- Detalhes
- Escrito por Mateus Goncalves
- Visualizações: 464
Universidade Nacional Timor Lorosa'e (UNTL) nia Magnífiku Reitór Profesór dr. João Soares Martins, MPH, Ph.D, ho reprezentante Organizasaun Saúde Mundial, Dr. Arvind Mathur, Vise Ministru Saúde ba Operasionalizasaun Ospitál, Dr. Flávio Brandão Mendes no reprezentante Vise-Primeiru Ministru nian, Sr. Nivio Magalhães lansa ba peskiza moras la hadaet, iha Sede Suku Comoro, Díli, (12/10).
"Agradese ba parte hotu liuliu ba Xefe Suku Comoro nian bele oferese fatin ba ita, no ohin ita halo lansamentu ba peskiza fatór risku kona-ba moras la hadaet, ha'u hanoin eventu ne'e importante tebes atu ita tenke halo duni peskiza iha komunidade", hateten Reitór liuhusi diskursu.
Reprezentante OMS iha Timor Leste, Dr. Arvind Mathur hatete, moras la hadaet hanesan dezafiu boot ida iha mundu liuliu implika ba dezenvolvimentu nasaun nian, tanba ne'e agradese tebes ba UNTL bele koopera ho OMS hodi halo peskiza hodi fornese dadus ba OMS no governu hodi tau atensaun.
"Ha'u hakarak agradese ba UNTL hamutuk ho Dr. Afonso nu’udar Visereitor ba Asuntu Pós-Graduasaun no Peskiza nian bele koopera di'ak ho OMS hodi bele implementa atividade peskiza ne'e. Liuhusi rekollamentu dadus hirak ne'e bele tulun OMS nomós governu bele apoiu bazea ba dadus, tanba dezafiu boot no implika ba dezenvolvimentu nasaun nian", dehan.
Vise-Ministru Saúde ba Operasionalizasaun Ospitál, Dr. Flávio Brandão Mendes de Araújo, hatete, ministériu apoiu 100% ba atividade importante ida ne'e, tanba tenke iha dadus ne'ebé kredível.
"Ministériu apoiu tebes 100% atividade sira hanesan ne'e, tanba ami atu elabora planu presiza tebes tenke bazei ba dadus ne’ebé kredível" dehan Vise Ministru.
Lansamentu ne'e partisipa husi reprezentante Vise-Primeiru Ministru, Nivio Magalhães, Xefe Suku Comoro nian, Eurico da Costa de Jesus, PNTL, F-FDTL, pesoal Saúde sira no konvidadu sira.
#TimorLeste #UNTL #OMS #MS 13 Outubru 2023
Média UNTL 📝: Leonia de A. da Costa
Foto 📷: Eugenia de Jesus
- Detalhes
- Escrito por Mateus Goncalves
- Visualizações: 466
Universidade Nacional Timor Lorosa'e (UNTL), nia Faculdade de Medicina e Ciência da Saúde (FMCS), realiza serimónia Judisium no Juramentu Profisional ba finalista na'in atus rua neennulu resin tolu (263), iha Salaun OKA-Surikmas, Díli (13/10).
Iha diskursu Magnífiku Reitór agradese ba estrutura FMCS, nomós ba profesór sira liuhusi dedikasaun no tulun ba prosesu aprendisajen husi inísiu to'o momentu ida-ne'e estudante sira bele termina sira-nia kursu iha universidade.
"Agradese ba estrutura FMCS nomós ba Inan-Aman sira nia domin no esforsu ba oan sira bele termina kursu iha universidade, no husu ba finalista sira atu aproveita siénsia ne'ebé imi aprende iha tinan barak atu kontinua estuda no asesu ba revista sientífika sira hodi atualiza koñesimentu, nomós hatudu responsabilidade no dedikasaun tuir promesa ne'ebé iha", tenik Magnífiku Reitór.
Iha sorin seluk Vise-Ministru Fortalesimentu Instituisional Saúde, Sr. José dos Reis Magno, hato'o parabéns ba finalista sira ne’ebé simu ona juramentu profisionál liuhusi sakrifika-an bele remata estudu iha FMCS.
"Parabens ba sira ne'ebé termina ona estudu durante tinan barak, no husu ba asosiasaun sira hotu iha tinan 2024, atu prepara kode etika deontolójiku nune'e Ministériu Saúde, nafatin apoiu ita-bo'ot sira hodi haree ba kestaun hirak ne'e nune'e ita bele apsorve profisionais saúde liuhusi juramentu ne'ebé imi halo", dehan Vise-Ministru.
Iha judisium ne'e finalista sira halo mós juramentu profisionál, husi totál atus rua neen nulu resin tolu (263), kompostu husi, Departamento de Enfermagen (85), Departamento de Parteira (86), Departamentu de Farmacia (42), Departamento de Nutrição (22) no Departamento de Biomédica Laboratório (28).
Partisipa iha serimónia ne'e, Visereitór ba Asuntu Pos-Graduasaun no Peskiza, Profesór Afonso de Almeida, Visereitora ba Asuntu Estudantís, Profesora Ligia Tomas Correia, Vise-Dekanu, Diretór Departamentu, Dosente, Funsionáriu Konvidadu, Inan-Aman no Estudante sira.
#TimorLeste #UNTL #FMCS #MS 13 Outubru 2023
Média UNTL 📝: Denilson Amandio Barros
Foto 📷: Denilson Amandio Barros
- Detalhes
- Escrito por Mateus Goncalves
- Visualizações: 440
Universidade Nacional Timor Lorosa’e (UNTL) nia Proreitoria ba Asuntu Informatizasaun Transformasaun Dijital no Inovasaun (PRAITDI), dadaun ne’e dezenvolve no mellora sistema rejistu online ba estudante sira no sei implementa iha tinan akadémika 2024 nian.
Liuhusi entervista iha Auditóriu Liceu, Díli (4/10), Proreitór PRAITDI, Profesór Frederico Soares Cabral hateten, dadaun ne’e sistema rejistu online hahú kria ona no sei implementa loloos iha 2024, maibé infraestrutura mak sei prosesu hela, tanba universidade sei halo hela akizasaun ba servidór sira nian, bainhira servidór sira iha ona mak sei halo instalasaun ba sistema ne’e.
“Iha sistema ne’e ita la garantia katak tenke rezolve problema hotu iha universidade nian, maibé liu husi sistema ne’e bele ona, redús problema sira ne’ebé durante ne’e lao iha fakuldade sira, liuliu iha prosesu rejistrasaun ba kada semestre, ne’e sei manuál hela no prosesu priensimentu notas mós sei manuál hela, entaun ita koko atu transforma ida ne’e ba dijitál”, dehan Pro-Reitor.
Relasiona ho sistema ne’e, PRAITDI halo tiha sosializasaun ba fakuldade sira ne’ebé sei implementa iha faze dahuluk nian iha inísiu 2024 nian. Dadaun ekipa tékniku to’o ona iha prosesu kolesaun dadus.
#TimorLeste #UNTL #PRAITDI 11 Outobru 2023
Média UNTL 📝: João Bosco Alves
Foto 📷: João Bosco Alves
- Detalhes
- Escrito por Mateus Goncalves
- Visualizações: 424
Universidade Nacional Timor Lorosa'e (UNTL), nia Magnífiku Reitór Profesór dr. João Soares Martins, MPH, Ph.D, halo lansamentu ba Timorese Academic Journal of Science and Technology (TAJST), iha Auditóriu FEST Hera, DÍli (12/10).
"Ita tenki investe semináriu anuál no jornál akadémika hanesan ne'e, nune'e ita bele halo iha semestral di'ak liután hodi ita bele hadia liután kualidade, atu bele hasa'e fatór iha mundu akadémika. Ita tenki hatudu kapasidade iha área akadémika liuhusi peskiza iha nível internasional no publikasaun sira di'ak ba progresu siénsia no inovasaun iha área siénsia teknolojia", dehan Magnífiku Reitór.
Iha fatin hanesan, Vise-Dekanu ba Asuntu Kooperasaun no Peskiza, Profesór Domingos de Sousa Freitas, hatete lansamentu jornal akadémika ne'e kada tinan iha Faculdade de Engenharia Ciência e Tecnologia (FECT) halo hodi komemora Dies Natalis UNTL nian ne'ebé sei realiza iha loron 17 novembru tinan ne'e.
"Lansamentu jornal akadémika ne'e ita sempre halo kada tinan. Liuhusi atividade ne'e mós ita hakarak halo kooperasaun di'ak ho institutu privadu, públiku no kompaña internasional sira atu hatene peskiza ne'ebé, FECT no universidade halo nune'e bele promove natureza iha rai-laran", tenik Profesór Domingos.
Lansamentu ne'e, halo mós semináriu nasional hodi komemora Dies Natalis UNTL nian (2000-2023), ne'ebé sei realiza iha loron 17 novembru tinan ne'e.
Partisipa iha lansamentu ne'e, Reprezentante (MESSK) Dr. Edmundo Viegas, Diretór Ezekutivu ANAAA, Dr. Nilton Paiva, Reprezentante JICA iha Timor-Leste, Sr. Ito Mimpei no ekipa, Vise-Dekanu, Diretór Departamentu, Dosente, Funsionáriu, Konvidadu no Estudante sira.
#TimorLeste #UNTL #FECT 12 Outubru 2023
Média UNTL 📝: Denilson Amandio Barros
Foto 📷: Denilson Amandio Barros
- Detalhes
- Escrito por Mateus Goncalves
- Visualizações: 339
Universidade Nacional Timor Lorosa’e (UNTL) liuhusi Faculdade de Direito nia Asosiasaun Akadémika Estudantíl (AAE-FADIR) realiza atividade Debate Jurídiku ho tema ‘’Subvensaun ba Partidu Polítiku no Planu Estratéjiku Dezenvolvimentu Nasional 2011-2030’’ hodi komemora Dies Natalis FADIR badala 18, iha Kampus Sentral UNTL nian, Díli (7/10).
Senadu FADIR nian Cristovão de Araújo Mau-to hatete, iha tinan ida ne’e FADIR sei komemora nia ezisténsia badala 18 (2005-2023), iha loron 16 fulan outubru, no AAE realiza eventu Desportu, no Akadémiku, Debate Jurídiku no Diskursu Jurídiku ne’ebé partisipa husi estudante.
‘’Objetivu husi atividade ne’e atu eleva kapasidade estudante sira-nia koñesementu kona-ba matéria direitu no aleinde ne’e atu promove mós sira-nia mentalidade no abilidade koalia iha públiku no oinsa atu bele fo argumentasaun ba tema no mosaun iha debate ne’e’’, dehan Senadu Cristovão.
Nia mós hatutan katak, liuhusi debate promove argumentu kontra no prokontra entaun presiza halo peskiza no konsulta referénsia nune’e bele iha argumentu di’ak iha debate.
#TimorLeste #UNTL #FADIR #AAE 10 Outubru 2023
Média UNTL 📝: Laurindo da Cruz Gomes
Foto 📷: Laurindo da Cruz Gomes