- Detalhes
- Escrito por Mateus Goncalves
- Visualizações: 355
Universidade Nacional Timor Lorosa’e (UNTL) nia Proreitoria ba Asuntu Informatizasaun, Transformasaun Dijital no Inovasaun (PRAITDI) halo sosializasaun Sistema Dijitalizasaun (Sistema Informasaun Akadémika) ba Fakuldade haat (4), mak Faculdade de Ciências Sociais, Faculdade de Filosofia, Faculdade de Direito no Faculdade de Agricultura, iha sala Auditóriu FEAH, Díli (04/10).
Liuhusi sesaun abertura Magnífiku Reitór UNTL, Profesór João Soares Martins, MPH, Ph.D hateten, sosializasaun ne’e, foku ba implementasaun sistema dijitalizasaun ba fakuldade sira, no sei implementa uluk ba fakuldade haat mak hanesan, Faculdade de Ciências Sociais, Direitu, Filozofia no Agrikultura, nune'e estudante sira presiza haree valór ruma la presiza print ona, bele asesu liuhusi online.
“Sosializasaun ne'e durante loron rua 2-3, ba Fakuldade haat no sei implementa uluk ba fakuldade haat ne'e mak, Faculdade de Ciências Sociais, Filozofia, Agrikultura no Direitu. Dosente sira entuziasmu tanba sira mós konkorda atu utiliza sistema ne'e hodi fasilita estudante sira ho fasil”, dehan Reitór.
Iha fatin hanesan Proreitór PRAITDI Profesór Frederico Soares Cabral hatete, sosializasaun ida ne’e hanesan prosesu inisiál ba transformasaun dijitál iha UNTL nian, no atu hahú transformasaun dijitalizasaun ne’e, presiza sosializasaun.
“Se la iha sosializasaun mak ita implementa sistema dijitalizasaun, ita haruka ema uza, ikus mai sistema sei falla, tanba ne’e mak sosializasaun ne’e importante , agora daudauk ne’e sosializasaun haree ba iha regulamentu akadémiku ho módulu sira iha laran, no sosializasaun tuir mai ita sei haree ba sistema ne’e rasik, sistema ne’e ita sei presiza tempu naruk ida atu ita halo sosializasaun ba entidade tomak iha universidade nian ne’ebé relevante no ikus liu ita sei halo implementasaun reál iha inísiu tinan oin”, tenik Proreitór.
Sosializasaun refere realiza durante loron rua hahú husi loron 2-3 fulan outubru ne'e, ne'ebé organiza husi PRAITDI ho nia Direção Nacional Informática e Tecnologia (DNIT), no partisipa husi Dekanu Faculdade de Agricultura, Profesór Vicente de Paulo Correia ho nia estrutura, reprezentante estrutura Faculdade de Direito, reprezentante estrutura Faculdade de Filozofia, dosente, nomós funsionáriu fokal point sira.
#TimorLeste #UNTL #PRAITDI #DNIT #FAGRI #FADIR #FCS #FCH 3 Outubtru 2023
Média UNTL 📝: João Bosco Alves
Foto 📷: João Bosco Alves
- Detalhes
- Escrito por Mateus Goncalves
- Visualizações: 413
Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins MPH,Ph.D, hamutuk ho ekipa reitoral diskuti preparasaun Dies Natalis UNTL nian ba dala rua nulu resin tolu (2000-2023) ne'ebé sei realiza iha loron 17 novembru tinan ne’e.
Enkontru ne'e hala'o iha Sala-Videokonferénsia UNTL nian, Díli (03/10), ho objetivu atu halo preparasaun ba Dies Natalis universidade nian ba dala rua nulu resin tolu (23) ne'ebé sei realiza iha loron 17 novembru tinan 2023, nomós diskuti programa ne'ebé sei halo iha eventu refere.
Partisipa iha enkontru ne'e, Visereitór ba Asuntu Pós-Graduasaun no Peskiza, Profesór. Afonso de Almeida, Visereitora ba Asuntu Estudantís, Profesora, Ligia Tomas Correia, Visereitór ba Asuntu Administrasaun Finansas no Administradór Jerál, Profesór Helio A. X. Mauquei, Proreitór, Proreitora no asisténsia téknika sira.
#TimorLeste #UNTL #EkipaReitoral 03 Outubru 2023
Média UNTL 📝: Denilson Amandio Barros
Foto 📷: Denilson Amandio Barros
- Detalhes
- Escrito por Mateus Goncalves
- Visualizações: 1325
Universidade Nacional Timor Lorosa'e (UNTL), nia Faculdade Medicina e Ciência da Saúde mak responsavel ba iha serimónia Isár Bandeira iha semana dahuluk fulan outubru nian, ne’ebé realiza iha Kampus Sentral UNTL nian, Díli (02/10).
Iha serimónia isar bandeira ne’e liuhusi diskursu Reitór UNTL nian, hateten kada fulan universidade hasa’e bandeira atu bele kuda sivitas akadémika sira-nia domin, nasionalismu no patriotismu ba nasaun.
“Ita labele haluhan katak serimónia Isar Bandeira fulan ida dala ida ne’e sentidu atu ita bele kuda ita nia domin, nasionalismu no patriotismu ba nasaun nune’e mos fó honra ba ita-nia eroi sira ne’ebé lakon sira-nia vida ba nasaun ida-ne’e, nune’e ba alin jerasaun kontinuadór sira atu hatutan hodi bele harii Timor-Leste ida sustentável ba timoroan”. Hateten Reitór.
Reitór mos husu ba pesoál sira universidade nian atu kumpri oras 40 oras semana tuir dever ema idaidak nian.
Partisipa husi Visereitór, Proreitór, Diretór Jerál, Diretór Nasional, Diretór Departamentu, Dekanu, Dosente, funsionáriu no estudante sira.
#TimorLeste #UNTL #MS 3 Outubru 2023
Média UNTL 📝: João Bosco Alves
Foto 📷: Agostinho da Cruz
- Detalhes
- Escrito por Mateus Goncalves
- Visualizações: 337
Universidade Nacional Timor Lorosa'e (UNTL) servisu hamutuk ho Ministériu da Saúde (MS) halo revizaun ba Kurríkulu Post Graduate Diploma Family Medicine Physician (PGD-FMP) nian hodi reativa fali formasaun ba pesoal saúde sira iha Timor-Leste.
Eventu refere realiza iha Sala-Videokonférensia UNTL nian, Díli (02/10) ne’e ho objetivu atu hasa'e koñesimentu pesoal saúde sira-nian iha área saúde, bazeia ba publikasaun ne'ebé publika fali ona iha Jornal Repúblika ho nia durasaun ba tinan lima (5) oin mai.
Partisipa iha revizaun kurríkulu ne'e, Magnífiku Reitór Prof. dr. João Soares Martins MPH, Ph.D, Visereitór ba asuntu Pós-Graduasaun no Peskiza, Profesór Afonso de Almeida, Ph.D, no ekipa husi Ministériu da Saúde.
#TimorLeste #UNTL #MS 3 Outubru 2023
Média UNTL 📝: Leonia de A. da Costa
Foto 📷: Leonia de A. da Costa, Denilson A. Barros
- Detalhes
- Escrito por Mateus Goncalves
- Visualizações: 568
Universidade Nacional Timor Lorosa’e (UNTL) nia Faculdade de Agricultura (FAGRI) sai vensedór iha atividade joven talentu ho modalidade eskrita sientífika ho tema “Jestaun Lixu Iha Timor-Leste, Problema no Solusaun” organiza husi Gabinete Visereitoria ba Asuntu Estudantís nian, ne’ebé hala’o iha Auditóriu FEG-UNTL nian, Díli (11/08) liubá.
Representante Visereitora ba Asuntu Estudantis, atuál Xefe Departamentu Estudante, Alumni no Empregabilidade (DEAE) Sr. Andre de Oliveira hato’o agradese ba Juri sira ne’ebé bele halo ona avaliasaun ba estudante sira-nia eskrita ne’e, eskrita ida ne’e sira entrega deit no hein resultadu manan nain sei publika iha kanal media bainhira juri sira halo ona avaliasaun final.
‘’Hau espera liuhusi eskrita sientífika ida ne’e bele aumenta tan sira-nia kapasidade iha hakerek sientífika nomós oinsa halo peskiza atu bele hakerek tuir nia formatu sira. Ha’u mós apela ba estudante sira atu la’ós buka manan ka lakon maibé esperiénsia mak importante liu iha eskrita ne’e” dehan Sr. Andre.
Iha fatin hanesan Presidente Komisaun Organizadora Eng. Fidelis Xavier Pereira hatete, kompetisaun refere realiza ho objetivu atu aumenta estudante sira-nia koñesimentu iha parte hakerek sientífiku no oinsa halo peskiza.
“Atividade ne’e organiza ho objetivu atu bele aumenta tan estudante sira-nia kapasidade iha eskrita sientífika nian no atu hanorin estudante sira oinsa bele aprende halo peskiza ba asuntu ida hodi bele hakerek tuir formatu sientífika nian ho loloos’’, dehan Fidelis.
Ba manan na’in sira bele haree naran iha lista anexu no ba konfirma iha Gabinete Visereitoria ba Asuntu Estudantis lori ho Dokumentu Komprovativu ne’ebé iha.
#TimorLeste #UNTL #FAGRI #FMCS #FADIR #FCH 03 Outubru 2023
Média UNTL 📝: Laurindo da Cruz Gomes
Foto 📷: Eujenia da Jesus