- Detalhes
- Escrito por Adelaide da Cunha
- Visualizações: 650
: Denilson A. Barros
: Pio BeLo Ximenes- Detalhes
- Escrito por Mateus Goncalves
- Visualizações: 852
#TimorLeste #UNTL #PRAPA #Covid19 #Covid19TL 25 Outubru 2021
Universidade Nacional Timor Lorosa’e (UNTL), nia Sívitas Akadémika tomak, hala’o aktividade prosisaun no reza tersu, hodi selebra Loron Padroeiru São João II, ne’ebé sai nu’udar mahein ba UNTL.
Aktividade refere, hala’o iha loron sexta-feira (22/10), hahú ho prosisaun husi Kampus Sentrál UNTL nian no remata iha Jardim 05 de Maio-Colmera, Díli.
Antes prosisaun, Proreitór ba Asuntu Provedoria no Akonsellamentu (PRAPA), Profesór Tomé Xavier Jerónimo, SH, MD, iha Kampus Sentrál UNTL nian, hateten katak, aktividade refere realiza hodi selebra loron São João II, ne’ebé nu’udar padroeiru UNTL nian, allemde ne’e realiza mos programa "Sexta-feira Saudável".
“Ita hahú prosisaun husi Kampus Sentrál bá to'o iha Gruta Jardim 5 de Maio hodi halo orasaun fiar nian ba Na’in-Feto hodi husu tulun ba sivitas akadémika sira.
Ita husu ba Na’in-Feto atu tau matan nafatin mai ita, nune’e Sívitas Akadémika sira, liuliu estudante bele hetan mahan, moris di’ak no eskola sei avansa ba oin hodi lori UNTL no Timor-Leste ba susesu, no ohin ita mós selebra ita-nia Padroeiru São João Paulo II nia loron, liuhusi adorasaun no prosisaun”, dehan Proreitór.
Atividade refere realiza tanba servisu hamutuk entre Proreitór ba Asuntu Provedoria no Akonsellamentu (PRAPA), Gabinete Visereitoria ba Asuntu Estudantís, no Asosiação das Mulheres Académicas (AMA-UNTL), no hetan partisipasaun husi Dekanu, Diretór-Jerál, Diretór Nasionál, Xefe Departamentu, Dosente, Funsionáriu inklui Estudante sira.
Média UNTL 📝 : Laurindo da Cruz Gomes
Foto 📷: Laurindo da Cruz Gomes
- Detalhes
- Escrito por Mateus Goncalves
- Visualizações: 699
#TimorLeste #UNTL #FCS #PAMBaucau #COVID19 #COVID19TL 22 Outubru 2021
Universidade Nacional Timor Lorosa’e (UNTL), liuhusi Fakuldade Siénsia Sosiál (FCS), entrega estájiariu na’in 19 ba autoridade lokál Munisípiu Baucau, Postu-Aministrativu Vemasse, Suku Ostico, iha (16/10) hodi hala’o Estájiu Servisu Sosiál (ESS) ho komunidade hahú husi 14 Outubru to’o 17 Dezembru 2021.
Iha seremónia entrega refere Xefi Suku Ostico nian, Sr. Policarpo da Silva, simu ho orgullu tebes estudante husi UNTL atu hala’o ESS hamutuk ho komunidade iha suku Ostiku durante fulan rua.
“Durante fulan rua ne’e imi hamutuk ho ami, atu ita bele kompleta malu iha buat balu ne’ebé seidauk loos, atu buka solusaun hamutuk ho komunidade no parte seguransa, ha’u garante katak buat hotu sei la’o ho di’ak”, tenik Xefi Suku Ostiku.
Dekanu FCS nian, Profesór Camilo Ximenes Almeida, hateten, UNTL iha pilar tolu ne’ebé importante, mak ensinu, peskiza no estensaun, tanba ne’e liuhusi ESS lori estudante sira hala’o pilar dotoluk nian mak estájiu hamutuk ho komunidade.
“FCS nia laboratóriu mak komunidade, tanba ne'e ohin ami lori estudante sira ne'e mai atu servisu hamutuk ho imi iha ne'e (Suku Ostico), katak ESS ne'e dedikasaun ba sosiedade, atu estudante sira implementa realidade hosi teoria ne’ebé durante ne’e sira hetan iha aula no aprende mós husi komunidade”, dehan Dekanu.
Profesór Orientadór Domingos Henrique mós enkoraja nia orientadu sira atu servisu hamutuk ho komunidade no sai ona ba komunidade durante fulan rua ne’e.
“Ohin ami entrega estudante ba autoridade suku nian no durante fulan rua nia laran sira sei fahe esperiensia ne’ebé mak sira iha ba komunidade, tuir sira-nian kapasidade ne’ebé sira iha” tenik orientadór.
Aleinde suku ne’e, husi total estudante na’in 452 ne’e FCS mós desloka estajiáriu sira iha suku seluk iha Munisípiu Baucau, Vikeke no Lautém.
Atividade entrege ne’e akompaña husi Dekanu FCS no Orientadór inklui Dosente, no simu husi Xefe Suku Ostico Policarpo da Silva, Xefe Aldeia Bahamori, Ostico, delegadu no delegada sira.
Média UNTL 📝: Altur Ramos (estájiariu)
Foto 📷: Altur Ramos (estájiariu)
- Detalhes
- Escrito por Mateus Goncalves
- Visualizações: 908
#TimorLeste #UNTL #CECA #FCS-DCS #COVID19 #COVID19TL 22 Outubru 2021
Universidade Nasional Timor Lorosa’e (UNTL) liuhusi Fakuldade Siénsia Sosiál (FCS) nia Departamentu Komunikasaun Sosiál (DCS) halo peskiza ho tópiku “Benefísiu Programa Labarik Nia Lian (LNL) iha Rádiu Komunidade Maliana (RCM) ba inan-aman sira iha suku Lahomea, Munisipiu Bobonaru”.
Peskiza refere realiza ho objetivu atu hatene Benefísiu Programa Labarik Nia Lian (LNL) iha Rádiu Komunidade Maliana (RCM) ba inan-aman, aplika métodu kuantitativa deskritiva, ho amostra na’in 30, ho durasaun fulan tolu (Jullu-Outubru 2020).
“Peskiza ne’ebé ha’u halo ne’e atu hatene benefísiu husi Programa LNL iha Rádiu Komunidade Maliana (RCM) ba inan aman sira iha suku Lahomea, asesu ka lae no notisia ne’ebé publika ne’e tuir duni target audiénsia sira-nian ka la’e liuliu iha programa ne’e”, tenik Peskizadora Elisensia da Costa Aires da Silva, iha Kolókiu ne’ebé promove husi CECA iha Auditóriu Liceu UNTL nian, Díli (21/10).
Peskizadora ne’e mós aprezenta katak, husi rezultadu ne’ebé mak hetan husi estudu ne’e rasik, inan aman sira kuaze hotu rona rádiu no husi konteúdu ne’ebé rona no aprende duni iha programa LNL hanesan maneira atu muda maneira komunikasaun di’ak ba oan sira.
“Peskiza ne’e mós hatudu katak inan-aman sira iha ona koñesimentu atu rona oan sira nia lian no hatene mós kona-ba prosesu rejistu moris oan sira bainhira moris mai”, hatutan.
Fonte ne’e mós konklui katak, programa ne’e iha LNL benefísiu maka’as ba inan-aman sira, haree husi parte morál no edukasaun nian, inan-aman sira mós bele hasa’e mentalidade no aumenta koñesimentu oan sira-nian hodi aprende.
“Inan-aman sira apresia ho Programa LNL ne’e no husu atu media liuliu rádiu komunidade bele promove liután atu hasa’e komunidade nia konsiénsia respeita oan sira-nia lian no sira-nia direitu sira”, tenik.
Elisensia mós detaille katak iha interese halo peskiza ho tópiku ne’e, bainhira partisipa hanesan estajiária iha liuhusi kooperasaun ne’ebé promove husi UNTL no UNICEF Timor-Leste no fasilita husi Sekrataria Estadu Komunikasaun (SEKOMS) ba iha rádiu komunidade sira.
Peskiza ne’e hala’o apoiu husi Profesór Marcelino Ximenes Magno, MA, ho kualidade hanesan Ko-autór, Profesora Maria Madalena Ximenes, L.Ed Ko-autora, no autora mak Elisensia da Costa Aires da Silva.
Partisipa iha aprezentasaun ne’e Diretór Centro de Estudos de Arte e Cultura (CECA), Profesór Doutór Vicente Paulino, Diretór DCS nian Profesór Marcelino Ximenes Magno, MA, dosente-investigadór, estudante DCS, no estudante sira husi Fakuldade Edukasaun, Arte no Umanidade no konvidadu sira.
Média UNTL 📝: Laurindo da Cruz Gomes
Foto 📷: Leonia de Araúju da Costa
- Detalhes
- Escrito por Mateus Goncalves
- Visualizações: 666
#TimorLeste #UNTL #COVID19 #COVID19TL 22 Outubru 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D. partisipa iha abertura Feira Livru 2021 hodi komemora aniversáriu CPLP (Comunidade dos Países de Língua Portuguesa) ba dala 25, iha Fundasaun Oriente, Díli (20/10).
Feira livru ne'ebé realiza iha Fundasaun Oriente atu hatoman ema hotu iha kultura lee nian, nune’e bele hasa’e estudante no ema hotu nia koñesimentu no bele hamosu hanoin krítiku no analítiku iha Timor-Leste.
Partisipa iha serimónia abertura Feira Livru ne’e, Reprezentante Ministériu Edukasaun no Desportu, Dra Julia Martins, Embaixadór Portugál iha Dili, Jose Pedro Machado Vieira, Korpu-diplomátiku, Asesóra Prezidente Repúblika ho nia ekipa, reprezentante Ministériu Ensinu Superiór, Siénsia no Kultura, Dra. Maria Filomena Lay Guteres, Diretór Escola Portuguesa iha Dili, Dr. Acacio de Brito, Diretor Escola Cafe Liquiçá, Dili no Oekuse inklui konvidadu sira.
Média UNTL : Leonia de A. da Costa
Foto : Denilson A. Barros