Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH.Ph.D akompaña husi Decana Faculdade de Turizmo Artes Industrias Criativas Culturais (FTAICC), abertura ba Atividade dadalia lidun turizmu ho tema ‘’Investe Iha Turizmu Timor-Leste, Opurtunidade no Dezafiu’’ iha Auditóriu FEG UNTL nian, Díli (26/09).
Magnífiku Reitór hatete, FTAICC realiza atividade dadalia lidun turizmu ho tema ne’ebé importante tebes ’Investe Iha Turizmu Timor-Leste, Oportunidade no Dezafiu hodi selebra loron mundial turizmu, hodi bele deskute iha komunidade akadémika iha fakuldade no espera bele prodús ideia konstrutiva no inovativa hodi dezenvolve turizmu iha Timor-Leste.
‘’Ha’u-nia mensajen ba estudante sira maka estudante sira-ne’e hanesan bolu ida atu fó kontribuisaun barak hodi prezerva fatin turístiku no promove fatin turístiku hodi dezenvolve ekonomia iha Timor-Leste’’, dehan Magnífiku Reitór.
Iha fatin hanesan Dekana FTAICC Profesora Glenda de Carvalho hatete, eventu turizmu tama ona ba tinan 10 hala’o iha kedas 2013 no eventu turizmu ne’e sai hanesan estrakurikulár ida ba estudante sira atu prátika.
‘’Tema ne’ebé iha estudante sira rasik mak foti no hanesan dekana para atu bele guia de’it sira kona-ba saida mak sira hakarak rona, aprende iha diskusaun no ho tema ne’e atu bele haree husi oinsa parte governu nian akadémika nian kona-ba asuntu Turizmu nian’’, dehan Dekana.
Prezidente Komisaun Organizadora Nicodemos Santa da Costa hatete, tema kona-ba investe iha Turizmu Timor-Leste, opurtunidade no dezafiu hodi fanun ema hotu atu hanoin hamutuk oinsa investimentu hodi kontribui ba sustentabilidade turizmu iha Timor-Leste.
‘’Estudante Departamentu Komersiu no Turizmu ho inisiativa selebra loron ne’e ho atividade sira hanesan misa agradesimentu, Dadalia iha Lidun Turizmu, Kompetisaun Kulinaria Tradisional no Konsertu no husu ba universidade no fakuldade atu bele tau osan ba tinan oin hodi realiza atividade sira-ne’e, tanba ne’e mak ami bele aprende barak liutan, ba ami nia futuru’’, dehan nia.
Média UNTL 📝: Laurindo da Cruz Gomes
Foto 📷: Laurindo da Cruz Gomes/Leonia da Costa