunitáriu (94), Polítika Públika (52), Relasaun Internasionál (40) no Inkluzaun Komunitária Sosiál (32).
Média UNTL 📝: Denilson A. Barros
Foto 📷: Leonia de A. Da Costa
- Detalhes
- Escrito por Adelaide da Cunha
- Visualizações: 1150
#TimorLeste #UNTL #VRAE #AMA #COVID19 #COVID19TL 11 Outubru 2021 - Universidade Nacional Timor Lorosa’e (UNTL) nia Magnífku Reitór Profesór dr. João Soares Martins, akompaña husi Visereitór no Proreitór sira lansa programa Sesta-feira Saudável ho tema “CORPO EM AÇÃO” ho objetivu atu promove atividades fízika ba sivitas akadémika universidade nian, iha Kampus Sentrál UNTL nian, Díli (08/10).
Magnífiku Reitór iha abertura hateten, programa ne’ebé universidade realiza ho objetivu atu envolve Sivitas Akadémika tomak nia partisipasaun tuir atividade ne’ebé promove.
“Ohin loron kmanek tebes ba ita, atu ita bele hala’o lansamentu ba atividade ida importante tebes, ho nia lema katak “CORPO EM AÇÃO” atu dehan katak ita servisu, maibé tenke bok-an ba mai ka halo ezersísiu, tanba durante semana ida nia laran, ita servisu kole no estudante sira tur iha aula laran mós kole” tenik Reitór.
Reitór mós kontinua husu ba sivitas akadémika tomak, atu partisipa ativamente iha atividade ida ne’e atu prevene an husi moras.
Iha fatin hanesan, Visereitora ba Asuntu Estudantís Profesora Eng. Lígia Tomas Correia hateten, programa Sesta-feira Saudavél ne’e, atu promove no hasa’e kualidade moris ne’ebé saudavél ho produtividade.
“Programa ne’e atu promove atividade físika iha komunidade Akademika, ho lema “CORPO EM AÇÃO “, katak “ BO’OK-AAN” ho nune’e dosente, funsionáriu no estudante bele promove no hasa’e kualidade moris ne’ebé saudavél ho produtividade”, hatutan Visereitora.
Visereitora mós salienta katak, programa ne’ebé realiza hala’o mós atividade Kampus Saudável, ho nia objetivu atu promove atividade HAMATAK-KAMPUS (ARVORIZASAUN).
“Iha Atividade Kampus Saudável, ne’e ita hala’o atu HAMATAK-KAMPUS (ARVORIZASAUN) ho asaun, ema ida kuda ai-horis ida, aleinde ne’e ita mós hala’o Feira Saudável atu akompaña ba estudante sira, hodi promove prátika iha Laboratóriu Negósiu, durante hala’o vida Akadémika”, tenik Egn. Lígia.
Profesora Lígia hatutan, programa ne’e realiza semanalmente no rotasaun ba fakuldade hotu, semana tuir mai (15 Outubru 2021), “Programa Sesta-feira Saudavél”, sei responsabiliza husi Fakuldade Agrikultura.
Hafoin lansamentu, Reitór no estrutura sira simbolikamente kuda ai-oan iha resintu Kampus Sentrál nian, no hala’o ezersísiu la’o ain ba Largo Lecidere hodi tau Ai-Funan iha Ilas Nossa Senhora de Fatima Lecidere.
Atividade refere realiza tanba VRAE koopera ho Asosiasaun Mulleres Akadémika (AMA-UNTL), no partisipa husi Diretór Jerál, Diretór Nasionál, Xefe Departamentu, Dosente inklui estudante sira.
Média UNTL 📝: Leonia de A. da Costa
Foto 📷: Laurindo da C. Gomes, Altur Ramos, Honorio Guteres
- Detalhes
- Escrito por Mateus Goncalves
- Visualizações: 975
#TimorLeste #UNTL #FMCS #FEAH #EmbaixadaCubaihaTL #COVID19 #COVID19TL 11 Outubru 2021 - Universidade Nacional Timor Lorosa’e (UNTL), nia Magnífiku Reitór Profesór dr. João Soares Martins MPH, Ph.D, simu vizita husi reprezentante Embaixada Cuba 🇨🇺 nian iha Díli, Sr. José Ernesto Díaz Pérez, ho nia ekipa, hodi diskute kooperasaun parte rua nian ba futuru, iha sala Vídeo Konferénsia UNTI nian, Díli (11/10).
Relasiona ho sorumutuk refere, Magnífiku Reitór hateten parte Embaixada Cuba nian atu konfirma kona-ba planu UNTL nian ba transferénsia Eskola Medisina Jerál iha UNTL.
“Objetivu husi enkontru ne’e, ekipa husi Embaixada Cuba hakarak atu hatene planu ita-nian, kona-ba tranferénsia Eskola Medisina Jerál nian, no diskute mós planu atu loke kursu espesializasaun iha área Medisina iha Timor-Leste, tuir nesesidade ita-nian”, tenik Reitór.
Reitór mós hatutan iha parte seluk ko’alia mós kona-ba apoiu atu destaka profesór husi Cuba nian ba Departamentu Ensinu Edukasaun Fízika no Desportu iha Fakuldade Edukasaun, Arte no Umanidade (FEAH).
Média UNTL 📝: Agostinho da Cruz e Silva
Foto 📷: Pio Belo Ximenes
- Detalhes
- Escrito por Adelaide da Cunha
- Visualizações: 989
#TimorLeste #UNTL #VRAAGK #DNAE #MESSK 11 Outubru 2021 - Universidade Nacional Timor Lorosa’e (UNTL), liuhusi Visereitoria ba Asuntu Akadémiku no Garantia Kualidade (VAAGK), nia Diresaun Nasionál Atendimentu Estudante (DNAE), hahú ona rejistrasaun ba semestre Pár 2021 nian (22 setembru-29 outobru), hafoin Konfinamentu no Serka-Sanitária termina iha Setembru liubá.
“Governu fó subsídiu (propinas no pulsa) ba estudante UNTL nian no bazeia ba lista ne’ebé ita hato’o ba Ministériu Ensinu Superior, Siénsia no Kultura (MESSK), MESSK haruka osan ($) mai UNTL atu selu propinas nu’udar subsídiu, nomós transfere pulsa ba estudante ne’ebé nia númeru iha lista hamutuk 23.679”, tenik Visereitór ba Asuntu Akadémiku no Garantia Kualidade (VAAGK), Profesór Doutór Samuel Venâncio de Sousa Freitas.
Profesór Samuel mós hatutan, hafoin situasaun normál iha kapital Díli no iha resjistrasaun lista ba subsídiu propinas no pulsa nian iha mudansa.
“Ita iha mudansa ba númeru, bainhira regulariza situasaun iha capital Dili fila ba normal tanba ne’e ita hatama tan lista adisional hamutuk na’in 4.129, hodi kompleta numeru estudante ne’ebé halo rejistrasaun iha semester impar ho total 27.808”, tenik VRAAGK.
Visereitór mós hatutan pulsa ba estudante sira, Governu koopera direta ho operadór telekomunikasaun (Telemor, Timor Telecom, no Telkomcel) hodi haruka pulsa ba númeru estudante ne’ebé iha lista.
“Subsídiu pulsa nian MESSK koopera ho telekomunikasaun sira depozita direta ba numeru kontaktu estudante sira-nian, bazeia ba lista ne’ebé ita konsege hato’o, dadun ne’e DNAE mós sei verifika bazeia ba lista semestre impar nian, tanba ne’e sei hein hela relatóriu atu submete ba MESSK”, tenik Visereitór.
Fonte refere hatutan katak, subsídiu bazeia ba montante selu iha semestre anteriór maibé balun selu U$ 30.00, no agora rejista fali ba livre teoria nian, entaun universidade rekolla U$ 5.00 no U$ 25.00 entrega hikas ba estudante.
Iha sorin seluk, Diretór DNAE, Sr. Rui Loco Pires, hateten, dadus husi rejistrasaun semestre impar nian ho totál hamutuk 27.808 mak mai halo rejistrasaun.
“Estudante sira ne’ebé mai rejistu ba semestre impár nian hamutuk 27.808 signifika sira ne’e ativu hela entaun foin lalais ita submete dadus ba ministeriu hamutuk 23.679 tanba ne’e mak lista ba adisionál nian hamutuk na’in 4.129 hodi kompleta 27.808 nian”, tenik Sr. Rui.
Diretór DNAE ne’e mós hatutan, estudante sira ne’ebé ba rejista tenki lori resibu semestre impar nian, hodi konfirma iha loket rejistu nian.
“Estudante sira mai iha parte finansa, hatudu resibu hodi konfirma lista ne’ebé iha, hodi fó sira asina inklui rejista hela númeru telefone ba sira ne’ebé seidauk simu subsídiu, atu nune’e bele halo relatóriu ba universidade atu relata ba MESSK”, tenik Diretór.
Média UNTL 📝: Agostinho da Cruz e Silva
Foto 📷: Pio Belo Ximenes